YouVersion Logo
Search Icon

Марк 4

4
Кӧдзысь йылысь велӧданвисьт
(Мт. 13:1-9; Лк. 8:4-8)
1Исус бара велӧдіс ты дорын. Сы дінӧ чукӧртчис зэв уна йӧз, Сылы весиг ковмис пуксьыны пыжӧ. Пыжыс сулаліс ва вылын, а йӧзыс – вадорас.
2Исус висьталіс налы уна велӧданвисьт: 3«Кывзӧй. Морт кӧдзны петас. 4Кӧдзигас кымынкӧ кӧйдыс усяс туй бокӧ. Сэтчӧ воасны лэбачьяс да кокаласны. 5Кымынкӧ кӧйдыс усяс изъяинӧ. Этша муыс вӧсна ляпкыдінад найӧ ӧдйӧ чужасны. 6Петас шонді, пӧжны пондас, и омӧль вужъя петасыд косьмас. 7Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ, и сійӧ оз вай тусьсӧ. 8Мукӧд кӧйдысыс усяс бур муӧ. Кӧйдысыс петас, быдмас да ваяс уна тусь. Ӧтияс ваясны тусьсӧ комын пӧв, мӧдъяс – квайтымын пӧв, коймӧдъяс – сё пӧв». 9Сэсся Исус шуис: «Кодлӧн эм пель, мед кылӧ!»
Мыйла велӧданвисьтыс колӧ?
(Мт. 13:10-17; Лк. 8:9-10)
10Ас кежаныс кольӧм бӧрын дас кыкыс мукӧд велӧдчысьыскӧд пондісны юасьны Исуслысь велӧданвисьт йылысь. 11Исус шуис: «Тіянлы сетӧма тӧдны Ен Юралӧмлысь гусяторъяссӧ, а мукӧдыс кылӧны та йылысь сӧмын велӧданвисьтъясысь.
12– Найӧ видзӧдӧны, аддзӧны – да оз казявны,
кывзӧны, кылӧны – да оз гӧгӧрвоны.
Оз бергӧдчыны Енлань,
и налысь мыжъяссӧ оз ло прӧститӧма».
Кӧдзысь йылысь висьтсӧ гӧгӧрвоӧдӧм
(Мт. 13:18-23; Лк. 8:11-15)
13Исус шуис налы: «Энӧ ӧмӧй гӧгӧрвоӧй тайӧ велӧданвисьтсӧ? Кыдзи нӧ мукӧд велӧданвисьтсӧ гӧгӧрвоанныд? 14Кӧдзысь Ен кыв кӧдзӧ. 15Туй бокӧ усьӧм кӧйдыс петкӧдлӧ: мортыс кылӧ Енлысь кывсӧ, но дзик пыр локтӧ сӧтана да гусялӧ сьӧлӧмас кӧдзӧм кывсӧ. 16Изъяинӧ усьӧм кӧйдысыс петкӧдлӧ: мортыс кылӧ Енлысь кывсӧ да дзик пыр долыдпырысь босьтӧ сійӧс сьӧлӧмас, 17но вужъясьтӧмысла оз дыр эскы, Ен кыв вӧсна дзескӧдігӧн-вӧтлігӧн сійӧ эновтчӧ эскӧмсьыс. 18Лежнӧг пӧвстӧ усьӧм кӧйдысыс петкӧдлӧ: мортыс кылӧ Енлысь кывсӧ, 19но быдлунъя тӧждыс, озырмыны ыштӧмыс да мукӧд кӧсйӧмыс пӧдтӧ кӧдзӧм кывсӧ, и сійӧ оз вай вотӧссӧ. 20Бур муӧ кӧдзӧм кӧйдысыс петкӧдлӧ: мортыс кылӧ Енлысь кывсӧ, босьтӧ сійӧс сьӧлӧмас да вайӧ вотӧс. Ӧтияс вайӧны вотӧссӧ комын пӧв, мӧдъяс – квайтымын пӧв, коймӧдъяс – сё пӧв».
Югдӧдантор йылысь велӧданвисьт
(Лк. 8:16-18)
