ማርቆሳ 1

ፃማቅያ ዮሃንስ ኦገ ፕተ

(ማቶ 3:1-12፤ ሉቃ 3:1-18፤ ዮሀ 1:19-28)

1ሀይስ ፆሳ ናአ የሱስ ክርስቶሳ ዎንገላ ዶመ። 2ናብያ እሳያስ ፃፍዳ ማፃፋን ፆሳይ፥

“ሄኮ፥ ታኒ ታ ኪታንቹዋ

ታኒ ኔፐ ስን የዳና።

እ ነ ኦግያ ጊግሳና።#ምልክ 3:1.

3እሶይ መላ ቢታን ባ ቃላ ቁ ኦድ፥

‘ጎዳ ኦግያ ጊግስተ፤

እ ሄመታና ሆሮጋ

እያዉ ሱርስተ ግስ’ ”

ያጌስ።#እሳ 40:3.

4ፃማቅያ ዮሃንስ አሳ ፃማቅሸ፥ “ህንተ ናጋራፐ ስሚድ ፃማቀትተ፤ ፆሳይ ህንተ ናጋራ አቶ ጋና” ያግድ ቃላ ኦድሸ መላ ቢታፈ ይስ። 5ይሁዳ ቢታን ደእያ አሳ ኡባይነ የሩሳላመ ካታማ አሳ ኡባይ ዮሃንሳኮ ዮሶና። ባንታ ናጋራ ፓፅን፥ ዮሃንስ ኤንታ ዮርዳኖሰ ሻፋን ፃማቄስ።

6ዮሃንስ ግማለ እክሰፐ ዳደትዳ አፍላ ማኤስ። ባ ፄሳን ዳፎ ዳንጬስ፤ ቃስ ቦለነ ደገራ ኤስ ሜስ።#2 ካዎ 1:8. 7ዮሃንስ ቃላ ኦድሸ፥ “ታፐ ጉየራ ዳሮ ምነይስ ዬስ። ሀር አቶሽን፥ ታኒ እያ ጫማ ዎዶሩዋ ሆካዳ ብላናዉ በስከ። 8ታኒ ህንተና ሃን ፃማቃይስ፥ ሽን እ ህንተና ጌሻ አያናን ፃማቃና” ያግስ።

የሱሳ ፃማቀተነ ፓጨተ

(ማቶ 3:13-17፤ 4:1-11፤ ሉቃ 3:21-22፤ 4:1-13)

9የሱሲ ሄ ዎደ ጋልላ ቢታን ደእያ ናዝረተ ካታማፐ ይን፥ ዮሃንስ ዮርዳኖሰ ሻፋን እያ ፃማቅስ። 10የሱሲ ሃፈ ከይያ ዎደ ሳሎይ ዶየትን፥ ጌሻ አያናይ ባ ቦላ ሆለዳ ዎሽን በእስ። 11ቃስ ሳሎፐ፥ “ታኒ ዶስያ ታ ናአይ ነና፤ ታ ነናን ኡፋይታይስ” ግያ ቃላይ ይስ።#መ 22:2፤ ማዝ 2:7፤ እሳ 42:1፤ ማቶ 3:17፤ 12:18፤ ማር 9:7፤ ሉቃ 3:22.

12ኢራ ጌሻ አያናይ የሱሳ መላ ቢታ ኤፍስ። 13የሱሲ መላ ቢታን ፃላሄን ፓጨትሸ ኦይታሙ ጋላስ ጋምእስ። ዶአታራ ደእስ፥ ሽን ኪታንቾት ይድ እያ ማድዶሶና።

የሱሲ ፄግዳ ኮይሮ ታማረታ

(ማቶ 4:12-22፤ ሉቃ 4:14-15፤ 5:1-11)

14ዮሃንስ ቃሸትዳፐ ጉየ፥ የሱሲ ፆሳ ካዎተ ዎንገላ ኦድሸ ጋልላ ቢታ ብስ። 15ያን፥ “ዎደይ ጋክስ፤ ፆሳ ካዎተይ ማታትስ። ህንተ ናጋራፐ ስሚድ፥ ዎንገላን አማንተ” ያግስ።#ማቶ 3:2.

16የሱሲ ጋልላ አባ ማታራ አሸ፥ ሞሎ ኦይክያ፥ ስሞናነ እያ እሻ እንድርያሳ፥ ባንታ ግትያ አባን የገይሳታ በእስ። 17ኤንታኮ፥ “ታና ካልተ፤ ታኒ ህንተና አሰ ኦይ ታማርሳና” ያግስ። 18ኤንቲ ኤለስድ ባንታ ግትያ የግ አግድ የሱሳ ካልዶሶና።

19የሱሲ ጉ ስን ብድ፥ ናምኡ እሻታ ዛብድዮሳ ናይታ፥ ያይቆባነ ዮሃንሳ ዎጎሉዋ ግዶን ባንታ ግትያ ጊግሰይሳታ በእስ። 20እ ኤንታ በእዳ መላ ፄግስ። ኤንቲ ባንታ አዋ ዛብድዮሳ፥ እያ ኦሳንቾታራ ዎጎሉዋ ግዶን የግ አግድ የሱሳ ካልድ ብዶሶና።

ቱና አያን ኦይክዳ ኡራ

(ሉቃ 4:31-37)

21ኤንቲ ቅፍርናሆማ ካታማ ገልዶሶና። ሳምባት ገልዳ መላ የሱሲ ኤለስድ አይሁደ ዎሳ ኬ ገልድ ታማርሶ ኦይክስ። 22ማታራ ደእያ አሳዳ ታማርሰስፐ አትሽን፥ ህገ አስታማረታ ታማርሶና ግሾ፥ አሳይ እያ ትምርትያን ማላለትዶሶና።#ማቶ 7:28.

