ማቶሳ 24

ፆሳ ኬይ ላለቶና አተና

(ማር 13:1-2፤ ሉቃ 21:5-6)

1የሱሲ ፆሳ ኬፈ ከይድ ብሽን፥ እያ ታማረት እያኮ ይድ፥ ማላለትድ ፆሳ ኬ ግምብያ በስዶሶና። 2የሱሲ ኤንታኮ ዛሪድ፥ “ኤ! ሀይሳ ኡባ በኤቲ? ታኒ ህንተዉ ቱማ ኦዳይስ፤ ሹች ሹቻ ቦላ ግምበትዳ መላ ላለቶና አተና” ያግስ።

ስንፈ ሀናናባታ

(ማር 13:3-13፤ ሉቃ 21:7-19)

3የሱሲ ሻማሆ ዙማ ቦላ ኡትዳሽን፥ እያ ታማረት ባንታርካ እያኮ ይድ፥ “ሄስ አዉደ ሀናኔኮ ኑስ ኦዳ። ቃስ ነ ዩሳስነ ዎድያ ዉርሰስ ማላታይ አይቤ?” ያግድ ኦይችዶሶና።

4የሱሲ ዛሪድ፥ “ህንተና ኦንካ ባለና መላ ናገትተ! 5አይስ ጊኮ፥ ዳሮ አሳት ታ ሱንን፥ ‘ታኒ ክርስቶሳ፥ ፆሳይ አሳ አሻናዉ ኪትዳይሳ’ ያግሸ ይድ ዳሮ አሳ ባለና። 6ማታን ደእያ ኦላ ግርሳ፥ ሃሆን ደእያ ኦላ ዎረ ስአናዉ ደኤታ። ሄሳ መላባይ ሀናናዉ በሲያ ግሾ ህርጎፍተ። ሽን ዉርሰይ ቡሮና። 7ደረይ ደርያራ፥ እስ ካዎተይ ሀራ ካዎተራ ኦለታና። ኮሻይነ ቢታ ቃፆይ ኡባ በሳን ሀናና። 8ሄስ ኡባይ የሎ እቀስ ዞከ መላ።

9“ሄ ዎደ አሳይ ህንተና ዋዬስ አድ እማና፥ ቃቻናነ ዎና። ታ ሱን ግሾ አሳ ኡባይ ህንተና እፃና።#ማቶ 10:22. 10ሄ ዎደ ዳሮት አማኖ አጋና። ባንታ ግዶን እሶይ እሱዋ አድ እማና፥ እሶይ እሱዋ እፃና። 11ቃስ ዳሮ ዎርዶ ናበት ደንድድ ዳሮታ ባለና። 12ጌላተ ዳርያ ግሾ፥ ዳሮ አሳ ሲቆይ እርፃና። 13ሽን ዉርሰ ጋካናዉ ገንጭያ ኡራይ አታና።#ማቶ 10:22. 14አሳ ኡባስ ማርካ ግዳና መላ ፆሳ ካዎተ ዎንገላይ ቢታ ኡባን ኦደታና። ሄሳፈ ጉየ፥ ዉርሰይ ያና።

ቱና ዮ

(ማር 13:14-23፤ ሉቃ 21:20-24)

