Римын оліссезлӧ 11
11
1Сідзкӧ, юася: колис разь Еныс Ассис отирсӧ? Эз эд. Ме и ачым Израиль отирись, Авраам чужан вужись#11:1 чужан вуж ─ происхождение, Вениамин увтырись. 2Эз коль Еныс Ассис отирсӧ. Сія эд одззасянь нійӧ вӧлі бӧрйӧм. Одӧ разь тійӧ тӧдӧ Вежа Гижӧтсӧ, сэтӧн Илляыс йылісь висьтасьӧмсӧ? Сія тай Израиль отирыс вылӧ норасьӧм Еныслӧ: 3«Дӧсвидзисьӧ! Тэнчит юӧртіссетӧ вийисӧ, Тэнчит езъяланіннэтӧ#11:3 езъяланін ─ жертвенник разисӧ. Ме ӧтнам кольччи, да и менӧ лӧсьӧтчӧмась вийны». 4Мый сылӧ сэтчӧ Еныс висьталӧм? «Ме Ас пондасим видзи сизим сюрс#11:4 сизим сюрс ─ семь тысяч мортӧс. Нія Ваалыс одзын эзӧ копрасьӧ». 5Сідз и ӧння кадӧ Еныс Аслас бурсетӧмӧн видзӧ бӧрйӧм отир чукӧрсӧ. 6Бӧрйӧмыс кӧ Енлӧн бурсетӧмсянь, сэк сія абу мортлӧн бурсӧ керӧмсянь. Мыйкӧ керӧмсянь кӧ, сэк сія абу ни бурсетӧм. 7Мый сэк петӧ? Израильыс мый кошшис, сійӧ эз адззы. Ны коласісь дзир Енлӧн бӧрйӧммес адззисӧ, мӧддэс сьӧлӧммезнысӧ чорзьӧтісӧ. 8Эта йылісь Вежа Гижӧтас висьталӧм:
─ Еныс сетӧм нылӧ позялӧм#11:8 позялӧм ─ онемевший лов:
синнэзнаныс озӧ адззӧ,
пеллезнаныс озӧ кылӧ.
Сідз нельки ӧння лунӧдз.
9И Давидыс висьтавлӧм:
─ Пызан выланыс чӧскыт сёян-юанныс
ась лоӧ нылӧ кыянӧн#11:9 кыян ─ сеть.
Ась налькӧ моз шедӧны да падмӧны.
Сія ась лоӧ нылӧ вештісянӧн.
10Ась пемдӧны нылӧн синнэзныс,
медбы эзӧ адззӧ.
Нія ась пыр кежӧ кусіньтчӧны.
Быдтӧм випу да вӧрись випу
11Сідзкӧ, юала тіянлісь: «Израиль отирыс падмисӧ кӧ, сэсся озӧ ни лэбтісьӧ, быдсӧн усясӧ?» Оз ло сэтшӧмыс. Ны усьӧм кузя мӧдік отирлӧ локтіс мезмӧмыс, медбы иудей отирыс пондісӧ завидуйтны мӧдік отирлӧ. 12Иудейеслӧн усьӧмныс тай бурсӧ вайис мӧдік отирлӧ. Ны падмӧм кузя бурыс вӧлі сетӧм Енсӧ тӧдтӧммезлӧ. Мымдаӧн сэк унажык лоас бурыс отирыслӧ, быдӧс Израиль отирыс бертас кӧ Еныс дынӧ?
13Ӧні баита тіянлӧ, быдкодь отир коласісь Еныс дынӧ локтӧммезлӧ. Менӧ ыстісӧ висьтасьны тіянлӧ Бур Юӧрсӧ. Ме гаж сьӧлӧмӧн кера ассим уджӧс. 14Видзчися, ог я вермы аслам отирлісь ӧзйӧтны мӧдік отирлӧ завидуйтӧмсӧ? Ог я мезды ны коласісь мукӧдсӧ? 15Еныс Израиль отирсӧ колис. Сысянь локтіс му вылісь быд отирлӧ Енкӧт бурасьӧм. Мый сэк лоас Израиль отирсӧ бӧр босьтӧмсянь? Сія ваяс кулӧмись ловзьӧм! 16Медодзза пӧжалӧм няньыс кӧ вежа, сэк вежа и быдсӧн кӧтасыс. Вуджыс кӧ вежа, сэк и уввес вежаӧсь.
