ማቶሳ 26
26
የሱሳ ቦላ ማቀትዶሶና
(ማር 14:1-2፤ ሉቃ 22:1-2፤ ዮሀ 11:45-53)
1የሱሲ ሀ ትምርትያ ኡባ ዉርስዳ ዎደ ባ ታማረታኮ፥ 2“ናምኡ ጋላሳፐ ጉየ፥ ፓስካ ባኣለ ቦንችያ ጋላስ ግደይሳ ኤሬታ። ሄ ጋላስ አሳ ናእ ማስቃለ ቦላ ካቀታናዉ አሳ ኩሸን አድ እመታና” ያግስ።#ከሳ 12:1.
3ሄ ዎደ ካህነ ሀላቃትነ ጭማት፥ ቃያፋ ጌተትያ ካህነ ሀላቃ ኬን ሺቅድ፥ 4አስ ኤሮና የሱሳ ኦይክድ፥ ዎናዉ ማቀትዶሶና። 5ሽን ኤንቲ፥ “አሳይ ኦሽ ከሶና መላ ግድ፥ ፓስካ ቦንችያ ጋላስ ሄሳ ኦኮ” ያግዶሶና።
የሱሳ ሽቶ ትይዳ ማጫስዉ
(ማር 14:3-9፤ ዮሀ 12:1-8)
6የሱሲ ብታነ ካታማን ባሮ ሀርግዳ ስሞና ሶን ደኤስ። 7የሱሲ እማቱዋ ቦላ ደእሽን እስ ማጫስያ አልባስፅሮሳ ብልቃፀ ኩመ ዳሮ አልኦ ሽቶ ኤካ ያዳ የሱሳ ሁጰን ትጋሱ።#ሉቃ 7:37. 8ሽን የሱሳ ታማረት ሄሳ በእድ ሀንቀትድ፥ “ሀ ሽቶይ ጮ ኢተይ አይብሴ? 9ሀ ሽቶይ አልኦ ጋተን ባይዘትድ፥ ሚሸይ ማንቆታስ እመታናዉ ዳንዳኤቴስ” ያግዶሶና።
10የሱሲ ኤንቲ ገይሳ ኤርድ፥ ኤንታኮ፥ “ሀ ማጫስዉ አይስ ዋይሰቲ? እያ ታዉ ሎኦባ ኦሱ። 11ማንቆት ኡባ ዎደ ህንተራ ዳና። ሽን ታኒ ህንተራ ኡባ ዎደ ደእከ።#ዛረ 15:11. 12እያ ሀ ሽቱዋ ታ ቦላ ትግዳይስ ታና ሞጋናዉ ጊግሳናሳ። 13ታኒ ህንተዉ ቱማ ኦዳይስ፤ ቢታ ኡባን ሀ ዎንገላይ ሳባከትያ በሳን አዉንካ፥ አሳይ እዮ ሀሳያና መላ እያ ኦዳይስ ኦደታና” ያግስ።
ይሁድ የሱሳ አድ እሙዋ
(ማር 14:10-11፤ ሉቃ 22:3-6)
14ሄ ዎደ ታማነ ናምኡ የሱሳ ታማረታፐ እሶይ፥ አስቆሮታ ይሁዳ ጌተተይስ ካህነ ሀላቃታኮ፥ 15ብድ፥ “ታኒ ህንተዉ የሱሳ አ እምኮ፥ ህንተ ታዉ አይ እማኔ?” ያግድ ኤንታ ኦይችስ።#ዛካ 11:12. ኤንቲ ዞረትድ ሀስታሙ ብራ ሳንትመ#26:15 ብራ ሳንትመ፦ አይኮይካ ጉዠትቦና ጌሻ ብራ ሳንትመ ጉሱ።#26:15 ሀስታሙ ብራ ሳንትመ፦ ሀስታሙ ብራ ሳንትመይ እስራኤለ ቢታን አይለይ ሻመትያነ ባይዘትያ ጋተ። እምዶሶና። 16ሄሳፈ ጉየ፥ ይሁድ የሱሳ አድ እማናዉ እንጀትያ ዎደ ዎቼስ።
ጎዳ ካሁዋ
(ማር 14:22-26፤ ሉቃ 22:15-20፤ 2 ቆሮ 11:23-25)
