ከሳ 22

ሻሎ ናጎ ዎጋ

1“እስ አስ ቦር ዎይኮ ዶርሰ ካይስድ ሹክኮ፥ ዎይኮ ባይዝኮ፥ ቦራ ግሾ እቻሹ ቦራታ፥ ዶርሳ ግሾ ኦይዱ ዶርሳታ ጭጎ።

2“ካይሶይ ኬ ቦክሸ ኦይከትድ ሾጨትድ ሀይቅኮ፥ ሾጭ ዎዳይስ ኦይሸተና። 3ሽን ሄስ ሀንዳይ ጋላስ ግድኮ፥ እ ሄ ጉስዳ ሱ አጩዋን ኦይሸቴስ። ካይሶይ ባ ካይስዳይሳ ዛሮ፥ ሽን እያዉ ዛራናባይ ይኮ ባ ሁጰን አይለተስ ባይዘቶ። 4እ ካይስዳ መሄይ ፓፃ ደእሸ እያ ኩሸን በንትኮ፥ ቦር ዎይኮ ሀረ ዎይኮ ዶርሰ ግድኮ፥ እ ካይስዳይሳስ ናምኡ ኩሸ ጭጎ።

5“እስ አስ ባ መህያ ደንባን ዎይኮ ዎይነ ጋደን ሄምሽን፥ መሄይ ሀራ አሳ ካ ሚኮ፥ እ ባ ካፈ ዎይኮ ባ ዎይንያፐ ሎኡዋ አጫ ቃንፆ።

6“እስ አስ ባ ጋደን ታማ ፁግሽን ታማይ ቡርያ ካንድ ሀራ አሳ ጋደን ድጭያ ካነ ዶርያ ሚኮ፥ ታማ ኦይዳ ኡራይ አጮ ቃንፆ።

7“እስ አስ ብራ ዎይኮ ሀራ አልኦ ሚሸ ባ ሾሩዋስ ሀዳራ እምን፥ ሄ ሾሩዋ ሶፐ ካይሶይ ሄ ሚሽያ ኤክኮነ ሄ ካይሶይ ኦይከትኮ፥ ሄ ካይሶይ ሚሽያ ናምኡ ኩሸ ጭጎ። 8ሽን ካይሶይ በንቶና እፅኮ፥ ኡራይ ፆሳ ስን ሺቅድ፥ ባ ሾሩዋ ሚሽያ፥ እ ኤኮናይሳ ኤርሳናዉ ጫቆ።

9“ናምኡ አሳት ቦራ ጋሶን ዎይኮ ሀረ ጋሶን ዎይኮ ዶርሳ ጋሶን ዎይኮ ማኦ ጋሶን ዎይኮ ሀራ ይዳባ ጋሶን ሞተትድ፥ ፆሳ ስን ሺቅኮ፥ ፆሳይ እያ ቦላ ፕርድዳይስ ናምኡ ኩሸ ጭጎ።

10“እስ አስ ሀረ ዎይኮ ቦር ዎይኮ ዶርሰ ዎይኮ ሀራ መሄ ሀዳራ እምዳሱዋን ሀይቅኮ ዎይኮ መእኮ ዎይኮ ኦንካ በኦና ካይሶተትኮ፥ 11ሀዳራ ኤክዳይስ ባ ላግያ መህያ ካይሶቶናይሳ ጎዳ ስንን ጫቆ። ሄ መህያ ጎዳይ ጫቁዋ ኤኮ፤ መሄይ እያፐ ይዳ ኡራይ ጭጋናዉ ኮሸና። 12ሽን መሄይ ካይሶተትዳባ ግድኮ፥ መህያ ጎዳስ ጭጎ። 13ሄ መህያ ዶእ ምዳባ ግድኮ፥ ማርካ ግዳናዳ ጋዉፃ ኤሆ፤ ዶእ ምዳባ ግድኮ እያዉ ጭጎፎ።

