Яков 1

1Гижӧ Яков, Енлӧн да Господь Исус Кристослӧн кесйӧг. Чолӧмала дас кык чужанкотырӧс, кодъяс разалӧмаӧсь став му пасьталаыс.

Эскӧм да мывкыдлун

2Вокъяс, долыда нимкодясьӧй, кор тіянлы ковмас нуны быдпӧлӧс сьӧкыдсӧ. 3Ті ӧд тӧданныд: эскӧмӧн кӧ нуанныд сьӧкыдсӧ, ті лоанныд зумыдӧсь. 4А зумыдлуныс мед вайӧдас ассьыс уджсӧ тіян пытшкын помӧдз, медым ті вӧлінныд дзоньнас тыр-бурӧсь, да тіян эз вӧв некутшӧм тырмытӧмтор.

5Тіян пиысь кӧ кодлыкӧ оз тырмы мывкыдлуныс, мед корӧ Енмыслысь, и сылы лоӧ сетӧма. Ӧд Енмыс быдӧнлы сетӧ лышкыда да шуасьтӧг. 6Сӧмын корӧй эскӧмӧн да майшасьтӧг. Ӧд майшасьысь морт тӧвнырӧн кыпӧдан-новлӧдлан саридзвывса гы кодь. 7-8Мортыс кӧ кык ногӧн мӧвпалӧ ӧтитор йывсьыс, сійӧ нинӧм оз вӧч зумыдпырысь. Татшӧм мортыс мед оз чайт босьтны мыйкӧ Господьсяньыс.

9Коньӧр вок мед ошйысьӧ вылӧ пуктӧмнас, 10а озыр – улӧ лэдзӧмнас, ӧд сійӧ турунвывса дзоридз моз косьмас-бырас. 11Шонді петас, пӧжас да косьтас турунсӧ. Дзоридзыс сылӧн усьӧ, мичлуныс бырӧ. Дзик тадзи кусӧ озыр мортлӧн мырсян-пессян олӧмыс.

12Шуда сійӧ, коді вермӧ венны ыштӧдӧмсӧ, ӧд та бӧрти сылы лоӧ сетӧма Олӧмыслысь юркытш. Тайӧ юркытшсӧ Господь кӧсйысис сетны Сійӧс радейтысьяслы. 13Ыштӧдӧм дырйи некод мед оз шу: «Енмыс менӧ ыштӧдӧ». Лёк вылас ӧд Енсӧ некод оз вермы ыштӧдны, и Ачыс Енмыс некодӧс оз ыштӧд. 14Но быд мортӧс ыштӧдӧ сылӧн лёк кӧсйӧмыс. Лёк кӧсйӧмыс ылӧдлӧ мортсӧ да кыскӧ сійӧс лёкас. 15Лёк кӧсйӧмыс содӧ-быдмӧ да чужтӧ мыж, а вӧчӧм мыжыс чужтӧ кулӧм.

16Муса вокъяс, некодлы энӧ сетӧй асьнытӧ ылӧдлыны. 17Быдпӧлӧс бурсетӧмыс да тыр-бур козиныс воӧ вылісянь, югыдыслӧн Батьсянь. Сійӧ некор оз вежсьыв, Сылӧн югыдыс некор оз кус. 18Ас кӧсйӧм сертиыс Сійӧ чужтіс миянӧс збыльыслӧн кывнас, медым Сылӧн вӧчӧмторъясысь ми вӧлім медводдзаясӧн.

Енлысь кывзысьӧм

19Муса вокъяс, быдӧн мед лоӧ тэрыб кывзыны, но ньӧжмыд сёрнитны да скӧрмыны. 20Ӧд мортлӧн скӧралӧмыс оз вай Ен нога веськыд олӧмсӧ. 21Та вӧсна эновтчӧй быдпӧлӧс пежсьыс да лёк вӧчӧмысь, рам сьӧлӧмӧн сибӧдӧй тіянлы висьталӧм кывсӧ, ӧд сійӧ вына мездыны тіянлысь ловнытӧ.

22Энӧ лоӧй сӧмын кывзысьясӧн, но Енлӧн кывйыс серти олысьясӧн. Куш кывзӧмнад сӧмын ылӧдланныд асьнытӧ. 23Коді кылӧ Енлысь кывсӧ, но сы серти оз ов, сійӧ рӧмпӧштанӧ чужӧмсӧ видзӧдысь кодь. 24Сійӧ видзӧдлас ас вылас, а вешйӧм бӧрас дзик пыр вунӧдас чужӧмсӧ. 25Но коді видзӧдӧ мездлунсӧ сетысь тыр-бур Индӧд вылӧ да оз вунӧд кывлӧмасӧ, а олӧ Индӧдыс серти, сійӧс лоӧ бурсиӧма уджъясыс пыр.

26Кодкӧ тіян пиысь кӧ лыддьӧ асьсӧ вежавидзысьӧн, но быдлаӧ вомсӧ восьтӧ, сійӧ ылӧдлӧ асьсӧ. Татшӧм мортыслӧн вежавидзӧмыс нинӧм оз сулав. 27Мортыс кӧ видзӧ асьсӧ тайӧ мувывса пежсьыс, сійӧ кӧ тӧждысьӧ батьтӧм-мамтӧм челядь вӧсна да дӧваяс вӧсна налӧн сьӧкыдалігӧн – тайӧ эм Ен Бать водзын сӧстӧм да пежасьтӧм вежавидзӧм.

Currently Selected:

Яков 1: КБ

Highlight

Copy