Римӧ 7

Индӧдыс кӧрталӧ

1Вокъяс, висьтала тіянлы, Индӧдсӧ тӧдысьяслы. Ті бура тӧданныд, мый Индӧдыс вына морт вылын ловъя дырйиыс. 2Верӧс сайӧ петӧм аньӧс Индӧдыс кӧрталӧ ловъя верӧсыскӧд. Верӧсыс кӧ кулӧ, сійӧ мынӧ кӧрталан Индӧдсьыс. 3Ловъя верӧс дырйиыс кӧ петас мӧд сайӧ, лоӧ гозъякост олӧм пежалысьӧн. Верӧсыс кӧ кулӧ, сійӧ мынӧ гозъякост олӧм индӧдсьыс. Сэки петас кӧ мӧд сайӧ, оз ло гозъякост олӧм пежалысьӧн. 4Тадзи тшӧтш ті, вокъясӧй, Кристос вир-яйӧ йитчӧмнаныд кулінныд Индӧдыслы да лоинныд Мӧдыслӧн, кулӧмысь Ловзьысьыслӧн, медым вайны Енлы вотӧс.

Ми кулім Индӧдыслы

5Тшыкӧм вир-яйын оліганым лёк кӧсйӧмыс ыджыдаліс миян пытшкын Индӧдыс отсӧгӧн, сэки ми вайим вотӧс кулӧмыслы. 6Ӧні ми кулім Индӧдыслы, мынім сылӧн став кӧртӧдысь. Ми кесъялам Енмыслы выль ногӧн, Лов серти, а огӧ важ мозыс, Индӧдлӧн шыпас серти. 7Мый шуам татчӧ? Индӧдыс ӧмӧй мыжыс? Дерт, абу. Индӧдыс восьтіс меным мыжсӧ. Индӧдыс кӧ эз висьтав: «Эн ышты», ме эськӧ эг и гӧгӧрволы ыштӧмсӧ. 8Тадзи Индӧдыс пыр мыжыс кыпӧдіс ме пытшкын быдпӧлӧс ыштӧмсӧ. Мыжыс ӧд Индӧдтӧгыс кулӧма. 9Водзынсӧ ме олі Индӧдсӧ тӧдтӧг, но тшӧктӧмсӧ кылі да, мыжыс ловзис, 10и ме кулі. Тадзи олӧмсӧ сетысь Индӧдыс вайис меным кулӧм. 11Индӧдлӧн тшӧктӧмыс пыр мыжыс кежӧдіс менӧ да виис сы отсӧгӧн. 12Но Индӧдыс вежа, тшӧктӧмыс тшӧтш вежа, веськыд да бур.

13Сідзкӧ, бур Индӧдыс ӧмӧй вайис меным кулӧмсӧ? Эз. Бур Индӧдыс пыр мыжыс вайис меным кулӧмсӧ. Тадзи мыжыс восьтіс ачыс асьсӧ – тшӧктӧмыс пыр лоис лёксьыс-лёкӧн.

Енлӧн Индӧд да мыжыслӧн индӧд

14Ми тӧдам, мый Индӧдыс Ловсянь, а менӧ, тшыкӧм вир-яйын олысьӧс, вузалӧма мыжыслы. 15Ачым ог гӧгӧрво, мый вӧча: кӧсъянасӧ ог вӧч, а мустӧмсӧ вӧча. 16Вӧча кӧ сійӧ, мый ог кӧсйы, сэки гӧгӧрвоа, мый Индӧдыс бур вылӧ. 17Збыльвылас, ог ме тайӧс вӧч, но ме пытшкын олысь мыжыс вӧчӧ. 18Тӧда, мый ме пытшкын, менам тшыкӧм вир-яйын, бурыс абу. Бурсӧ вӧчны кӧсйӧмыс эм, но сійӧ оз артмы. 19Бурсӧ кӧсъя да, ог вӧч, лёксӧ ог кӧсйы да, вӧча. 20Ме кӧ вӧча кӧсйытӧмсӧ, сідзкӧ, сійӧс ог нин ме вӧч, но ме пытшкын олысь мыжыс вӧчӧ. 21Казяла ас пытшкысь татшӧм индӧд: кӧсъя кӧ вӧчны бурсӧ, менам артмӧ лёкыс. 22Менам пытшкӧсса мортыс нимкодьпырысь сибӧдӧ Енлысь Индӧдсӧ, 23но вир-яйысь ме аддза мӧдпӧлӧс индӧд. Сійӧ паныд сувтӧ пытшкӧсса индӧдлы да кӧрталӧ менӧ вир-яйын олысь мыжыслӧн индӧдӧн. 24Коньӧр ме морт! Коді мездас менӧ тайӧ кулана вир-яйсьыс? 25Аттьӧала Енмӧс миян Господь Исус Кристосысь! Тадзи менам пытшкӧсса мортыс кывзысьӧ Ен Индӧдлысь, а тшыкӧм вир-яйыс – мыжыслӧн индӧдлысь.

Currently Selected:

Римӧ 7: КБ

Highlight

Copy