17ኡይ ባኣለ ቦንችያ ኮይሮ ጋላስ፥ የሱሳ ታማረት እያኮ ይድ፥ “ፓስካ ቦንችያ ጋላስ ኔኒ ማና ካ ኑኒ አዉን ጊግስኖ?” ያግዶሶና።
18የሱሲ ኤንታኮ፥ “ካታማን ደእያ አድያኮ ብድ፥ ‘አስታማረይ፥ ታዉ ዎደይ ጋክዳ ግሾ፥ ታ ታማረታራ ፓስካ ቦንችያ ጋላሳ ነ ሶን አና ያጌስ’ ያግተ” ያግስ።
19እያ ታማረት የሱሲ ባንታና ኪትዳይሳዳ ኦድ፥ ፓስካ ባኣለ ጋላስ ማና ካ ጊግስዶሶና።
20ሳአይ ኦማርስያ ዎደ፥ የሱሲ ታማነ ናምኡ ሀዋረታራ ካ ማናዉ ኡትስ። 21ኤንቲ ምሽን፥ የሱሲ ኤንታኮ፥ “ታኒ ህንተዉ ቱማ ኦዳይስ፤ ህንተፈ እስ ኡራይ ታና አድ እማና” ያግስ።
22ኤንቲ ዳሮ ዳጋምድ፥ እሶይ እሶይ፥ “ጎዳዉ፥ ቱማ ታነሻ?” ግድ እያ ኦይችዶሶና።
23የሱሲ ዛሪድ፥ “ባ ኩሽያ ታራ እስፈ ሻትያን የደይስ እ ታና አድ እማና።#ማዝ 41:9. 24አሳ ናአይ፥ ፆሳ ቃላን እያዉ ፃፈትዳይሳዳ ሀይቃና። ሽን አሳ ናኣ አድ እምያ ኡራ አየ! ሄ ኡራይ የለቶና አትዳኮ እያዉ ሎኦሽን” ያግስ።
25እያ አድ እማናዉ ደእያ ይሁድ ዛሪድ፥ “አስታማርያዉ፥ ኔኒ ገይ ታነዬ?” ያግስ።
የሱሲ ዛሪድ፥ “ኔኒ ነ ሁጰን ጋዳሳ” ያግስ።
26ኤንቲ ምሽን፥ የሱሲ ኡይ ኤክድ ፆሳ ጋላትስ። ሄ ኡይ መንድ ባ ታማረታስ እምድ፥ “ሄእተ፥ ሚተ፥ ሀይስ ታ አሹዋ” ያግስ።
27ፁኣ ኤክድ፥ ፆሳ ጋላትስ። ኤንታዉ እምድ፥ “ኡባይ ሀይሳፈ ኡይተ። 28ሀይስ ዳሮ አሳ ናጋራ አቶተስ መላ ጉክያ ታ ሱ። ሀ ሱይ ፆሳይ ህንተራ ገልያ ጫቁዋ ምንይሳ።#ከሳ 24:8፤ ኤርም 31:31. 29ሽን ታኒ ህንተዉ ኦዳይስ፤ ታኒ ታ አዋ ካዎተን ኦራ ዎይነ ኡሻ ህንተራ ኡያና ጋላሳ ጋካናዉ ናምአን ሀ ዎይነ ኡሻ ኡይከ” ያግስ።
30ጋላታ ማዝሙረ የፅዳፐ ጉየ፥ ሻማሆ ዙማ ብዶሶና።
ጰፅሮስ የሱሳ ካዳናይስ ኦደትስ
(ማር 14:27-31፤ ሉቃ 22:31-34፤ ዮሀ 13:36-38)
31ሄ ዎደ የሱሲ ኤንታኮ፥
“ ‘ፆሳይ ሄንንቹዋ ሾጫና
ዶርሳትካ ላለታና’
ጌተትድ ፆሳ ቃላን ፃፈትዳይሳ መላ ሀች ቃማ ህንተ ኡባይ ታና አግድ ባቃታና።#ዛካ 13:7. 32ሽን ታኒ ሀይቆፐ ደንድዳፐ ጉየ ህንተፈ ስንታዳ ጋልላ ባና” ያግስ።#ማቶ 28:16.
