Ап. уджъяс 26

Павел дорйӧ асьсӧ Агриппа ӧксы водзын

(Ап.удж. 9:1-19; 22:6-16)

1Агриппа шуис Павеллы: «Тэ верман сёрнитны ас кузяыд». Павел кисӧ лэптылӧм бӧрын заводитіс дорйысяна сёрнисӧ:

2«Агриппа ӧксы! Ме шуда, мый талун верма дорйысьны тэ водзын иудейяслӧн став мыжалӧмысь. 3Тэ ӧд бура тӧдан иудей войтырлысь оласногсӧ да налысь вензяна видзӧдлассӧ. Та вӧсна кора тэнӧ терпитӧмӧн кывзыштны менӧ.

4Менсьым олӧмӧс тӧдӧ став иудейыс, ме ӧд том кадсянь олі ас войтыр пӧвстын Ерусалимын. 5Найӧ важысянь тӧдӧны менӧ. Ме вӧлі кутчысьӧма фарисейяслӧн чорыд велӧдӧмӧ да оласногӧ. Та йылысь, кӧсъясны кӧ, асьныс вермасны висьтавны. 6Ӧні ме сулала ёрд водзын, ӧд лача кута кӧсйысьӧм вылӧ, мый Енмыс сетіс миян батьяслы. 7Тайӧ кӧсйысьӧмыслысь збыльмӧмсӧ лача кутӧмӧн виччысьӧны миян войтырлӧн дас кыкнан чужанкотырыс, лун и вой юрбитӧны Енлы. Та вылӧ лача кутӧмысь и мыжалӧны менӧ иудейяс, Агриппа ӧксы. 8Мыйла ті онӧ эскӧй, мый Енмыс вермӧ ловзьӧдны кулӧмаясӧс?

9Ме ачым быд ногыс паныд сувтлі Назаретса Исус нимлы. Чайті, тадзи колӧ вӧлі. 10Тадзи вӧчлі Ерусалимын: ме босьті аркирейяссянь гижӧд да вежа войтырӧс унаӧс пуксьӧдалі дзескыдінӧ, ме вӧлі найӧс виӧм дор. 11Ме унаысь чорыда нӧйтлі найӧс синагогаясын, медым найӧ омӧльтісны Исусӧс. Ме вӧлі тырӧма скӧрлунӧн, вӧтлыси на бӧрся весиг мукӧд каръясӧдз.

12Та могӧн аркирейяс нимсянь ме муні Дамаскӧ. 13Луншӧр кадӧ, кор ме вӧлі туйын на, аддзи, ӧксыӧй, кыдзи ме да мекӧд мунысьяс гӧгӧр югнитіс енэжсяньыс югыд. Сійӧ вӧлі шонді югӧрысь на яр. 14Ми ставным усим муас. Сэки ме кылі еврей кыв вылын ме дінӧ шыасьӧм: ”Савл, Савл, мыйла вӧтлан Менӧ? Сьӧкыд тэныд мунны ёсь зорлы паныд”. 15Ме юалі: ”Коді Тэ, Господьӧй?” Сійӧ шуис: ”Ме эм Исус, кодӧс тэ вӧтлан. 16Ӧні чеччы да сувт кок вылад. Ме петкӧдчи тэныд, мед тэ кесъялін Меным да висьталін, мый тэ аддзылін да мый Ме восьта на тэныд. 17Ме видза тэнӧ аслад войтырысь да ентӧдтӧмъясысь, кодъяс дінӧ ӧні мӧдӧда тэнӧ, 18мед восьтны налысь синсӧ да бергӧдны найӧс пемыдсьыс югыдӧ, сӧтана кипод улысь Ен дінӧ, медым Меным эскӧмӧн найӧ босьтасны мыжъясысь прӧститӧмсӧ да вежа войтырлы Енсянь вичмӧдӧмасӧ”.

19Та вӧсна, Агриппа ӧксы, ме эг кут паныд сувтны енэжсянь петкӧдчылӧмлы. 20Медводз Дамаскын да Ерусалимын, сэсся став Иудея му пасьтала, сэсся нин ентӧдтӧмъяслы висьтавлі, мед бергӧдчасны мыжъяссьыныс Енлань да олӧмнас петкӧдласны тайӧс. 21Таысь иудейяс и босьтісны менӧ крамын да кӧсйисны вины. 22Но Енмыс пыр на отсаліс меным тайӧ лунӧдзыс, та вӧсна ме ӧнӧдз сулала да висьтала быдӧнлы: прӧстӧй и чина йӧзлы. Висьтала сӧмын сійӧ, мый йылысь водзвыв висьтавлісны Мӧисей да пророкъяс. Найӧ висьталісны, 23мый Кристос сьӧкыда кулас и лоас медводдза Ловзьысьӧн, медым восьтны югыдсӧ иудей войтырлы да ентӧдтӧмъяслы».

24Кор Павел тадзи дорйысис, Фест гораа шуис: «Тэ дзикӧдз йӧймӧмыд, Павел! Ыджыд тӧдӧмлуныд вӧсна вежӧртӧ воштӧмыд». 25Павел шуис: «Ме эг йӧймы, пыдди пуктана Фест. Ме бур мывкыдсянь висьтала збыльсӧ. 26Та йылысь бура тӧдӧ ачыс ӧксы, та вӧсна ме восьсӧн сёрнита сы водзын. Эска, тайӧ сылы абу гусятор, ӧд ставыс тайӧ эз гусьӧн вӧчсьы, кӧнкӧ пемыд пельӧсын. 27Эскан-ӧ, Агриппа ӧксы, пророкъяслы? Тӧда, мый эскан». 28Агриппа шуис Павеллы: «Зэв тай ӧдйӧ кӧсъян вӧчны менӧ Кристослы эскысьӧн». 29«Ӧдйӧ ли, ог ли, но кевма Енлы, мед тэ да ті ставныд, менӧ кывзысьяс, лоинныд ме кодьӧсь, сӧмын тайӧ чепъястӧгыс», – шуис Павел.

30Кор Павел помаліс сёрнисӧ, ӧксы чеччис, сы бӧрся тшӧтш чеччисны Фест юралысь, Вереника да мукӧдыс. 31Муніганыс найӧ сёрнитісны ас костаныс: «Тайӧ мортыс абу мыжа, мед вины сійӧс либӧ видзны дзескыдінын». 32Агриппа шуис Фестлы: «Позьӧ эськӧ вӧлі лэдзны сійӧс, эз кӧ кор кесарлысь мыждӧмсӧ».

Currently Selected:

Ап. уджъяс 26: КБ

Highlight

Copy