2 Коринфын оліссезлӧ 2
2
1Ме юрам пукті: ог лок тіян дынӧ бӧра сьӧлӧмнытӧ дзугыльтны. 2Ме кӧ тіянӧс тӧждісьӧмӧдз вошта, кин нӧ менӧ гажӧтас? Оз я сія, кӧда месянь тӧждісьӧ? 3Эта йылісь ме и гижлі тіянлӧ, медбы локтӧмӧ коста эз понды сьӧлӧмӧ доймыны ны понда, кӧднасянь меным колӧ гажмыны. Ме эд тӧда: менам гажыс ─ быдӧннытлӧ гаж. 4Одзза гижӧтсӧ гижикам ме ёна тӧжді, сьӧлӧмӧ доймис тіян понда синва петтӧдз. Гижи не сы понда, медбы сьӧлӧманыт шогсӧ вайны. Гижи, медбы вежӧртіт: ме тіянӧс ёна радейта.
5Ме ог висьтав содтӧмӧн. Кин менӧ вайӧтіс тӧждісьӧмӧдз, сія мымдакӧ и быдӧннытлӧ вайис сьӧлӧм шогсӧ. 6Сія мортлӧ тырмас, мый сылӧ павкис ни унасянь тіянсянь. 7Ась сія оз ӧшӧт юрсӧ ёна тӧждісьӧмсянь. Тіянлӧ колӧ сійӧ проститны да бурӧтны. 8Сійӧн кора тіянӧс: мыччалӧ сылӧ ассиныт радейтӧмнытӧ. 9Ме эд сы понда и гижи, медбы тӧдны, пыр я тійӧ кывзісят? 10Кинӧс проститат кӧ, сійӧ и ме простита. И кинӧс ме простита, эм кӧ мый понда, простита Кристос одзын тіян понда. 11Сэк сотанаыс миянлӧ умӧльсӧ оз кер. Мийӧ эд тӧдам, мый сія юрас видзӧ.
Бур Юӧр нуӧтан удж
12Кристосыс йылісь висьтасьны Бур Юӧрсӧ ме локті Троадаӧ. Сія карын висьтасьны Дӧсвидзисьыс меным ыбӧссӧ осьтӧм. 13Ме сэтчин эг адззы Тит вонӧс, сысянь сьӧлӧмӧ ӧддьӧн пессис. Сійӧн сэтчиніссескӧт кольласи да муні Македонияӧ.
14Ошкам Енсӧ! Миянӧс, Кристоскӧт ӧтлаасьӧммесӧ, Сія нуӧтӧ, пыр сетӧ быдӧс вермавны. Миян отсӧтӧн Сія сетӧ отирыслӧ тӧдны Ас йывсис. Сія Бур Юӧрыс паськалӧ чӧскыт ру моз. 15Еныслӧ мийӧ Кристослӧн чӧскыт ру. Сійӧ русӧ тӧдӧны и мезмӧммес, и кулӧмас муніссес: 16ӧтіккезлӧ ─ ныр вуж пиньӧвтан кулан ру, а мӧдіккезлӧ ─ оланӧ ловзьӧтан ру. Но кин эта удж вылӧ туйӧ? 17Мӧддэс моз мийӧ огӧ вузасьӧ Еныс Кылӧн. Мийӧ сьӧлӧмсянь висьтасям Кывсӧ, кыдз Еныссянь. Быдӧс керам Еныс одзын Кристосыскӧт ӧтлаын.
Тійӧ ─ Кристослӧн гижӧт
Currently Selected:
2 Коринфын оліссезлӧ 2: БЮ19
Highlight
Share
Copy
Want to have your highlights saved across all your devices? Sign up or sign in
