ዛካርያሳ 14

ፆሳይ ያና፥ ካዎታና

1ሄኮ፥ ጎዳ ፕርዳ ጋላሳይ ዬስ፤ ሄ ዎደ ህንተ ፄልሽን፥ ህንተፈ ቦንቅዳባ ህንተ ስንን ሻከታና። 2ካዎተታ ኡባ ጎዳይ የሩሳላመ ቦላ ኦላስ ሺሻና። ካታማይ ኦይከታና፤ ኬይ ቦንቀታና፤ ማጫ አሳ ዎልቃን ኢሳና። ካታማ አሳፐ ባጋይ ድኤትድ ባና፤ ሽን አትዳ አሳይ ካታማፐ ከየና። 3ሄሳፈ ጉየ ጎዳይ ከይድ፥ ካሰ ኦላ ጋላስ ኦለተይሳዳ ካዎተታ ኦላና። 4ሄ ጋላስ እያ ቶሆት የሩሳላመፐ ዶሎሀ ባጋራ ደእያ ሻማሆ ዙማ ቦላ ኤቃና። ሻማሆ ደረይ ዶሎሀፐ ዉሎሀ ጋካናዉ ናምኡ ከይድ ጳልቀትን፥ ዳሮ ግታ ዛንጋራይ መታና። ዙማፐ ባጋይ ፑደሀ ባጋ፥ ቃስ ባጋይ ዱገሀ ባጋ ሸርእ ጋና። 5ሄ ዛንጋራይ ብድ አፄላ ጋካና፤ ህንተ ሄ ዛንጋራራ ባቃት አድ አታና። በን ይሁዳ ካዋ ኦዝያነ ላይ ቢታይ ቃፅን፥ ህንተ ማይዛት ባቃትድ አትዳይሳዳ ህንተ ባቃታና። ሄሳፈ ጉየ፥ ጎዳይ ታ ፆሳይ ባ ጌሻታ ኡባራ እስፈ ያና።

6ሄ ዎደ ሜጎይ፥ ሻችነ ም ዴና። 7ሄ ዎደ ቃምነ ጋላስ ባዋ፥ ጎዳይ ፃላል ኤርያ ዱማ ጋላስ ግዳና፤ ሄ ጋላስ ቃማይ ፖኦ ግዳና።

8ሄ ዎደ ደኦ ሃይ የሩሳላመፐ ጎጋና፤ እያፐ ባጋይ ማፅነ አባን ገላና፤ ቃስ ባጋይ መደትራነ አባን ገላና። ሄ ሃይ ባልጎነ ቦነ ጎግሸ ዳና። 9ጎዳይ ቢታ ኡባ ቦላ ካዎታና፤ ሄ ዎደ እስ ጎዳ ፃላል ዳና፤ እያ ሱን ፃላላ ፄጋና።

10ግብአፐ ዶምድ የሩሳላመ ዱገሀ ባጋራ አድ እርሞና ካታማ ጋካናዉ ደእያ ቢታ ኡባይ ደምባታና። ሽን የሩሳላመይ ብንያመ ፐንግያፈ ብድ፥ በን ፐንግያ ግናራ ዞዘ ፐንግያ ጋካናዉ፥ ቃስ ሀናንኤላ አዱሳ ግምብያፈ ብድ፥ ካዎ ዎይነ ጉምእያ በሳ ጋካናዉ ባ በሳን ቁ ግድ ዳና። 11የሩሳላመይ አስ ደእያ በሲ ግዳና፤ ህዛፐ ጉየ የና፤ እያን ደእያ አሳይ ህርግ ባይና ሳሮ ዳና።

12ጎዳይ የሩሳላመ ኦላናዉ ደንድዳ አሳ ኡባ ቦላ ጋዶ ኤሀና። ኤንቲ ኤቆን ደእሽን፥ ኤንታ አሾይ ዎቃና፤ ኤንታ አይፈይ ባ ኦላን፥ ኤንታ እንፃርሳይ ባ ኮቶኑዋን ዎቃና። 13ሄ ዎደ ጎዳይ ኤንታ ዎልቃማ ዳጋማ ዳጋንና። አሳ ኡባይ እሶይ እሱዋ ኩሽያ ኦይክድ ኦለታና። 14ይሁዳ አሳይ የሩሳላመ ባጋ ግድድ ኦለታና። ዩሹዋን ደእያ ካዎተታ፥ ታይቦይ ባይና ሻሉዋ፥ ዎርቃ፥ ብራነ ማኡዋ ድእድ ሺሻና። 15ሀ ጋዱዋ ዳንያ ጋዶይ ፓራታ ቦላ፥ ባቁሎታ ቦላ፥ ግማለታ ቦላ፥ ሀረታ ቦላነ ሞርከት ዱንካንዳ በሳን ደእያ መሄ ኡባ ቦላ ያና።

16ሄሳፈ ጉየ፥ የሩሳላመ ኦልዳ ካዎተታፐ አትዳ ኡባይ ካዋ፥ ኡባፈ ዎልቃማ ጎዳ ጎይናናዉነ ሻቃራ ባኣለ ቦንቻናዉ ላይን ላይን የሩሳላመ ባና። 17ሳአን ደእያ አሳፐ ኦንካ ካዋ፥ ኡባፈ ዎልቃማ ጎዳ ጎይናናዉ የሩሳላመ ቦና እፅኮ፥ ኤንታዉ እር ቡከና። 18ግብፀ አሳይ ብድ ጎይኖና እፅኮ፥ ሻቃራ ባኣለ ቦንቻናዉ ቦና እፅዳ አሳ ቦላ ጋክዳ ጋዶይ ኤንታ ቦላ ያና። 19ሻቃራ ባኣለ ቦንቻናዉ ቦና እፅዳ ግብፀይነ ሀራ ካዎተት ኡባይ ሴረታና ሴራይ ሀይሳ።

20ሄ ዎደ ፓራታ ቆን ደእያ ሻሾትያ ቦላ፥ “ጎዳስ ጌይዳይሳ” ጌተትያ ማላ ፁፈይ ፃፈታና። ፆሳ ኬን ደእያ ካያ ኦቶይ ያርሾ በሳ ማታን ደእያ ሳንያ መላ ጌሽ ግዳና። 21የሩሳላመንነ ይሁዳን ደእያ ኦቶ ኡባይ ኡባፈ ዎልቃማ ጎዳስ ጌሽ ግዳና። ያርሾ ያርሽያ አሳ ኡባይ ሄ ኦቶታ ኤክድ፥ ያርሾ አሹዋ ኤንታን ካና። ሄ ዎደ ኡባፈ ዎልቃማ ጎዳ ኬን አይ ዛልአንቾይ ዴና።

Currently Selected:

ዛካርያሳ 14: GFBEVF

Highlight

Copy

Compare