ሮመ 7
7
ኤኮ ገሎ ሌምሶ
1ታ እሻቶ፥ ታኒ ኦደይ ህገ ኤርያ አሳታሳ። ህገይ እስ አስ ፓፃ ደእያ ዎደ ኡባን እያ ሃሬስ። 2ሌምሶስ፥ አዝና ገልዳ ማጫስያ እ አዝናይ ፓፃ ደእያ ዎደ ህገን እያራ ቃሸታሱ። ሽን እ አዝናይ ሀይቅኮ እያራ እያ ጫቅዳ ጫቆይ እዮ ሃረና። 3ሄሳ ግሾ፥ እያ ባ አዝናይ ፓፃ ደእሽን፥ ሀራ አደ ገልኮ፥ እያ ላምዳሮ ጌተታዉሱ። ሽን እ አዝናይ ሀይቅኮ፥ ጫቆይ እዮ ሃሮና ግሾ እያ ሀራ አዝና ገልኮ፥ እያ ላምዳሮ ጌተቱኩ።
4ሄሳ ግሾ፥ ታ እሻቶ፥ ህንተ ክርስቶሳ አሳተ ባጋራ ህገ ዎልቃስ ሀይቅድ፥ ፆሳስ አይፈ አይፋናዉ ሀይቆፐ ደንድዳ ክርስቶሳስ ግድደታ። 5ኑ አሾ አሞይ ኑና ሃርን፥ ኑ ደእያ ዎደ ህገይ ጉጅ ናጋራ ኦና መላ ኑና ደንስ። ኑ አሳተ ግዶን ኢታ አሞተ ደእያ ግሾ ኑኒ ሀይቆ አይፈ አይፋና መላ ኦስ። 6ሽን ሀእ ኑኒ ኑና ቃችዳ ህግያስ ሀይቅዳ ግሾ ኑኒ ህገ ቃሾፐ ብለትዳ። ሄሳ ግሾ፥ ጌሻ አያና ኦገን ፆሳስ ኪተቶስፐ አትሽን፥ ፃፈትዳ ጭማ ህግያስ ኪተቶኮ።
ህገነ ናጋራ
7ያትን፥ ኑኒ ዎይጋኔ? ህገይ ባ ሁጰን ናጋሬ? ግደና! ሽን ህገይ ናጋር አይበኮ ታና ኤርስስ። ህገይ፥ “አሞቶፋ” ጎናኮ፥ አሞተ አይበኮ ታኒ ኤርከ።#ከሳ 20:17፤ ዛረ 5:21. 8ሽን ታ ኡባባ አሞታና መላ ናጋር ህገ ባጋራ ታናን ኦገ ደምስ። ህገይ ባይነኮ ናጋር ሀይቅዳይሳ።
9ካሰ ህገይ ባይና ዎደ ታ ፓፃ፥ ሽን ህገይ እመትዳ ዎደ ናጋር ፓፅን ታ ቃስ ሀይቃስ። 10ታኒ ደኦን ዳና መላ ፆሳይ እምዳ ህገይ ታዉ ሀይቆ ኤህስ። 11ናጋር ህገ ባጋራ ታና ጭምያ ኦግያ ደምድ፥ ዎስ።#መ 3:13.
12ሄሳ ግሾ፥ ህገይ ጌሽ፤ እያን ፃፈትዳ ኪታይካ ጌሽ፥ ፅሎነ ሎኦ።
13ያትን፥ ሎኦ ግድዳባይ ታ ቦላ ሀይቆ ኤህደዬ? ግደና! ሽን ናጋር ናጋራ ግደይስ ቆንጫና መላ ሎኦባን ማደትድ ታዉ ሀይቆ ኤህስ። ሄሳ ግሾ፥ ናጋራ ናጋራተይ ህገ ባጋራ አድ ኤረትስ።
14ኑኒ ህገይ አያናባ ግደይሳ ኤሮስ። ሽን ታኒ ናጋራስ ባይዘትዳ አሾ አስ። 15ታኒ ኦያባ አኬክከ፤ ታኒ ዶስያባ ኦናይሳ አጋዳ ታ እፅያባ ኦይስ።#ጋላ 5:17. 16ታኒ እፅያባ ኦያ ግድኮ፥ ህገይ ሎኦ ግደይሳ ታ ማአይስ። 17ሄሳ ግድኮ፥ ሄ ኦሱዋ ታናን ደእያ ናጋራይ ኦይስፐ አትሽን፥ ታ ኦከ።
18ታናን፥ ሄስካ ታ አሹዋን ሎኦባይ ባይናይሳ ኤራይስ። ሎኦባ ኦያ አሞተ ታናን ደኤስ፥ ሽን ሎኦባ ኦናዉ ዳንዳእከ። 19ታኒ እፅያ ኢታባ ኦይስፐ አትሽን፥ ታ ዶስያ ሎኦባ ኦከ። 20ታኒ እፅያባ ኦያ ግድኮ፥ ሄሳ ታናን ደእያ ናጋራይ ኦስፐ አትሽን፥ ኦይ ታና ግድከ።
21ህዛ፥ ታ ሎኦባ ኦናዉ ዶስሽን፥ ኢታባ ኦሶይ ዎጋ ግደይሳ ደማስ። 22ታኒ ታ ዎዛናን ፆሳ ህግያን ኡፋይታይስ። 23ሽን ታ አሳተ ግዶን ደእያ ታ ቆፋ ህግያራ ኦለትያ ዱማ ህገ በአይስ። ሄ ህገይ ታ አሳተ ግዶን ኦያ ናጋራ ህግያስ ታና አይለ ኦድ እሚስ። 24ታኒ ዋንዳ ይባታ አሴ? ሀይቆስ ኤፍያ ሀ አሳተፈ ታና አሻናይ ኦኔ? 25ኑ ጎዳ የሱስ ክርስቶሳ ባጋራ ታና አሽያ ፆሳስ ጋላታይ ግዶ።
ህዛ፥ ታኒ ታ ቆፋን ፆሳ ህግያስ ሃረታይስ፤ ሽን ታ አሳተን ታና ናጋራ ኦስስያ ህግያስ ሃረታይስ።
The Word for the World International and The Word for the World Ethiopia