ማርቆሳ 5

ቱና አያን ኦይክዳ ኡራ

(ማቶ 8:28-34፤ ሉቃ 8:26-39)

1የሱስነ እያ ታማረት አባ ፕንድ፥ ገርገሶነ ቢታ ጋክዶሶና። 2የሱሲ ዎጎሉዋፐ ዎያ ዎደ ቱና አያናይ ኦይክዳ እስ ኡራይ ዱፎፐ ከይድ እያራ ጋሄትስ። 3ሄ ኡራይ አቅ ፔእድ ደኤይ ዱፎና። እያ ኦንካ ሳንላታን ቃቻናዉ ዳንዳኤና። 4እ ዳሮ ቶሆ ዱንነ ሳንላታን ቃሸትድ ደኤስ። ሽን ሳንላታ ዱሰረስ፥ ዱ መንረስ። እያ ተቃናዉ ዳንዳእያ ኦንካ ባዋ። 5እ ቃማነ ጋላስ ሄ ዱፉዋንነ ደረ ቦላ ዋሴስ፥ ባ አሳተ ሹቻን ጋሬስ።

6የሱሳ ሃሆን በእዳ ዎደ ዎፅ ብድ እያ ስንን ጉልባትስ። 7ሄ ኡራይ ባ ቃላ ቁ ኦድ፥ “ኡባፈ ቦላ ፆሳ ናአዉ የሱሳ፥ ነናነ ታና አይበ ጋይ? ታና ይሶና መላ ታኒ ነና ፆሳ ሱንን ዎሳይስ” ያግስ። 8እ ሄሳ ግዳይ የሱሲ እያ፥ “ላ ሀ ቱና አያናዉ፥ ሀ አድያፈ ከያ” ያግዳ ግሾሳ።

9የሱሲ እያኮ፥ “ነ ሱንይ ኦኔ?” ያግድ ኦይችስ።

እ፥ “ኑኒ ዳሮ ግድያ ግሾ፥ ታ ሱንይ ሌግዮና” ያግስ። 10ቱና አያናት ባንታና ሄ ቢታፈ ከስ የዶና መላ የሱሳ ምንድ ዎስዶሶና።

11ሄ ደርያ ቦላ ዳሮ ጉዱን ዉደይ ሄመቴስ። 12ቱና አያናት የሱሳኮ፥ “ኑና ህን ጉዱን ዉድያኮ የዳርክ፥ ኤንታን ብድ ገሎስ” ያግድ ዎስዶሶና። 13የሱሲ ኤንታኮ፥ “ቢተ” ያግስ። ያትን ቱና አያናት አድያፈ ከይድ ጉዱንታን ገልዶሶና። ናምኡ ሙኩሉ ግድያ ጉዱን ዉደይ አፎ ዶናራ ድርግድ ብድ አባን ገልድ ምተትዶሶና።

14ጉዱን ዉድያ ሄመይሳት ባቃት ብድ ሀንዳባ ካታማንነ ጋፃርያን ኦድዶሶና። ያትን አሳይ ሀንዳባ በአናዉ ከይዶሶና። 15አሳይ የሱሳኮ ያ ዎደ ቱና አያናን ኦይከትዳ ኡራ በእዶሶና። እ ባ ዎዛናኮ ስሚድ፥ ማኦ ማእድ፥ ያን ኡትዳይሳ በእዳ ዎደ ኡባይ ያይዶሶና። 16ሄሳ በእዳ አሳት ቱና አያናት ኦይክዳ ኡራ ቦላነ ጉዱንታ ቦላ ሀንዳባ ኡባ አሳስ ኦድዶሶና። 17ሄሳ ግሾ፥ አሳይ ባንታ ቢታፈ የሱሲ ባና መላ ዎስዶሶና።

18የሱሲ ዎጎሉዋን ገልያ ዎደ ካሰ ቱና አያናይ ኦይክድ የድዳ ኡራይ፥ የሱሳ ካላናዉ እያ ዎስስ። 19ሽን የሱሲ እፅድ እያኮ፥ “ነ ሶ ስማዳ፥ ጎዳይ ነዉ አይ መላ ግታባ ኦዳኮነ ነዉ አይ መላ ኬህዳኮ ነ ሶ አሳስ ኦዳ” ያግስ። 20ኡራይ ብድ ታሙ ካታማ ጌተትያ በሳን ዩይድ፥ የሱሲ ባዉ አይ መላ ግታባ ኦዳኮ ኦድስ። እ ኦድዳይሳ ስእዳ አሳ ኡባይ ማላለትዶሶና።

ሀይቅዳ ናእዉነ ሀርገትያ ማጫስዉ

(ማቶ 9:18-26፤ ሉቃ 8:40-56)

21የሱሲ ስሚድ፥ ዎጎሉዋን ገልድ፥ አባ ፕንዳፐ ጉየ ዳሮ አሳይ አባ ጋፃን እያ ዩሹዋን ሺቅዶሶና። 22እያሮሳ ጌተትያ አይሁደ ዎሳ ኬ ሀላቃታፐ እሶይ፥ የሱሳ በእዳ ዎደ እያኮ ይድ እያ ቶሁዋ ቦላ 23ኩንድድ፥ “ታ ናእያ ሀርጋዳ ሀይቃና ሀናዉሱ። እያ ፓፃዳ ደአና መላ ያዳ ነ ኩሽያ እ ቦላ ዎርክ” ያግድ የሱሳ ምንድ ዎስስ።

24የሱሲ እያሮሳራ ብስ። እ ብሽን ዳሮ አሳይ እያ ካልድ ኡንኤዶሶና።

25ታማነ ናምኡ ላይ እፔ ሱ ሂያ እስ ማጫስያ ደአዉሱ። 26ዳሮ አክመት እዮ አክምዶሶና፥ ሽን እያ ፓፃ ካኤታሱ። እያ ባ ሚሽያ ኡባ ዉርስንካ እዉ ሃ ኢትስፐ አትሽን፥ አይኮካ ማድቤና። 27ሄ ማጫስያ የሱሳባ ስአዳ፥ አሳ ካንዳ የሱሳ ጉየራ ያዳ እያ ማኡዋ ቦቻሱ። 28እያ፥ “ታኒ ሀር አቶሽን እያ ማኡዋ ቦችያኮ ፓፃና” ጋዳ ቆፓሱ።

29ኢፐ ጎግያ ሱይ ኢራካ ኤቅ አግስ። እያ ባ ዋያፐ ፓፅዳይሳ ባ አሳተን ኤራሱ። 30የሱሲ ባፐ ዎልቅ ከይዳይሳ ባ ሁጰን ኤርድ፥ ኤለስድ ዳሮ አሳ ግዶን ጉየ ስሚድ፥ “ታ ማኡዋ ቦችዳይ ኦኔ?” ያግስ።

31እያ ታማረት፥ “አሳይ ነና ሱገይሳ በአሸ፥ ‘ዎይጋዳ ታና ኦነ ቦችዳይ ያጋይ?’ ” ያግዶሶና።

32የሱሲ ሄሳ ኦን ኦዳኮ በአናዉ ዩሽ አ ፄልስ። 33ሽን ማጫስያ ባዉ ሀንዳባ ኤራዳ፥ ያሻን ኮኮራሸ ያዳ የሱሳ ስንን ጉፋናሱ፤ ቃስ ሀንዳባ ኡባ ቱማ እያዉ ኦዳሱ። 34ያንን፥ የሱሲ ኢኮ፥ “ታ ናተ፥ ነና ነ አማኖይ ፓስ፥ ሳሮን ባ፥ ነ ዋያፐካ ፓፃ” ያግስ።

35የሱሲ ቡሮ ሄሳ ኦድሽን፥ አይሁደ ዎሳ ኬ ሀላቃ ሶፐ ኪተትዳ አሳት ይድ፥ “ነ ናእያ ሀይቃሱ፥ አስታማርያ አይስ ዳቡርሳይ?” ያግዶሶና።

36ሽን የሱሲ ኤንቲ ገይሳ ስእድ፥ አይሁደ ዎሳ ኬ ሀላቃኮ፥ “አማኖ ፃላላ አማናፐ አትሽን፥ ባቦፋ” ያግስ። 37የሱሲ ጰፅሮሳፐ፥ ያይቆባፐነ ያይቆባ እሻ ዮሃንሳፐ ሀር ኦንካ ባና ካሎና መላ ድግስ። 38ኤንቲ አይሁደ ዎሳ ኬ ሀላቃ ሶ ጋክያ ዎደ የሱሲ አሳይ ካሀ ይድ ዬከይሳነ ዘሌለይሳ በእስ። 39ገልድ አሳኮ፥ “አይስ ካሀ ይድ ዬከቲ? ናእያ ስካሱፐ አትሽን፥ ሀይቃቡኩ” ያግስ።

40አሳይ እያ ቦላ ሚጭስ። ሽን አሳ ኡባ ካረ ከስድ፥ ናኤ አዋ፥ አይዉነ ሄ ታማረታ ባራ ኤክድ ናእያ ደእያሱዋ ገልስ። 41የሱሲ ናኤ ኩሽያ ኦይክድ፥ “ፃልታ፥ ቁም” (ጉ ናተ፥ ነና ጋይስ ደንዳ) ያግስ።

42ናእያ ኤለሳ ደንዳ ኤቃዳ ሄመታሱ። እያ ታማነ ናምኡ ላይ ናአ። ሄሳን አሳይ ዳሮ ማላለትዶሶና። 43የሱሲ ሄሳ ኤንቲ ኦደስካ ኦዶና መላ ኤንታ ምን ኪትስ። ኤንቲ እዉ ምያባ እማና መላ ኦድስ።

Currently Selected:

ማርቆሳ 5: GFBEVF

Highlight

Copy

Compare