33ጰፅሮስ ዛሪድ፥ “ኤንቲ ኡባይ ነና አግድ ባቃትኮካ፥ ታኒ ነና አግከ” ያግስ።
34የሱሲ ጰፅሮሳኮ፥ “ታኒ ነዉ ቱማ ኦዳይስ፤ ሀች ቃማ ኩቶይ ዋሳናፐ ስን ኔኒ ታና ሄ ቶሆ ካዳና” ያግስ።
35ጰፅሮስ ዛሪድ፥ “ታኒ ኔራ እስፈ ሀይቆፐ አትሽን፥ ነና ኡባካ ካድከ” ያግስ።
ሀንኮ እያ ታማረት ኡባይካ ሄሳዳ ግዶሶና።
የሱሲ ጌታሳማነን ዎስስ
(ማር 14:32-42፤ ሉቃ 22:39-46)
36ያትድ፥ የሱሲ ባ ታማረታራ ጌታሰማነ ጌተትያ በሳ ብድ፥ ኤንታኮ፥ “ታኒ ህን ባዳ ፆሳ ዎሳሻና፥ ህንተ ሀይሳን ኡትተ” ያግስ። 37ጰፅሮሳነ ዛብድዮሳ ናይታ ናምአታ ባራ ኤክ ብድ ዳሮ አዛኖነ ኡንኤተ ዶምስ። 38ቃስካ ኤንታኮ፥ “ታኒ ሀይቆስ ጋያ ኡንአ ኡንኤታስ። ሀይሳን ታራ ጋምእተነ ምንድ ናግተ” ያግስ።
39ጉ ስን ብድ ቢታን ጉፋንድ፥ “ታ አዋዉ፥ ዳንዳኤትያባ ግድኮ ሀ ዋየ ፁኣ ታፐ ድጋ። ሽን ነ ሸነይ ሀኖፐ አትሽን፥ ታ ሸነይ ሀኖፖ” ያግድ ፆሳ ዎስስ።
40የሱሲ ባ ታማረታኮ ስም ይድ ኤንቲ ስክዳሽን ደምስ። ጰፅሮሳኮ፥ “ህንተ እስ ሳተኮካ ስኮና ታራ ምናናዉ ዳንዳእቤከቲ? 41ፓጨን ህንተ ገሎና መላ ባርክድ ናግተነ ፆሳ ዎስተ። ህንተዉ ሎኦ አሞይ ደኤስ፥ ሽን ህንተ ዳቡራንቾ አስ” ያግስ።
42የሱሲ ቃስ ናምአን ብድ፥ “ታ አዋዉ፥ ታኒ ሀ ዋየ ፁአፐ ኡዮና ደእሸ አናዉ ዳንዳኤቶናባ ግድኮ ነ ሸነይ ሀኖ” ያግድ ፆሳ ዎስስ። 43ቃስካ ስም ያ ዎደ እያ ታማረታ አይፍያ ስኮይ ጎዝን፥ ዝንእዳሽን ደምስ።
44ቃስካ ኤንታ አግድ፥ ብድ ካሰ ቃላ ዛር ሄን ዎስስ። 45ሄሳፈ ጉየ፥ ባ ታማረታኮ ይድ፥ “ሀእ ጋካናዉ ስከትነ ሸምፐቲ? ሄኮ፥ አሳ ናእ፥ ናጋራንቾታ ኩሸን አድ እመትያ ሳተይ ጋክስ። 46ደንድድ የተ፥ ታና አድ እመይስ ሀይስሽ ጋክስ” ያግስ።
የሱሲ ኦይከትስ
(ማር 14:43-50፤ ሉቃ 22:47-53፤ ዮሀ 18:3-12)
