ከሳ 17

ዛላፈ ፑልትዳ ሃ

1እስራኤለ አሳ ኡባይ ጎዳይ ኪትዳይሳዳ እስ በሳፈ ሀራ በሲ ዩይሸ፥ ሲን መላ ቢታፈ ደንድድ ራፍድማ ጌተትያ በሳን ኡትዶሶና። ሽን ኤንቲ ኡያናዉ ሃ ሄ በሳን ይስ። 2ኤንቲ፥ “ኑስ ኡያናዉ ሃ እማ” ያግድ ሙሰራ ካጨትዶሶና።

ሙሰይ ዛሪድ፥ “ህንተ ታራ አይስ ካጨቴቲ? ጎዳ አይስ ፓጨቲ?” ያግስ።

3ሽን አሳይ ያን ሃ ሳሞትድ፥ “ኔኒ ኑና፥ ኑ ናይታነ ኑ መህያ ሳሞን ዎናዉ ግብፀፈ ከሳዳ ሀይሳ አይስ ኤሀዲ?” ያግድ ሙሰ ቦላ ዛር ዛር ዙዙምዶሶና።

4ያትን ሙሰይ፥ “ታኒ ሀ አሳ ዋቶ? ኤንቲ ታና ሹቻን ጫዳና ሀኖሶና” ያግድ ጎዳ ዎስስ።

5ጎዳይ ሙሰኮ፥ “ኔኒ እስራኤለ አሳፐ ጭማታ ኔራ ኤካዳ አሳፐ ስን አዳ ሄመታ። ቃስ ናይለ ሻፋ ሾጭዳ ፃምኣ ነ ኩሸን ኦይካዳ ባ። 6ታኒ ኮሬባ ዙማን ዛላ ቦላ ነ ስንን ኤቃና። ሄ ዛላ ሾጫ፤ አሳይ ኡያና ሃይ እያፐ ከያና” ያግስ። ሙሰይ እስራኤለ ጭማታ ስንን ሄሳ ኦስ።

7እስራኤለት፥ “ቱማ ጎዳይ ኑራ ደኢ?” ያግድ ዙዙምዳ ግሾነ ጎዳ ፓጭዳ ግሾ ሄ በሳ ማሳሀነ ማርባ#17:7 ማሳሀነ ማርባ: እብራወ ዶናን ማሳሀ ጉሳይ “ፓጮ” ጉሱ፥ ቃስ ማርባ ጉሳይ “ዙዙን” ጉሱ። ግድ ሱንስ።

እስራኤለነ አማለቃ ኦላ

8አማለቃት ይድ ራፍድማን እስራኤለታ ኦልዶሶና። 9ሙሰ እያሱኮ፥ “ኔኒ ዎንቶ አማለቃታ ኦላናዉ ጉ አስ ዶራ። ታኒ ፆሳ ፃምኣ ኦይካዳ ዙማ ሁጰን ኤቃና” ያግስ።

10ሙሰይ ኪትዳይሳዳ እያሱይ አማለቃታ ኦልስ። ሙሰይ፥ አሮንነ ሆር ዙማ ሁጰ ከይዶሶና። 11ሙሰይ ባ ኩሽያ ደንድ ጋምእያ ዎደ እስራኤለት ፆኖሶና፥ ሽን እ ባ ኩሽያ ዎያ ዎደ አማለቃት ፆኖሶና። 12ሙሰ ኩሸይ አርጋጭዳ ዎደ አሮናራነ ሁራራ ሹች ኤህድ ሙሰ እያ ቦላ ኡትስዶሶና። አሮንነ ሁር ኡሻቻራነ ሀድርሳራ ኤቅድ አዋይ ዉላና ጋካናዉ እያ ኩሽያ ካትስ ኦይክዶሶና። 13ሄሳዳ ኦድ እያሱይ አማለቃታ ማሻን ኦልድ ይስስ።

14ሄሳፈ ጉየ ጎዳይ ሙሰኮ፥ “ሀይስ ኡባ ዎደ ሀሳየታና መላ ሀ ፆኑዋ ታርክያ ፃፋ። ታኒ አማለቃታ ቡርፆራ ይሳናይሳነ ኤንቲ ዶገታናይሳ እያሱስ ኦዳ” ያግስ። 15ሙሰይ ያርሾ በሲ ጊግስድ፥ “ጎዳይ ታ ፆኑዋ ባንድራ” ግድ ሱንስ። 16እ፥ “ጎዳ ፆኖ ባንድራ ቁ ኦድ ኦይክተ። ጎዳይ አማለቃታ መርናዉ ኦላና” ያግስ።

Currently Selected:

ከሳ 17: GFBEVF

Highlight

Copy

Compare