23ሄ ዎደ ቱና አያናይ ኦይክዳ እስ ኡራይ አይሁደ ዎሳ ኬ ገልድ ባ ቃላ ቁ ኦድ፥ 24“ናዝረተ የሱሳ፥ ኔኒ ኑፐ አይ ኮያይ? ኑና ይሳናዉ ያዲ? ኔኒ ኦነኮ ታ ኤራይስ፤ ኔኒ ፆሳ ጌሻ ግድኪ?” ያግስ።

25የሱሲ ሄ ቱና አያና፥ “ሀይዛ፥ ሀ አድያፈ ከያ” ግድ ኪትስ።

26ቱና አያናይ ኡራ ዳፈረድ፥ ዋስድ እያፐ ከይስ። 27አሳ ኡባይ ማላለትድ፥ “ሀይስ አይቤ? ሀ ኡራይ ባ ማታን ሀር አቶሽን ቱና አያናታካ ኪቴስ። ኤንቲ እያዉ ኪተቶሶና፤ ሀይስ አይብ ኦራ ትምርቴ?” ግድ፥ ባንታ ግዶን እሶይ እሱዋ ኦይችዶሶና።

28የሱሳ ሱንይ ኤለስድ ጋልላ ቢታን ደእያ ሄራ ኡባን ከይስ።

ዳሮ ሀርጋንቾት ፓፅዶሶና

(ማቶ 8:14-17፤ ሉቃ 4:38-41)

29የሱሲ አይሁደ ዎሳ ኬፈ ከይድ፥ ያይቆባራነ ዮሃንሳራ ስሞና ሶነ እንድርያሳ ሶ ብስ። 30ስሞና ማቸ አይያ ቆፆ ምሻ ሀርጋዳ ዝንእዳሮ የሱሲ ያ ጋክያ ዎደ እያዉ ኦድዶሶና። 31እ ኢኮ ሺቅድ፥ እ ኩሽያ ኦይክድ፥ እዮ ደንድ ኤስስ። ቆፆይነ ምሻይ አግን እያ ኤንታ ሞካሱ።

32ሀርግዳ አሳ ኡባነ ቱና አያናት ኦይክዳ አሳ ኡባ ኦማርስ አዋይ ዉልዳፐ ጉየ፥ እያኮ ኤህዶሶና። 33ካታማን ደእያ አሳ ኡባይ ሄ ኬ ካረ ሺቅዶሶና። 34የሱሲ ዱማ ዱማ ሀርገን ኦይከትዳ ዳሮ አሳ ፓድ፥ ዳሮ ቱና አያናታ ከስስ። እ ኦነኮ ቱና አያናት ኤርዳ ግሾ፥ ኤንታ ኦድሶና ድግስ።

የሱሲ ጋልላን ታማርሶ ዶመ

(ሉቃ 4:42-44)

35የሱሲ ዎንታ ጉራ ደንድድ፥ አስ ባይና በሲ ብድ፥ ያን ፆሳ ዎስስ። 36ስሞንነ እያራ ደኤይሳት እያ ኮይሸ ብዶሶና። 37ኤንቲ እያ ደምድ፥ “አሳ ኡባይ ነና ኮዬስ” ያግዶሶና።

38የሱሲ ቃስ ኤንታ፥ “ሄ ሄራን ደእያ ሀራ ካታማታ የተ። ታኒ ይዳይ ዎንገላ ኦዳናዉ ግድያ ግሾ ያንካ ቃላ ኦዳናዉ በሴስ” ያግስ። 39አይሁደ ዎሳ ኬታን ቃላ ኦድሸነ ቱና አያናታ ከስሸ፥ ጋልላ ቢታ ኡባን ዩይስ።#ማቶ 4:23፤ 9:35.

ባሮ ሀርጋንቹዋ

(ማቶ 8:1-4፤ ሉቃ 5:12-17)

40ባሮይ ኦይክዳ እስ ኡራይ የሱሳኮ ይድ፥ እያ ስንን ጉልባትድ፥ “ኔኒ ኮይኮ ታና ጌሻናዉ ዳንዳኣሳ” ያግድ ዎስስ።

41የሱሲ እያዉ ቃትድ፥ ባ ኩሽያ የድድ እያ ቦችድ፥ “ታኒ ኮያይስ፥ ጌይያ” ያግስ። 42ኤለስድ ባሮይ ኡራ የድን ኡራይ ፓፅስ። 43የሱሲ ኡራ ምን ናግስድ ከስ የድስ። 44የሱሲ እያ፥ “ነና ኤራ፥ ሀይሳ ኦደስካ ኦዶፓ። ሽን ባዳ ነ አሳተ ካህነ በሳ። ኔኒ ሀእ ጌሽ ግድዳይሳ አሳ ኤርሳናዉ፥ ሙሰይ ኪትዳ ያርሹዋ ያርሻ” ያግስ።#ሌወ 14:1.

45ሽን ኡራይ ብድ፥ ጉታ ኡባን አሳ ኡባስ ኦድስ። ሄሳ ግሾ፥ የሱሲ ቆንጨ ከይድ፥ ካታማ ገላናዉ ዳንዳእቤና። ሽን አስ ባይና በሳን ጋፃን ደእስ፤ ቃስ አሳይ ኡባ በሳፈ እያኮ ዮሶና።

Currently Selected:

ማርቆሳ 1: GFBEVF

Highlight

Copy

Compare