15“ሄሳ ግሾ፥ ናብያ ዳነል ኦድዳ ዮ ቱናተይ ጌሻ በሳን ኤቅዳይሳ ህንተ በአና።#ዛረ 9:27፤ 11:31፤ 12:11. (አኬክሶ፦ ሄስ ዎይ ጉሰኮ ናባበይስ አኬኮ!) 16ሄ ዎደ ይሁዳ ቢታን ደኤይሳት ደርያኮ ባቃቶ። 17ኬ ሁጰን ደእያ ኡራይ ባ ሶን ደእያባ ኤካናዉ ሶ ገሎና ባቃቶ።#ሉቃ 17:31. 18ጋደን ደኤይስ ባ ማኡዋ ኤካናዉ ጉየ ስሞፎ። 19ሄ ዎደ ቃን ማጫሳታስነ ንያ ማጫሳታስ ዳሮ ኡንአ ግዳና። 20ባልጎን ዎይኮ ሳምባታን ህንተ ባቃቶይ ግዶና መላ ፆሳ ዎስተ። 21አይስ ጊኮ፥ ሳእ መቶሳፐ ሀች ጋካናዉ ሀኖናባይ፥ ቃስ ስንፈካ ኡባራካ ሀኖና ዋየይ ሄ ዎደ ሀናና።#መ 12:1፤ ቆን 7:14. 22ፆሳይ ሄ ጋላሳታ ታይቡዋ ጉናኮ አሰ ግድዳ ኦንካ አተና። ሽን እ ባ ዶርዳ አሳታ ግሾ፥ ሄ ጋላሳታ ታይቡዋ ጉና።

23“ሄ ዎደ ኦንካ ህንተና፥ ‘ሄኮ፥ ክርስቶስ ሀይሳን’ ዎይኮ ‘ህንን ደኤስ’ ያግኮ አማኖፕተ። 24አይስ ጊኮ፥ ዎርዶ ክርስቶሳትነ ዎርዶ ናበት ደንዳና። ኤንታዉ ዳንዳኤትኮ፥ ሀር አቶሽን ፆሳይ ዶርዳይሳታካ ባለናዉ ግታ ማላታታነ ማላልስያባታ ኦና። 25አኬክተ፥ ታኒ ህንተዉ ሀይሳ ካሰታዳ ኦዳስ።

26“ሄሳ ግሾ፥ አሳይ ህንተኮ፥ ‘ሄኮ፥ ክርስቶስ ባዞን ደኤስ’ ጊኮ፥ ያ ቦፕተ። ዎይኮ ህንተኮ፥ ‘ሄኮ፥ ቆልአን ደኤስ’ ጊኮ፥ ኤንታባ አማኖፕተ።#ሉቃ 17:23-24. 27አይስ ጊኮ፥ ዎልአን ሳሎን ዎልአምድ፥ ዶሎሀፐ ዉሎሀ ጋካናዉ በንተይሳዳ፥ አሳ ናኣ ዩሳይ ሄሳዳ ሀናና።

28“ባዉት ደእያሶን አንኮት ሺቃና።#ሉቃ 17:37.

ክርስቶስ ናምአን ያና

(ማር 13:24-27፤ ሉቃ 21:25-28)

29“ሄ ዎደ ሄ ዋየ ጋላሳታፐ ጉየ፥

ኤለስድ አዋይ ማና፥

አጌናይ ባ ፖኡዋ ድጋና።#እሳ 13:10፤ ኤርም 2:10.

ፆልንቶት ሳሎፐ ዎና፥

ቃስ ሳሎን ደእያ ዎልቃት ቡቀታና።

30ሄ ዎደ አሳ ናኣ ዩሳ ማላይ ሳሉዋ ቦላ በንታና። ሳአን ደእያ አስ ኡባይ ዬካና። ቃስ አሳ ናአይ፥ ዎልቃራነ ግታ ቦንቹዋራ ሳሉዋ ሻራ ግዶራ ይሽን ኤንቲ በአና።#ዛረ 7:13፤ ዛካ 12:10. 31እ ባ ኪታንቾታ ግታ ሞይዘ ፑኖራ ኪታና። ኤንቲ ሳኣ ኦይዱ ባጋ ብድ፥ ሀ ጋፃፐ ያ ጋፃ ጋካናዉ ደእያ እያዉ ዶረትዳይሳታ ሺሻና።

ባላሰ ም ሌምሶ

(ማር 13:28-31፤ ሉቃ 21:29-33)

32“ባላሰ ምፈ ታማርተ። እያ አጫዳ ሀይፅያ ዎደ ቶርቸይ ማታትዳይሳ ህንተ ኤሬታ። 33ሄሳዳካ፥ ህንተ ሀ ኡባባ በእያ ዎደ የሱሲ ማትድ ፐንገን ደኤይሳ ኤርተ። 34ታኒ ህንተዉ ቱማ ኦዳይስ፤ ሀ ኡባባይ ፖለታና ጋካናዉ፥ ሀ የለተይ አና። 35ሳሎይነ ሳእ አና፥ ሽን ታ ቃላይ ኡባካ አና።#መ 6:5.

