Ап. уджъяс 25

Павел корӧ кесар водзын мыждӧм

1Юралысьӧ пуксьӧмсянь куим лун мысти Фест муніс Кесарияысь Ерусалимӧ. 2Сэні аркирей да иудейяслӧн веськӧдлысьяс норасисны Павел вылӧ 3да корисны, мед Фест вӧчас налы буртор: тшӧктас вайӧдны Павелӧс Ерусалимӧ. Ас костаныс найӧ сёрнитчисны, мый туяс кыйӧдасны Павелӧс да виасны. 4Фест вочавидзис: «Павелӧс видзӧны Кесарияын, ме ачым сэтчӧ регыд муна. 5Тіян пиысь тӧдчанаджыкъясыс мед мунасны мекӧд. Тайӧ мортыс сайын кӧ збыльысь мыйкӧ эм, мед мыжаласны».

6Кӧкъямыс-ӧ-дас лун мысти Фест бӧр муніс Кесарияӧ. Мӧд луннас локтіс ёрдӧ, пуксис да тшӧктіс вайӧдны Павелӧс. 7Кор Павел локтіс, сійӧс кытшалісны Ерусалимысь воӧм иудейяс. Найӧ пондісны чорыда мыжавны Павелӧс унаторйысь, но подулавнысӧ эз вермыны. 8Павел асьсӧ дорйӧм могысь шуис: «Иудей Индӧдлы, крамлы да кесарлы паныд ме некутшӧм мыж эг вӧч». 9Мед бурӧн кольны иудейяс водзын, Фест шуис Павеллы: «Кӧсъян-ӧ мунны Ерусалимӧ, мед сэні менам ёрд водзӧ сувтны?» 10Павел шуис: «Ме сулала кесар ёрд водзын, тані колӧ менӧ мыждынысӧ. Иудейяслы ме нинӧм лёксӧ эг вӧч, тэ ачыд тайӧс бура тӧдан. 11Но ме кӧ мыжа вимӧн, ме дась кувны. Абу кӧ мыжа, мыйысь тайӧ йӧзыс мыжалӧны менӧ, сідзкӧ, некод оз вермы сетны менӧ налы. Ме кора кесарлысь мыждӧм». 12Сэки аслас отсасьысьяскӧд сёрнитчӧм бӧрын Фест шуис: «Тэ корин кесарлысь мыждӧм, сідзкӧ, сувтан кесар водзӧ».

Фест висьталӧ Агриппа ӧксылы Павел йылысь

13Кымынкӧ лун мысти локтісны Кесарияӧ Агриппа ӧксы да Вереника, мед чолӧмавны Фестӧс. 14Найӧ олісны сы ордын унакодь лун. Сэки Фест висьталіс ӧксылы Павел йылысь: «Тані пукалӧ морт, сійӧс Феликс кольӧма дзескыдінӧ. 15Ерусалимӧ ветлігӧн иудейяслӧн аркирейяс да юрнуӧдысьяс норасисны меным сы вылӧ, корисны мыждыны сійӧс. 16Ме шуи налы, мый римсаяс оз сетны вины мортӧс, кытчӧдз сійӧс оз сувтӧдны мыжалысьяс водзӧ, медым мортыс вермис паныд дорйысьны. 17Кор найӧ локтісны татчӧ, ме дзик пыр мӧд луннас пукси ёрдӧ да тшӧкті вайӧдны тайӧ мортсӧ. 18Мыжалысьяс сувтісны гӧгӧрыс. Ме виччыси, гашкӧ, кутшӧмкӧ лёкторйысь пондасны мыжавны, но тайӧс ме эг кыв насянь. 19Найӧ вензисны асланыс эскӧм кузя да кутшӧмкӧ кувлӧм Исус понда. Но Павеллӧн висьталӧм серти, Сійӧ ловъя. 20Та кузя ме эг вермы некодарӧ нинӧм шуны. Та вӧсна юалі Павеллысь, оз-ӧ сійӧ кӧсйы мунны Ерусалимӧ, медым сэні сувтны ёрд водзӧ. 21Но Павел корис, мед сійӧс нуӧдасны кесар дінӧ. Сэтчӧ нуӧдтӧдз ме тшӧкті видзны сійӧс дзескыдінын». 22Агриппа шуис Фестлы: «Ме тшӧтш кӧсъя кывзыштны тайӧ мортсӧ». «Аски кывзыштан», – вочавидзис Фест.

23Аскинас Агриппа да Вереника локтісны мичаа вӧччӧмӧн. Найӧ пырисны чукӧртчанінӧ тышкайӧзӧн веськӧдлысьяскӧд да карса тӧдчана йӧзкӧд. Фест тшӧктіс вайӧдны Павелӧс, 24сэсся шыасис: «Агриппа ӧксы да ставныд локтысьяс! Ті асьныд аддзанныд тайӧ мортсӧ. Ерусалимын да тані иудейяс норасисны меным сы вылӧ, ӧти вомӧн горзісны, колӧ пӧ вины сійӧс. 25Но ме эг аддзы мыжсӧ, мыйысь эськӧ позис вины сійӧс. Сылӧн корӧм серти ме шуи мӧдӧдны сійӧс кесар дінӧ. 26Меным весиг нинӧм гижнысӧ ыджыднымлы, та вӧсна вайӧді сійӧс тіян водзӧ, торйӧн нин тэ водзӧ, Агриппа ӧксы. Эска, мый тэнад донъялӧм бӧрын менам эм мый гижнысӧ. 27Ме чайта, мывкыдтӧг лоӧ вӧчӧма, мӧдӧдам кӧ пуксьӧдӧм мортӧс мыжсӧ индытӧг».

Currently Selected:

Ап. уджъяс 25: КБ

Highlight

Copy