ማቶሳ 17

የሱሳ ማላይ ላመትስ

(ማር 9:2-13፤ ሉቃ 9:28-36)

1ኡሱፑን ጋላሳፐ ጉየ የሱሲ፥ ጰፅሮሳ፥ ያይቆባነ እያ እሻ ዮሃንሳ ባራ ኤክድ ባንታርካ ግዳናዉ ዙማ ቦላ ከይስ።#2 ጰፅ 1:17-18. 2ያን ኤንታ ስንን የሱሳ ማላይ ኩመ ላመትስ፤ እያ ሶምኦይካ አዋዳ ፆልቅስ። እያ ማኦይካ ዳሮ ቦፅስ። 3ሄኮ፥ ሙሰይነ ኤልያስ እያራ ኦደትሽን በእዶሶና። 4ጰፅሮስ የሱሳኮ፥ “ኑኒ ሀይሳ ሀሹ ይዳ። ነ ኮይኮ እስኖ ነዉ፥ እስኖ ሙሰስ፥ እስኖ ኤልያሳስ ሀይሳን ሄ ሻቃራ ሻቃራና” ያግስ። 5ጰፅሮስ ሄሳ ቡሮ ኦድሽን ቦ ሻራይ ኤንታና ካምስ። ሻራ ግዶራ፥ “ታና ኡፋይስያ፥ ታ ዶስያ ናአይ ሀይሳ፥ እያ ስእተ!” ግያ ቃላይ ይስ።#መ 22:2፤ ማዝ 2:7፤ እሳ 42:1፤ ማቶ 3:17፤ 12:18፤ ማር 1:11፤ ሉቃ 3:22፤ ዛረ 18:15. 6የሱሳ ታማረት ሄሳ ስእዳ ዎደ ዳጋምድ ባንታ ሶምኡዋራ ሳአን ኩንድዶሶና። 7ሽን የሱሲ ኤንታኮ ሺቅድ ኤንታ ቦችድ፥ “ደንድተ፥ ያዮፍተ!” ያግስ። 8ኤንቲ ቁ ግድ በእያ ዎደ የሱሳፐ ሀራ ኦናካ በእቦኮና።

9ኤንቲ ዙማ ቦላፈ ዎሽን የሱሲ ኤንታኮ፥ “አሳ ናአይ ሀይቆፐ ደንዳና ጋካናዉ ሀ ህንተ በእዳባ ኦደስካ ኦዶፕተ” ግድ ኪትስ። 10የሱሳ ታማረት፥ “ያትን፥ ህገ አስታማረት ኤልያስ ክርስቶሳፐ ካሰትድ ያና ግዳይ አይብሴ?” ያግድ ኦይችዶሶና።#ምልክ 4:5.

11የሱሲ ዛሪድ፥ “ኤ! ኤልያስ ካሰት ይድ ኡባባ ጊግሳና። 12ሽን ታ ህንተዉ ቱማ ኦዳይስ፤ ኤልያስ ካሰትድ ይስ። ኤንትካ እያ ቦላ ኮይዳባ ኦዶሶናፐ አትሽን፥ እያ ሻክ ኤርቦኮና። ሄሳዳ አሳ ናአይ ኤንታ ኩሸን ዋየታና” ያግስ።#ማቶ 11:14.

13ሄ ዎደ የሱሲ ግዳይ ፃማቅያ ዮሃንሳባ ግደይሳ አኬክዶሶና።

ቱና አያን ኦይክዳ ናአ

(ማር 9:14-29፤ ሉቃ 9:37-43)

14ኤንቲ ደርያፐ አሳኮ ስምያ ዎደ እስ አስ የሱሳ ስንን ጉልባትድ፥ 15“ጎዳዉ፥ ሀያና ታ ናኣስ ቃታርክ፤ እያ ሾጭድ የግያ ሀርገይ ዳሮ ኡንኤድ ታማንነ ሃን የጌስ። 16ነ ታማረታኮ ኤሀስ፥ ሽን ኤንቲ ፓናዉ ዳንዳእቦኮና” ያግስ።