የሱሲ ያና ዎደ ኦንካ ኤረና

(ማር 13:32-37፤ ሉቃ 17:26-30፥ 34-36)

36“ሄ ጋላሳነ ሄ ሳትያ ሳሎን ደእያ ታ አዋፐ አትሽን፥ ሀር ሳሎ ኪታንቾታ ግድን ዎይኮ ናኣ ግድን ኦንካ ኤረና። 37አሳ ናኣ ዩሳይ፥ ኖሄ ዎደ ሀንዳይሳ መላ ግዳና።#መ 6:5. 38ሄ ዎደ ዮ ሃይ ያናፐ ስን ኖሄይ ማርካብያን ገልዳ ጋላሳ ጋካናዉ፥ አሳይ ምሸነ ኡይሸ፥ ኤክሸነ ገልሸ ጋምእስ። 39ዮ ሃይ ይድ፥ ኤንታ ኡባ ይሳና ጋካናዉ አኬክቦኮና። አሳ ናኣ ዩሳይካ ሄሳዳ ሀናና።

40“ሄ ዎደ ናምኡ አሳት ጋደን ኦና። ኤንታፈ እሶይ ኤከታና፥ ሀንኮይ አታና። 41ናምኡ ማጫሳት እስፈ ጋጫና። ኤንታፈ እስንያ ኤከታና ሀንክያ አታና።

42“ህዛ፥ ህንተ ጎዳይ አይ ጋላስ ያነኮ ህንተ ኤሮና ግሾ፥ ምንድ ናግተ። 43ሽን ካይሶይ ቃማፈ አይ ሳተን ያነኮ ጎዳይ ኤርያኮ፥ ባ ኬይ ቦከቶና መላ ባርክድ ናጋናሽን።#ሉቃ 12:39-40. 44ሄሳዳካ፥ አሳ ናአይ ህንተ ቆፖና ሳተን ያና ግሾ፥ ህንተካ ጊግድ ደእተ።

ኢታነ ሎኦ አይለ ሌምሶ

(ሉቃ 12:41-48)

45“ያትን፥ ባ ሶ አሳስ ካ ኮሽያ ዎድያን እማና መላ እያ ጎዳይ ዶርዳ አማንይስነ ዎዛናማ አይለይ ኦኔ? 46እ ባ ጎዳይ ኪትዳይሳ ኦሽን እያ ጎዳይ ይድ ደምያ አይለይ አንጀትዳይሳ። 47ታኒ ህንተዉ ቱማ ኦዳይስ፤ ጎዳይ ሄ አይልያ ባባ ኡባ ቦላ ሹማና። 48ሽን ሄ አይለይ ኢታ ግድኮ፥ ‘ታ ጎዳይ ጋምእድ ያና’ ያግድ ባ ዎዛናን ቆፕድ፥ 49ባ ላገ ኦሳንቾታ ዋ ዶምኮ፥ ማተይሳታራ ሚኮነ ኡይኮ፥ 50ሄ አይልያ ጎዳይ እ ቆፖና ጋላስነ እ ኤሮና ሳተን፥ 51ይድ እያ ቃንፀረና። እያ ቃዳ ጩቦታራ ኦና። ሄ በሳን እያዉ ዬሆነ አቸ ጋርጨ ግዳና።

Currently Selected:

ማቶሳ 24: GFBEVF

Highlight

Copy

Compare