47የሱሲ ቡሮ ሄሳ ሃሳይሽን፥ ታማነ ናምኡ ታማረታፐ እሶይ፥ ይሁድ ጋክ ዎስ። ካህነ ሀላቃትነ ደርያ ጭማት ኪትዳ ዳሮ አሳት ማሸነ ፃምአ ኦይክድ እያራ እስፈ ይዶሶና። 48የሱሳ አድ እምያ ይሁድ ሄ ዳሮ አሳኮ፥ “ታኒ ዬረይስ ህንተ ኮየይስ እያ፥ እያ ኦይክተ” ያግድ ማላ እም ዎስ።
49ኢራካ የሱሳኮ ሺቅድ፥ “አስታማርያዉ፥ ሳሮ ደአይ” ያግድ እያ ዬርስ።
50የሱሲ እያኮ፥ “ታ ላግያዉ፥ ኔኒ ኦናባ ኦ አጋ”#26:50 ታ ላግያዉ፥ ኔኒ ኦናባ ኦ አጋ፦ ዎይኮ ሀራ ብርሸይ ታ ላግያዉ፥ ነ ሀይሳን አይ ኦይ? ያግስ።
ሄሳፈ ጉየ፥ ሺቅድ፥ የሱሳ ኦይክዶሶና። 51የሱሳራ ደኤይሳታፐ እሶይ ባ ማሻ ሾድድ ካህነ ሀላቃ አይልያ ሾጭድ፥ እያ ሀይ ቃንፅድ የግስ። 52ሽን የሱሲ፥ “ነ ማሻ ጉየ ሾሁዋን ዛራ። አይስ ጊኮ፥ ማሻ ሾድያ ኡባይ ማሻን ሀይቃና። 53ታ፥ ታ አዋ ዎስያኮ ዳሮ ሙኩሉን ታይበትያ ኪታንቾታ የዳናዉ ዳንዳኦናባ ነዉ ዳኒ? 54ያትን፥ ፆሳ ቃላን ሄሳዳ ሀናናዉ በሴስ ጌተትዳይስ ዋንድ ፖለታኔ?” ያግስ።
55ሄ ሳትያን፥ የሱሲ ሄ ሺቅዳ ዳሮ አሳኮ፥ “ታና ፓንጋ ኦድ ኦይካናዉ ማሻነ ፃምአ ኦይክድ ይደቲ? ታኒ ፆሳ ኬን ጋላስ ጋላስ ታማርሳሸ ህንተራ ደእያ ዎደ ታና ኦይክቤከታ።#ሉቃ 19:47፤ 21:37. 56ሽን ሀይስ ኡባይ ሀንዳይስ ናበት ፆሳ ቃላን ፃፍዳይስ ፖለታና መላሳ” ያግስ።
ሄ ዎደ እያ ታማረት ኡባይ እያ አግድ ባቃትዶሶና።
የሱሲ ፕርዳ ሻንጎ ስንን
(ማር 14:53-65፤ ሉቃ 22:54-55፥ 63-71፤ ዮሀ 18:13-14፥ 19-24)
57የሱሳ ኦይክዳይሳት ካህነ ሀላቃ ቃያፋኮ እያ ኤፍዶሶና። ያን ህገ አስታማረትነ ቢታ ጭማት ሺቅድ ደኦሶና። 58ሽን ጰፅሮስ ካህነ ሀላቃ ዛባ ጋካናዉ ሃሆን እያ ካልስ። እያ ዉርሰይ ሻከታና ጋካናዉ ዛባ ገልድ ናገይሳታራ ኡትስ።
59ካህነ ሀላቃትነ ሺቅዳ አሳ ኡባይ የሱሳ ዎናዉ እያ ቦላ ዎርዶ ማርካ ኮይዶሶና። 60ዳሮት ይድ እያ ቦላ ዎርዶ ማርካ ማርካትዶሶና፥ ሽን አይኮካ ደምቦኮና። ጉየፐ ናምኡ አሳት ይድ፥ 61“ሀ ኡራይ፥ ‘ታኒ ፆሳ ኬ ላላዳ ሄ ጋላሳን ዛራ ኬፃናዉ ዳንዳአይስ’ ያግስ” ያግዶሶና።#ዮሀ 2:19.
