2 Коринфын оліссезлӧ 4
4
1Еныс Аслас небыт сьӧлӧмсянь сетіс миянлӧ этӧ уджсӧ. Сійӧн мийӧ огӧ ӧшӧтӧ юррезнымӧс. 2Рожа кулянӧдз вайӧтан керӧммесӧ мийӧ колим, гусьӧн нем огӧ керӧ. Мийӧ Енлісь Кывсӧ огӧ дзугӧ, некинӧс огӧ ылӧтлӧ. Отирыслӧ быльсӧ висьтасям Ен син одзын. Сійӧн быд морт ачыс вермас видзӧтны, кытшӧмӧсь мийӧ. 3Кинкӧ поди оз вежӧрт Бур Юӧрсӧ, кӧдӧ мийӧ висьтасям. Сія пӧдана кулӧмас муніссеслӧ. 4Нія озӧ веритӧ. Му вылас ыждалісь кульыс нёрӧм#4:4 нёрны ─ ослепить нылісь вежӧрнысӧ, медбы нія эзӧ адззӧ Бур Юӧрлісь югдӧтӧмсӧ, кӧда осьтӧ Кристослісь югьялӧмсӧ. Кристосыс эд Асьнас мыччаліс миянлӧ Енсӧ. 5Мийӧ огӧ висьтасьӧ ас йывсиным. Юӧртам Кристос Исус йылісь: Сія ─ Дӧсвидзись. А мийӧ тіянлӧ раббез Исусыс понда. 6Еныс эд тшӧктӧм югйӧвтны пемытінас югытыслӧ. Сія югдӧтіс миянлісь сьӧлӧммезнымӧс, медбы мийӧ Кристос Исус чужӧмын адззим Енлісь югьялӧмсӧ.
7Мийӧ эд дзир сёйись доззэз. Ас пытшканым видзам сійӧ донася-донасӧ, медбы отирыс адззисӧ: вӧвлытӧм выныс локтӧ Енсянь, сія абу миянсянь. 8Миянӧс быд ладорсянь дзескӧтлӧны, а миянлӧ абу дзескыт. Быдласянь миян вылӧ усьӧ умӧльыс, а мийӧ киэзнымӧс огӧ лэдзӧ. 9Миянӧс вашӧтлӧны, а Еныс миянӧс оз коль. Кок йылісь уськӧтӧны, а мийӧ огӧ кулӧ. 10Вывтыраным мийӧ пыр новйӧтам Дӧсвидзись Исуслісь кулӧмсӧ, медбы и оланыс Сылӧн тыдаліс миян вывтырын. 11Миянӧс, ловьяэсӧ, пыр кулӧмӧдз воштӧны Исусыс понда, медбы миян кулан вывтырын тыдаліс Сылӧн оланыс. 12Сідзкӧ, кулӧмыс керӧ ассис уджсӧ миян вывтырын, а оланыс ─ тіянын.
13Вежа Гижӧтас висьталӧм: «Ме вериті, сійӧн баиті». Миян эд веритан лолыс сія жӧ. Сідз и мийӧ веритам, сійӧн и висьтасям. 14Мийӧ тӧдам: Дӧсвидзись Исуссӧ ловзьӧтіс Еныс. Сія Исусыс пыр и миянӧс ловзьӧтас, ӧтлаын тіянкӧт сувтӧтас одзас. 15Быдӧс эта керсьӧ тіян понда, медбы Еныслӧн унася-уна бурсетӧмыс йиджис быд сьӧлӧмӧ. Сэк и ошкыны да буркывтны Енсӧ унажыкӧн пондасӧ.
Пырсясӧ видзчисьӧм
16Сійӧн мийӧ огӧ ӧшӧтӧ юрнымӧс. Миян вывтырным кӧть и бырӧ-вынтӧмсялӧ, пытшкным эд лунісь лунӧ вильмӧ. 17Мийӧ ӧні мымдакӧ пессям-мырсям. Пессьӧм-мырсьӧмным абу сьӧкыт, а вайӧ миянлӧ лыдтӧм#4:17 лыдтӧм ─ бессчётный пырся ошкӧм-югьялӧм. 18Мийӧ эд видзӧтам тыдавтӧмыс вылӧ. Огӧ видзӧтӧ тыдаланаыс вылӧ. Тыдаланаыс эд мыйкӧ дырна кежӧ, а тыдавтӧмыс ─ пыр кежӧ.
Currently Selected:
2 Коринфын оліссезлӧ 4: БЮ19
Highlight
Share
Copy
Want to have your highlights saved across all your devices? Sign up or sign in