21Исус висьталіс: «Ӧзтӧм битӧ ӧмӧй пыртлӧны керкаӧ, мед доз улӧ пуктыны либӧ лабич улӧ сувтӧдны? Оз ӧмӧй сійӧс бикок вылӧ пуктыны? 22Став гусяыс воссяс да став дзебӧмаыс йӧзасяс. 23Кодлӧн эм пель, мед кылӧ!»
24Исус шуис: «Тӧд выланыд босьтӧй, мый кыланныд. Асланыд мурталӧм серти тіянлы мурталасны, нӧшта содтасны на тіянлы, кывзысьяслы. 25Кодлӧн эм, сылы сетасны. Кодлӧн абу, сылысь бӧръясӧ босьтасны».
Нянь быдмӧм йылысь велӧданвисьт
26Исус шуис: «Енлӧн Юралӧмыс татшӧм. Морт кӧдзӧ муӧ кӧйдыс. 27Войсӧ сійӧ узьӧ, лунсӧ олӧ, а кутшӧм ногӧн няньыс чужӧ-быдмӧ, оз тӧд. 28Муыс ачыс быдтӧ: медводз петӧ веж турун, сэсся сійӧ шептасьӧ, а сэсся нин шепъясас артмӧны тусьяс. 29Кор няньыс воас, дзик пыр кӧдзысь мӧдӧдӧ вундысьясӧс, ӧд вундан кадыс воис».
Горчица тусь йылысь велӧданвисьт
(Мт. 13:31-35; Лк. 13:18-19)
30Исус шуис: «Мыйкӧд ӧткодялам Енлысь Юралӧмсӧ? Кутшӧм велӧданвисьтӧн петкӧдлам сійӧс? 31Енлӧн Юралӧмыс муӧ кӧдзӧм горчица тусь кодь. Став кӧйдыссьыс сійӧ медпосни. 32Кӧдзӧм бӧрас быдмӧ да став пуктассьыс ыджыд лоӧ, весиг енэжвыв лэбачьяс вермӧны поздысьны гырысь вожъясыслӧн вуджӧр улӧ».
33Уна татшӧм велӧданвисьтӧн Исус юӧртіс налы Енлысь кывсӧ, мыйта найӧ вермисны гӧгӧрвоны. 34Велӧданвисьтъястӧг Исус эз сёрнитлы йӧзыскӧд, а велӧдчысьясыслы ас кежаныс гӧгӧрвоӧдліс ставсӧ.
Тӧвныр лӧньӧдӧм
(Мт. 8:23-27; Лк. 8:22-25)
35Сійӧ лунӧ, рытнас, Исус шуис велӧдчысьясыслы: «Вуджамӧй ты мӧдлапӧлӧ». 36Найӧ колисны йӧзсӧ, асьныс пуксисны пыжӧ Исус дінӧ. Накӧд вӧліны тшӧтш мукӧд пыжаяс. 37Кыптіс ыджыд тӧвныр. Тыыс ёна гызис, и пыжыс кутіс тырны ванас. 38Юрлӧс вылӧ нёровтчӧмӧн Исус узис пыж бӧжас. Сійӧс садьмӧдісны да шуисны: «Велӧдысь! Тэныд ӧмӧй веськодь, мый ми вӧям?» 39Исус чеччис, ӧлӧдіс тӧвсӧ да тшӧктіс ваыслы: «Лӧнь, ланьт!» Тӧлыс ланьтіс, и вӧвлытӧм чӧв-лӧнь пуксис. 40Исус шуис велӧдчысьясыслы: «Мыйла ті сэтшӧм полысьӧсь? Кӧні тіян эскӧмныд?» 41Найӧ ыджыд полӧмӧн тырисны, ӧта-мӧдныслысь пондісны юасьны: «Коді Сійӧ? Весиг тӧлыс да ваыс кывзысьӧны Сылысь».

Currently Selected:

Марк 4: КБ

Highlight

Share

Copy

None

Want to have your highlights saved across all your devices? Sign up or sign in