62ካህነታ ሀላቃይ ደንድ ኤቅድ የሱሳኮ፥ “ሀይሳቲ ነና ሞትያ ሞቱዋስ ኔኒ ዛርያባይ ባዌ?” ያግስ። 63ሽን የሱሲ ስእ ግስ። ቃስካ ካህነ ሀላቃይ፥ “ታኒ ነና ደኦ ፆሳ ሱንን ኦይካይስ፤ ኔኒ ፆሳ ናኣ ክርስቶሳ ግድኮ ኑስ ኦዳ” ያግስ።
64የሱሲ ዛሪድ፥ “ኔኒ ነ ሁጰንካ ጋዳሳ። ሽን ታኒ ህንተዉ ኦዳይስ፤ ህዛፐ ጉየ፥ አሳ ናአይ ዎልቃማ ፆሳ ኡሻቻ ባጋን ኡትዳሽን፥ ቃስ ሳሎ ሻራራ ይሽን ህንተ በአና” ያግስ።#ዳነ 7:13.
65ሄ ዎደ ካህነ ሀላቃይ ዳሮ ይሎትድ ባ ማኡዋ ፔድ፥ “ሀይሳ በእተ ፆሳ ጫይስ! ኑና ሀራ ማርካ አይ ኮሺ? እ ሀእ ጫይዳይሳ ህንተ ስእደታ።#ሌወ 24:15-16. 66ህንተ ቆፋይ አይቤ?” ያግስ።
ኤንትካ፥ “እያዉ ሀይቆ በሴስ” ያግድ ዛርዶሶና።
67ያትን፥ ኤንቲ እያ ሶምኦን ጩትድ ደችዶሶና። ሀራት እያ ባቅድ፥#እሳ 50:6. 68“ክርስቶሳ! ነና ደችዳይ ኦኔ? አነ ኑስ ኦዳ” ያግዶሶና።
ጰፅሮስ የሱሳ ካድስ
(ማር 14:66-72፤ ሉቃ 22:56-62፤ ዮሀ 18:15-18፥ 25-27)
69ጰፅሮስ ዛባን ኡትዳሽን፥ እስ አይልያ እያኮ ያዳ፥ “ኔንካ ጋልላ የሱሳራ እስፈ ደኣሳ” ያጋሱ።
70ሽን እ ኤንታ ኡባ ስንን ሄ አይለኮ፥ “ኔኒ ግያባይ አይበኮ ታኒ ኤርከ” ያግድ ካድስ።
71ቃስ ብድ ድርሳ ፐንገኮ ጋክሽን ሀራ አይልያ እያ በአዳ፥ ያን ደእያ አሳኮ፥ “ሀ ኡራይ ናዝረተ የሱሳራ ደኤስ” ያጋሱ።
72ጰፅሮስ ናምአን ጫቅድ፥ “ታኒ ሄ ኡራ ኤርከ!” ያግስ።
73ጉ ጋምእሽን፥ ያን ኤቅዳ አሳት ጰፅሮሳኮ ይድ፥ “ነካ ቱማ ኤንታራ እስፈ ደኣሳ፤ ኔኒ ነ ኦዳን ኤረታሳ” ያግዶሶና።
74ሄሳፈ ጉየ፥ ጰፅሮስ፥ “ታኒ ሄ ኡራ ኤርከ!” ያግድ፥ ባና ባደነ ጫቆ ዶምስ።
ሄ ዎደ ኢራካ ኩቶይ ዋስ አግስ። 75የሱሲ እያኮ፥ “ኔኒ ኩቶይ ዋሳናፐ ስን ታና ሄ ቶሆ ካዳና” ግዳይሳ ጰፅሮስ አኬክድ፥ ካረ ከይድ ኢታ ዬሆ ዬክስ።
Currently Selected:
ማቶሳ 26: GFBEVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