17Быдтӧм випуыс вылісь мукӧд уввес вӧлісӧ чегӧтӧмӧсь. Тэнӧ, вӧрись випусӧ#11:17 випу ─ маслина, боссьӧтісӧ#11:17 боссьӧтны ─ привить ны туйӧ. Тэ лоин ӧтвыв вуджыскӧт да випу ваыскӧт. 18Этасянь уввес одзын эн чатрась. Чатрасян кӧ, сэк уськӧт тӧдвылат: тэ он видз вуджсӧ, вуджыс видзӧ тэнӧ. 19Поди, сэтчӧ висьталан: «Уввес чегласисӧ, медбы менӧ ны туйӧ боссьӧтны». 20Сідз эд, нія эзӧ веритӧ Кристосыслӧ, сійӧн вӧлісӧ чегӧтӧмӧсь. Тэ видзсян Кристослӧ веритӧмнат. Сідзкӧ, эн чатрась, а пов! 21Еныс эз жалейт сэтӧн быдмӧм уввесӧ. Видзӧт ачыт, жалейтас разь сэк тэнӧ? 22Сідзкӧ, син одзат эд Еныслӧн бурсетӧмыс да чорыта керӧмыс. Видз тӧдвылат: Еныс чорыт сьӧлӧма усьӧммес дынӧ. Небыт сьӧлӧма Сія тэ дынӧ, кытчӧдз пондан овны Енлӧн бурсетӧмӧн. Мӧдмоза кӧ пондан овны, лоан кералӧм. 23Да и Израиль отирыс пондасӧ кӧ веритны Исусыслӧ, бӧра боссясӧ пу вылас. Еныс вына бӧр боссьӧтны нійӧ. 24Тэ вӧлін босьтӧм вӧрын быдмӧм випу вылісь. Быдмӧмыт вылӧ видзӧттӧг тэнӧ боссьӧтісӧ быдтӧм бур випу бердӧ. А нія, бур випу вылын быдмӧм уввес, буржыка боссясӧ асланыс пу бердӧ.
Израиль отирлӧн мезмӧм йылісь
25Воннэзӧ, мӧда тіянлӧ висьтавны тӧдлытӧмсӧ#11:25 тӧдлытӧм ─ тайна, медбы тійӧ ас йывсиныт юраныт уна эдӧ пыртӧ. Тӧдлытӧмыс то мый: Израиль отирись кытшӧмкӧ тор чорзьӧтісӧ сьӧлӧммезнысӧ. Сія кыссяс сэтчӧдз, кытчӧдз озӧ локтӧ Еныс дынӧ быд отирись морттэс сымда, мымда Сылӧ колӧны. 26Сэк быдсӧн Израильыс мезмас Вежа Гижӧтас висьталӧм сьӧрті:
─ Сион вывсянь локтас Мездӧтісь.
Яков увтырлісь Ентӧг олӧмсӧ#11:26 Ентӧг олӧм ─ нечестие Сія разяс.
27Менам ныкӧт то кытшӧм йитӧт:
Ме лэдза нылісь умӧль керӧммезнысӧ.
28Израиль отирыс эзӧ босьтӧ Бур Юӧрсӧ. Сійӧн лэбтісисӧ Еныс вылӧ. Сідз керсис тіян понда, медбы тійӧ босьтіт Бур Юӧрсӧ. Мӧд ладорсянь кӧ видзӧтны, нія Енлӧн бӧрйӧм отир, айезныс кузя нійӧ Еныс радейтӧ. 29Еныс сетӧм козиннэсӧ оз бӧр босьт. Аслас корӧммезлӧ#11:29 корӧммез ─ призванные кӧсйӧмсӧ оз веж. 30Одзжык тійӧ эдӧ кывзісьӧ Енсӧ, а ӧні Израиль отирыс эзӧ пондӧ кывзісьны. Сійӧн Еныс небыт сьӧлӧмӧн бергӧтчис тіянлань. 31Ӧні нія озӧ кывзісьӧ, медбы Еныс вӧлі небыт сьӧлӧма ны дынӧ, кыдз и тіян дынӧ. 32Му вывсис отирыс абу кывзісьӧмась Енсӧ. Сійӧн Еныс нійӧ быдӧннысӧ кӧрталӧм кывзісьтӧм оланнаныс, медбы сэсся быдӧнныс дынӧ лоны небыт сьӧлӧмаӧн.
33Еныслӧн эд унася-уна бурыс,
адззывлытӧм мывкыдыс#11:33 мывкыд ─ мудрость да быдӧс тӧдӧмыс!
Сылісь лӧсьӧтӧм-керӧмсӧ он вермы вежӧртны!
Сылӧн туйес тӧдтӧмӧсь!
34Кин вермас тӧдны Дӧсвидзисьлісь мывкыдсӧ?
Кин сылӧ висьталіс, кыдз колӧ керны?
35Кинкӧ сетіс я Сылӧ мыйкӧ одзӧсӧн,
медбы ковсис Сылӧ сэсся вештыны?
36Быдӧс эд локтӧ Сысянь,
быдӧс аркмӧ Сы пыр,
быдӧс бертӧ Сылӧ.
Сылӧ пырся-пыр ошкӧм! Аминь.
Кристос отирлӧн олан
Currently Selected:
Римын оліссезлӧ 11: БЮ19
Highlight
Share
Copy
Want to have your highlights saved across all your devices? Sign up or sign in
