1 Коринфын оліссезлӧ 1

Гижны пондӧтӧм

1Гижӧ Павел, Кристос Исуслӧн апостол. Еныслӧ вӧлі колӧм корны менӧ, медбы керны апостоллісь удж. Ӧтлаын мекӧт гижӧ Сосфен вонным. 2Гижам Коринфӧ Енлӧн вичкулӧ#1:2 вичку ─ церковь, община верующих. Еныс корис тіянӧс лоны вежа отирӧн. Вежаэзӧн тійӧ лоит Кристос Исускӧт ӧтлаасьӧмсянь. Гижам и мӧдіккезлӧ, кӧдна быдлаын миян моз корӧны Дӧсвидзись Кристос Исуссӧ нимнас. 3Бурсетӧм#1:3 бурсетӧм ─ благодать да лӧнь олан#1:3 лӧнь олан ─ мир тіянлӧ Ен Айнымсянь да Дӧсвидзись Кристос Исуссянь!

Енсӧ ошкӧм

4Дугдывтӧг буркывта#1:4 буркывтны ─ благодарить Ассим Енӧс Сылӧн бурсетӧм понда, кӧдӧ Сія козьналіс тіянлӧ Кристос Исус пыр. 5Исускӧт ӧтлаасьӧмсянь тіян быдӧс тырмӧ: кужат баитны, уна тӧдат. 6Кристос йылісь висьталӧмыс поздісьӧм ни тіян сьӧлӧммезын. 7Сідзкӧ, миян Дӧсвидзись Кристос Исуснымлісь локтӧмсӧ видзчисьтӧн тіян верман-кужан козиннэс#1:7 верман-кужан козин ─ дарование, духовный дар эмӧсь тырмӧмви. 8Еныс вынсьӧтас тіянӧс видзсьыны медбӧрӧдз, медбы миян Дӧсвидзись Кристос Исуслӧн локтан Лунӧ тіян эз вӧв ӧтік умӧль керӧм. 9Еныс надейнӧй, Сія корис тіянӧс ӧтлаасьны Аслас Зонкӧт ─ миян Дӧсвидзись Кристос Исускӧт.

Ӧтлаын видзсьыны тшӧктӧм#1:10 тшӧктӧм ─ заповедь, повеление

10Воннэзӧ, миян Дӧсвидзись Кристос Исус нимӧн тшӧкта: олӧ баитчӧмӧн, эд торйӧтчӧ ӧтамӧд коласаныт. Ась ӧткодь мывкыд да ӧтмоза авйӧм#1:10 авйӧм ─ мышление ӧтлаӧтӧны тіянӧс. 11Менам воннэзӧ, тіян йылісь меным кывсис Клояыс гортіссезсянь, тійӧ ас коласаныт пӧ етшасят#1:11 етшасьны ─ спорить. 12Тійӧ пӧ баитат: ме ─ Павеллӧн, ме ─ Аполлослӧн, ме ─ Кифалӧн#1:12 Кифа ─ апостол Петралӧн арамей кыв вылын ним, а ме ─ Кристослӧн. Ме гижа тіян коласын этадз баитӧмныт йылісь.

13Кристосыс разь янсаліс торрез вылӧ? Павелсӧ разь тіян понда дорисӧ пу вылас? Поди, Павелыс нимӧн тійӧ пыртчит? 14Буркывта ассим Енӧс, Криспся да Гайся ме тіян коласісь некинӧс сэсся эг пырт. 15Сідзкӧ, некин оз вермы висьтавны, ме пӧ сійӧ пырті аслам нимӧн. 16Ме пырті и Стефансӧ гортіссескӧт. Пырті я кинӧскӧ мӧдіккезӧс, ог ни тӧд. 17Кристосыс менӧ эд эз ысты пыртны. Сія ыстіс менӧ висьтасьны Бур Юӧрсӧ. Сійӧ Бур Юӧрсӧ ме ог висьтась морт мывкыдсянь кыввезӧн, медбы Кристослӧн крестыс эз ӧшты вынсӧ.

Кристосыс ─ Енлӧн вын да мывкыд

18Пыр кежӧ кулӧмас муніссеслӧ крестыс йылісь юӧрыс ─ вежӧр ӧштӧмлӧн баитӧм. Но миянлӧ, мезмӧмӧдз муніссеслӧ, сія Енлӧн вын. 19Вежа Гижӧтсис тай лыддьӧтам:

─ Мывкыдаэслісь мывкыднысӧ пукта абутӧм туйӧ,

вежӧраэслісь вежӧрнысӧ ӧштӧта.

20Кытӧн нӧ ыджыт мывкыда отирыс? Кытӧн велӧтчӧм отирыс? Кытӧн эта му вылісь уна тӧдіссес? Еныс эд мыччаліс: эта му вылісь отирлӧн мывкыдныс лоӧ вежӧрнысӧ ӧштӧм. 21Му вылісь отирыс асланыс мывкыдӧн эзӧ вежӧртӧ Еныслісь мывкыда керӧмсӧ. Сэк Еныслӧ ковсис висьтасьӧм юӧр пыр мездыны нійӧ, кӧдна веритасӧ. А отирыс шуӧны, сія юӧрыс пӧ бӧбсорӧн баитӧм. 22Иудейес тай корӧны мыччавны адззывлытӧм керӧммез#1:22 адззывлытӧм керӧм ─ чудо, грек отирыс кошшӧны видзӧтны мыйкӧ мывкыдаӧ. 23А мийӧ висьтасям крест вылас дорӧм Кристос йылісь. Висьтасьӧмнымсянь иудейес падмӧны. Мӧдік отирлӧ сія бӧбсорӧн баитӧм. 24Енлӧн корӧммеслӧ, иудейеслӧ да греккеслӧ, Кристосыс ─ Енлӧн вын да Енлӧн мывкыд. 25Еныслӧн «вежӧр ӧштӧмыс» эд отирся вежӧражык, Еныслӧн «етша выныс» эд отирся вынажык.

26Воннэзӧ, видзӧтӧ ас выланыт, кытшӧмӧсь вӧлітӧ, кӧр тіянӧс корис Еныс. Видзӧтны отир синӧн кӧ, уна я тіян коласын вӧлісӧ мывкыдаэс, вынаэс да вылына пуктӧммес? 27Еныс му вывсис бӧрйис нійӧ, кӧднӧ отирыс пуктӧны мывкыдтӧммезӧ, медбы умӧльтны мывкыдаэсӧ. Вынтӧммесӧ бӧрйис Еныс, медбы умӧльтны вынаэсӧ. 28Эз бӧрйы вылына пуктӧммесