ማርቆሳ 8

ኦይዱ ሙኩሉ አሳ

(ማቶ 15:32-39)

1ጉ ዎደፐ ጉየ፥ ዳሮ አሳይ የሱሳኮ ሺቅዶሶና። አሳስ ምያባይ ይን የሱሲ ባ ታማረታ ባኮ ፄግድ፥ 2“ሀ አሳይ ታራ ሄ ጋላስ ጋካናዉ ጋምእድ፥ አይኮካ ምያባ ደምቦና ግሾ፥ ታና አሳይ ቃስ። 3ታኒ አሳ ኮሻራ ሶ የድኮ አሳይ ብሸ ኦገን ዳቡርድ ኩንዳና፥ ባጋ አሳይ ሃሆሶፐ ይዶሶና” ያግስ።

4የሱሳ ታማረት ዛሪድ፥ “ሀ መላ ቢታን ሀ አሳ ኡባ ሙዛናዉ ግድያ ካ ደማናዉ ዳንዳኤይ ኦኔ?” ያግዶሶና።

5የሱሲ ኤንታኮ፥ “ህንተዉ አፑን ኡይ ደኢ?” ያግድ ኦይችስ።

ኤንቲ ዛሪድ፥ “ላፑን ኡይ ደኤስ” ያግዶሶና።

6የሱሲ አሳይ ሳአን ኡታና መላ ኪትስ። ያትድ፥ ላፑን ኡይ ኤክድ ፆሳ ጋላት ስሚድ ሄ ኡይ መንድ፥ አሳስ ግሻና መላ ባ ታማረታስ እሚስ። እያ ታማረት አሳስ ግሽዶሶና። 7ኤንታዉ ቃስ ጉ ላፋ ሞሎት ደኦሶና። የሱሲ ሄ ሞሎታ ግሾ ፆሳ ጋላትድ፥ አሳስ ግሻና መላ ባ ታማረታ ኪትስ። 8አሳ ኡባይ ምድ ካልዶሶና። እያ ታማረት አትዳ ቲፍያ ላፑን ጋይታ ኩመ ደንዶሶና። 9ካ ምዳ አሳ ታይቦይ ኦይዱ ሙኩሉ ግዳና። ሄሳፈ ጉየ፥ የሱሲ አሳ የድስ። 10እ ቃስ ባ ታማረታራ ኤለስ ዎጎሎን ገልድ ዳልማኑታ ቢታ ብስ።

ማላታ በአናዉ ኦይችዳ ኦይሻ

(ማቶ 16:1-4)

11ፋርሳወት ይድ የሱሳ ፓጫናዉ ኮይድ፥ ሳሎፐ ባንታና ማላታ በሳና መላ የሱሳራ ፓላማ ኦይክዶሶና።#ማቶ 12:38፤ ሉቃ 11:16.

12የሱሲ ቶክ ሸምፕድ፥ “ሀ ዎድያ አሳይ አይስ ማላታ ኮዪ? ታኒ ህንተዉ ቱማ ኦዳይስ፤ ሀ ዎድያ አሳስ አይ ማላትካ እመተና” ያግስ።#ማቶ 12:39፤ ሉቃ 11:29. 13እ ኤንታ ያን የግ አግድ ዛር ዎጎሎን ገልድ አባፈ ሄፍን ፕንስ።

ፋርሳወታነ ሄሮዲሳ እርሾ

(ማቶ 16:5-12)

14እያ ታማረት ካ ኤፋናይሳ ዶግዶሶና፤ ኤንታዉ ዎጎሉዋ ግዶን እስ ኡይፈ ሀር ባዋ። 15የሱሲ ኤንታኮ፥ “ህንተና ኤርተ። ፋርሳወታ እርሹዋፈነ ሄሮዲሳ እርሹዋፈ ናገትተ” ያግድ ኪትስ።#ሉቃ 12:1.

16ኤንቲ ባንታ ግዶን፥ “እ ሀይሳ ገይ ኑስ ኡይ ባይና ግሾሳ” ያግዶሶና።

17የሱሲ ኤንቲ ገይሳ ኤርድ ኤንታኮ፥ “ህንተዉ ኡይ ባይና ግሾ አይስ ኦደቴቲ? ሀእካ ኤረከቲ? ዎይኮ አኬከከቲ? ህንተ ዎዛናይ ዶጭዴ? 18ህንተዉ አይፈይ ደእሽን በኤከቲ? ሀይ ደእሽን ስኤከቲ? ህንተ አኬከቲ?#ኤርም 5:21፤ ህዝ 12:2፤ ማር 4:12. 19ታኒ እቻሹ ኡይ እቻሹ ሙኩሉ አሳስ ባዳ ዎደ አፑን ጋይታ ኩመ ቲፈ ደንደቲ?” ያግስ።

ኤንትካ፥ “ታማነ ናምኡ ጋይታ ኩመ” ያግዶሶና።

20“ሄሳዳካ፥ ታኒ ላፑን ኡይ ኦይዱ ሙኩሉ አሳስ ባዳ ዎደ አፑን ጋይታ ኩመ ቲፈ ደንደቲ?” ያግስ።

ኤንቲ፥ “ላፑን ጋይታ ኩመ ደንዳ” ያግዶሶና።

21ያትን፥ “ሀእካ አኬክበከቲ?” ያግስ።

ቤተሳይዳን ደእያ እስ ቆቀ

22ኤንቲ ቤተሳይዳ ካታማ ብዶሶና። ጉ አሳት ቆቀ ኡራ የሱሳኮ ኤህድ ሄ ኡራ ቦቻና መላ እያ ዎስዶሶና። 23የሱሲ ቆቀ ኡራ ኩሽያ ኦይክድ ካታማፐ ጋፃ ከስስ። እያ አይፍያን ጩትድ ባ ኩሽያ እያ ቦላ ዎድ፥ “ነዉ አይኮይ በንቲ?” ያግድ ኦይችስ።

24ኡራይ ቁ ግድ ፄልድ፥ “ታዉ አሳይ በንቴስ፥ ሽን አሳይ ሄመትሸ ም ዳኔስ” ያግስ።

25ሄሳፈ ጉየ፥ የሱሲ ዛሪድ፥ ኡራ አይፍያን ባ ኩሽያ ዎስ። ኡራይ ሎይ ፄልስ፥ እያ አይፈይ ፓፅስ፥ ኡባባ ጌሽድ በእስ። 26የሱሲ አድያኮ፥ “ነ ሶ ባ፥ ሽን ጉታ ገሎፓ” ያግድ ኪትስ።

ጰፅሮሳ ማርካተ

(ማቶ 16:13-20፤ ሉቃ 9:18-21)

27የሱሲ ባ ታማረታራ ቅሳረ ፍልጶሳ ማታን ደእያ ጉታ ብስ። ኤንቲ ብሽን ኦገ ቦላ የሱሲ፥ “ታና አሳይ ኦና ጎና?” ያግድ ባ ታማረታ ኦይችስ።

28እያ ታማረት፥ “እስ እስ አሳይ ነና፥ ‘ፃማቅያ ዮሃንሳ’ ጎሶና፤ ሀራት፥ ‘ኤልያሳ ጎሶና’ ቃስ ሀራት፥ ‘ናበታፐ እሱዋ’ ጎሶና” ያግዶሶና።#ማር 6:14.

29የሱሲ ኤንታኮ፥ “ያትን ህንተ ታና ኦና ጌቲ?” ያግድ ኦይችስ።

ጰፅሮስ፥ “ኔኒ ክርስቶሳ” ያግድ ዛርስ።

30የሱሲ፥ “ታባ ኦደስካ ኦዶፕተ” ያግድ ኤንታ ኪትስ።

የሱሲ ባና ጋካና ዋያ ኦድስ

(ማቶ 16:21-28፤ ሉቃ 9:22-27)

31የሱሲ ባ ታማረታኮ፥ “አሳ ናአይ፥ ዳሮ መቶ ኤካናዉ በሴስ፤ ጭማት፥ ካህነ ሀላቃትነ ህገ አስታማረት እያ እፃናዉ በሴስ። ኤንቲ እያ ዎናዉነ እ፥ ሄ ጋላሳፐ ጉየ፥ ሀይቆፐ ደንዳናዉ በሴስ” ያግድ ኤንታ ታማርስስ። 32እ ሄሳ ኤንታዉ ጌሽድ ኦድስ። ጰፅሮስ እያ እስ ባጋ ዛሪድ ሀንቀትስ።

33ሽን የሱሲ ጉየ ስሚድ፥ ባ ታማረታ ፄልድ፥ ጰፅሮሳ ሀንቀትድ፥ “ሀ ፃላሄይ፥ ታፐ ሃካ። ኔኒ አስ ዶስያባ ቆፓሳፐ አትሽን፥ ፆሳይ ዶስያባ ቆፓካ” ያግስ።

የሱሳ ካሎይ ጭግስያ ጋተ

(ማቶ 10:38-39፤ 16:24-28፤ ሉቃ 9:23-27፤ 14:26-27)

34ቃስካ የሱሲ ዳሮ አሳነ ባ ታማረታ ባኮ ፄግድ፥ “ታና ካላናዉ ኮይያ ኦንካ ባና ካዶ፤ ባ ማስቃልያ ቶክድ ታና ካሎ።#ማቶ 10:38፤ ሉቃ 14:27. 35ባ ሸምፑዋ አሻናዉ ኮይያ ኡራይ ይሳና። ሽን ታ ግሾነ ዎንገላ ግሾ ባ ሸምፑዋ ይስያ ኡራይ አሻና።#ማቶ 10:39፤ ሉቃ 17:33፤ ዮሀ 12:25. 36እስ አስ ሳአን ደእያ ኡባባ ባዉ ሺሽድ፥ ባ ሸምፑዋ ይስኮ እያ አይ ማዳኔ? 37እስ አስ ባ ሸምፑዋ ዎዛናዉ አይ እማናዉ ዳንዳኢ? 38ፆሳ አማኖና ሀ ኢታ የለተን፥ እስ አስ ታናንነ ታ ቃላን ዬላትኮ፥ አሳ ናአይ፥ ቃስ ባ አዋ ቦንቾን ጌሻ ኪታንቾታራ ያ ዎደ እያን ዬላታና” ያግስ።

Currently Selected:

ማርቆሳ 8: GFBEVF

Highlight

Copy

Compare