14“አስ ባ ሾሩዋፐ መሄ ዎስ ኤክኮ እያ ጎዳይ ባይና በሳን ሄ መሄይ ደሸትኮ ዎይኮ ሀይቅኮ፥ ሄ መህያስ ጭጋ እሞ። 15ሽን እያ ጎዳይ እያራ ደእሽን ሄስ ሀንዳባ ግድኮ አጫ ቃንፆፎ። ሀሸ ኤክዳባ ግድኮ፥ ሄ ሀሸ ሚሸይ አጮ ጋተ ግዶ።

ዱሳ ዎጋታ

16“እስ አስ እስ ጌላእዉ ጭምድ፥ ኢራ ዝንኤትያባ ግድኮ፥ እዉ አጫ እምድ፥ ባዉ ማቾ ኦ። 17እ አዋይ እዮ እያዉ እማናዉ ኮዮና እፅኮ፥ ጌላኦ ኤክያ ኡራይ አጫ እምያ ሚሸ መላ እ አዋስ እምድ አጮ።

18“ብታ ብትያ ማጫስ ሀይቆ።#ዛረ 18:10-11.

19“መሄራ ቱንያ ኦንካ ሀይቆ።#ሌወ 18:23፤ 20:15.

20“ፆሳፈ ሀራ ጎዳታስ ያርሽያ ኦንካ ሀይቆ። 21ህንተ ግብፀ ቢታን በተ አስ ግድድ፥ ደእዳ ግሾ፥ በተ አስ ቆሆፕተ ዎይኮ ኡንኤፍተ። 22አምኤታነ ይኦታ ኡንኤፍተ። 23ህንተ ኤንታ ኡንኤኮ፥ ኤንቲ ታኮ ዋሳና፤ 24ታኒ ኤንታ ዋሱዋ ስአና። ሄ ዎደ ታ ህንተ ቦላ ሀንቀታዳ ህንተና ኦላን ዉርሳና። ህንተ ማቸት አምኦ፥ ህንተ ናይትካ አዉ ባይናይሳታ ግዳና።

25“ህንተ ግዶን ደእያ ማንቆ ግድዳ ታ አሳፐ ኦደስካ ሚሸ ታልእኮ፥ የሎን ታልእያ አሳዳ የሎ ኦይቾፍተ። 26ኔኒ እስባ ግሾ፥ እያ ማኡዋ ኦይክዳ አስ ደእኮ፥ አው ዉሎና ደእሽን እያ ማኡዋ ዛራ። 27እ ማእድ አቀይ እ ፃላላ። እ ሀራ አይ ማእድ አቃናዉ ዳንዳኢ? ታኒ ቃትያ ፆሲ ግድያ ግሾ፥ እ ታኮ ዋስያ ዎደ ስአና።

28“ፆሳ ቦላ#22:28 ፆሳ ቦላ: “ዳይናታ ቦላ” ጫሻ ቃላ ሃሳዮፓ፥ ዎይኮ ነ ደርያ አይሰይሳ ባዶፋ። 29ነ ካፈ፥ ነ ዎይነ ኡሻፈነ ነ ሻማሆ ዛይትያፐ ታዉ ያርሾ ያርሻ።

“ባይራ ግድድ የለትዳ አደ ናኣ ታዉ እማ። 30ነ ሚዛፐነ ነ ዶርሳፈ ባይራ የለትዳይሳ ታዉ እማ። ኤንቲ ላፑን ጋላስ ጋካናዉ፥ ባንታ አየታራ ጋምኦ፤ ሆስፑን ጋላሳን ኤንታ ታዉ እማ።

31“ህንተ ታዉ ጌሻ አስ ግዳናዉ ኮሼስ። ሄሳ ግሾ፥ ዶእ መንድ ዎዳ መሄ አሾ ሞፕተ፤ ሄሳ ካናስ የግተ።”

Currently Selected:

ከሳ 22: GFBEVF

Highlight

Copy

Compare