17የሱሲ ዛሪድ፥ “ህንተኖ፥ አማኖና ጌላ የለተዉ አዉደ ጋካናዉ ታ ህንተራ ዳኔ? አዉደ ጋካናዉ ታ ህንተና ዳንዳአኔ? አነ ናኣ ሃ ኤክ ዪተ” ያግስ። 18የሱሲ ቱና አያና ሀንቅን፥ ቱና አያናይ ናኣፐ ከይስ፤ ሄ ሳተንካ ናአይ ፓፅስ። 19ሄሳፈ ጉየ፥ የሱሳ ታማረት ባንታርካ እያኮ ሺቅድ፥ “ኑኒ ቱና አያና ከሳናዉ ዳንዳእቦናይ አይብሴ?” ያግድ ኦይችዶሶና። 20እ ኤንታኮ፥ “ህንተዉ አማኖይ ላፍዳ ግሾሳ። ታ ህንተዉ ቱማ ኦዳይስ፤ ጋሸ አይፈ መላ አማኖይ ህንተዉ ደእኮ ‘ሀ ዙማ ሀይሳፈ ደንዳዳ ገደ አ’ ጊኮ ህንተዉ ኪተታና። ህንተዉ ዳንዳኤቶናባይ ዴና። 21[ሽን ሄሳ መላይ ዎሳፐነ ፆማፐ አትሽን፥ ሀራን ከየና”] ያግስ።#ማቶ 21:21፤ ማር 11:23፤ 2 ቆሮ 13:2.#17:21 እስ እስ በን ማፃፋታን ፓይዶ 21 ዴና።

የሱሲ ባ ሀይቁዋባ ዛሪድ ኦድስ

(ማር 9:30-32፤ ሉቃ 9:43-45)

22የሱሳ ታማረት ጋልላን ሺቅድ ደእሽን የሱሲ ኤንታኮ፥ “አሳ ናእ አሳ ኩሸን አድ እመታና። 23ኤንቲ እያ ዎና፥ ሽን እ ሄን ጋላስ ሀይቆፐ ደንዳና” ያግስ።

እያ ታማረትካ ዳሮ ቂሮትዶሶና።

ፆሳ ኬ ጊራ

24የሱሳራነ እያ ታማረታራ ቅፍርናሆማ ካታማ ጋክዳ ዎደ ፆሳ ኬ ጊራ ቃንፅሰይሳት ጰፅሮሳኮ ይድ፥ “ህንተ አስታማረይ ፆሳ ኬ ጊራ ጊሪ?” ያግድ ኦይችዶሶና።#ከሳ 30:13.

25ጰፅሮስ ዛሪድ፥ “ጊሬስ” ያግስ። ጰፅሮስ ሶ ገልያ ዎደ የሱሲ ካሰትድ፥ “ጰፅሮሳ፥ ነዉ አይ ዳኒ? ሀ ሳኣ ካዎተት ቃራፃነ ጊራ ኦፐ ኤኮና? ጋደ አሳፐየ ዎይኮ አሳ ጋደ አሳፔ?”#17:25 ጋደ አሳፐየ ዎይኮ አሳ ጋደ አሳፔ ሄ ዎደ ካዎተት ባንታ ጋደ አሳፐ ጊራ ኤኮኮና። ያግድ ኦይችስ።

26ጰፅሮስ “አሳ ጋደ አሳፐ” ግድ ዛርስ።

የሱሲ ዛሪድ፥ “ጋደ አሳይ ጊራ ጊሮኮና ጉሱ። 27ሽን ኤንቲ በቶና መላ አባ ባዳ ሞሎ ኦይካናዉ ማንፃቆ የጋ። ኮይሮ ነ ኦይክያ ሞሉዋ ዶና ዶያዳ ጊራስ ግድያ ሚሸ ነ ግሾነ ታ ግሾ ኤፋዳ ጊራ” ያግስ።

Currently Selected:

ማቶሳ 17: GFBEVF

Highlight

Copy

Compare