1 Иоан 4
4
1Донаэзӧ, быд ловлӧ эд веритӧ. Ловвесӧ тӧдмалӧ-видзӧтӧ, Енсянь я нія. Му вылас уна лоисӧ асьнысӧ Енсянь юӧртіссезӧ пуктіссес. 2Ен Ловсӧ тӧдны позьӧ сідз: висьтасьӧ кӧ кин Кристос Исусыс йылісь ─ Сія локтіс пӧ морт вывтырын, то сія лолыс Енсянь. 3Морт вывтырын локтӧм Кристос Исус йылісь лолыс оз кӧ висьтась, сія абу Енсянь, сія Кристос вылӧ лэбтісись антикристсянь. Тійӧ сы йылісь кывліт ни, сія пӧ локтас. Ӧні сія му вылас ни.
4Челядь, тійӧ Енсянь. Тійӧ вермит нійӧ, кӧдна асьнысӧ пуктӧны Енсянь юӧртіссезӧ. Тіян пытшкын Олісьыс эд вынажык му вылісьысся. 5Нія му вылісьыссянь. Сійӧн и баитӧны му выліссес сьӧрті и му выліссес кывзӧны нійӧ. 6А мийӧ Еныссянь. Енсӧ тӧдіссес миянӧс кывзӧны. Абу кӧ кин Енсянь, сія оз кывзы миянӧс. Сы сьӧрті позьӧ тӧдны быльыслісь ловсӧ да ылӧтлісьыслісь ловсӧ.
Енлӧн радейтӧм
7Донаэзӧ, пондам радейтны ӧтамӧднымӧс. Радейтӧмыс эд локтӧ Енсянь. Быд радейтісьыс шогмис Енсянь, тӧдӧ Енсӧ. 8Оз кӧ кин радейт, сія оз тӧд Енсӧ. Еныс эд и эм радейтӧмыс. 9Еныс миянлӧ мыччаліс Ассис радейтӧмсӧ. Сія ыстіс му вылас Ассис ӧтка Зонсӧ, медбы Сы пыр сетны миянлӧ олан. 10Енсӧ миян радейтӧмным абу радейтӧм. Былись радейтӧмыс то мыйын: Еныс миянӧс радейтӧ. Сія ыстіс Ассис Зонсӧ вештісьны миян умӧль керӧммез понда.
11Донаэзӧ, Еныс кӧ сідз радейтӧ миянӧс, и миянлӧ колӧ радейтны ӧтамӧднымӧс. 12Енсӧ некӧр некин эз адззыв. Радейтам кӧ ӧтамӧднымӧс, сэк Еныс олӧ миян пытшкын. Сэк и Сылӧн радейтӧмыс поздісьӧм ни миян пытшкын.
13Олӧ я Еныс миян пытшкын, а мийӧ Сы пытшкын, тӧдам Лолыс сьӧрті. Еныс миянлӧ сетіс Ассис Ловсӧ. 14Мийӧ адззылімӧ да висьталамӧ: Айыс ыстіс Зонсӧ мездыны отирсӧ. 15Мортыс шуӧ кӧ Исуссӧ Енлӧн Зонӧн, сэк Еныс олӧ сія морт пытшкын, а сія ─ Еныс пытшкын. 16Мийӧ пондім тӧдны да веритны: Еныс миянӧс радейтӧ.
Еныс ─ радейтӧм. Радейтӧмын олісьыс олӧ Еныс пытшкын, а Еныс олӧ сы пытшкын. 17Радейтӧмыс миян пытшкын поздісис. Сідзкӧ, мийӧ повтӧг панталамӧ Суд Лунсӧ. Мийӧ эд эстӧн му вылас вачкисям Кристосыс вылӧ. 18Радейтӧмын абу полӧмыс. Вынася-вына радейтӧмыс вашӧтӧ полӧмсӧ. Мортыс кӧ полӧ мыжйӧмись, радейтӧмыс абу на поздісьӧм сыын.
19Пондам радейтны Енсӧ, одзжык эд Сія пондіс радейтны миянӧс. 20Баитӧ кӧ кин, ме пӧ радейта Енсӧ, а ачыс тай синӧн оз вермы видзӧтны воныс вылӧ, сія мортыс бӧбӧтчись. Сія оз радейт син одзас олісь вонсӧ. Вермас я сія радейтны адззывлытӧм Енсӧ? 21Миян эм Сылӧн сэтшӧм тшӧктӧм: Енсӧ радейтісьыс ась радейтӧ и вонсӧ.
Веритӧмӧн умӧльсӧ вермӧм
Currently Selected:
1 Иоан 4: БЮ19
Highlight
Share
Copy
Want to have your highlights saved across all your devices? Sign up or sign in
