ከሳ 11

ባይራ ቦላ ይዳ ጋዶ

1ጎዳይ ሙሰኮ፥ “ታኒ ግብፀ ካዉዋ ቦላነ እያ አሳ ቦላ እስ ሀራ ጋዶ የዳና። ሄሳፈ ጉየ፥ እ ህንተና ከስ የዳና። እ ህንተና ኡባ ጎድድ ከሳና። 2እስራኤለ አሳይ፥ አደይነ ማጫስ ባንታ ሾሮታፐ ብራነ ዎርቃ አሌቆ ኦይቻና መላ ኤንታዉ ኦዳ” ያግስ። 3ጎዳይ እስራኤለ አሳስ ግብፀታ ስንን ቴሞ እሚስ። ግብፀ ካዉዋ ሞርናትነ አሳይ ሙሰ ዳሮ ቦንቸትዳ አሳዳ ፄልዶሶና።

4ሙሰይ ካዋኮ፥ “ጎዳይ ሀይሳዳ ያጌስ፤ ‘ቃማ ብላሄ ታኒ ግብፀ ቢታ ግዶራ ካንና። 5ግብፀ ቢታን ደእያ ባይራ አደ ናእ ኡባይ፥ ካዋ አራታ ላታናዉ ደእያ ባይራ ናኣፐ ዶምድ፥ ዎፃን ጋጭያ ማጫ አይለ ባይራ ናአ ጋካናዉ፥ ባይራ የለትዳ መሄ ኡባይ ሀይቃና። 6ግብፀ ቢታ ኡባን ሄሳፈ ካሰካ ስንፈካ ሀኖና ግታ ዬሆይ ዬኬታና። 7ሽን እስራኤለ አሳ ቦላ ዎይኮ ኤንታ መህያ ቦላ ካንካ ቦጨና።’ ሄ ዎደ ታኒ ጎዳይ ግብፀታ ግዶንነ እስራኤለ ግዶን ዱማተ መይሳ ኔኒ ኤራና። 8ነ ሞርናት ኡባይ ይድ ታ ስንን ጉፋናና። ታ አሳ ኤካዳ ሀ ቢታፈ ከያና መላ ኤንቲ ታና ዎሳና። ሄሳፈ ጉየ፥ ታኒ ባና” ያግስ። ሙሰይ ሸነን ፁገትድ ካዋ ስንፈ ከይድ ብስ።

9ጎዳይ ሙሰስ ካሰ፥ “ግብፀ ቢታን ታኒ ማላልስያባ ዳርሳዳ ኦና ጋሶ ካዎይ ህንተና ስኤና” ያግድ ኦድ ዎስ። 10ሙሰይነ አሮን ማላልስያባ ኡባ ካዋ ስንን ኦዶሶና። ሽን ጎዳይ ካዉዋ ዎዛና ሙምስዳ ግሾ፥ እስራኤለታ ባ ቢታፈ የዶና እፅስ።

Currently Selected:

ከሳ 11: GFBEVF

Highlight

Copy

Compare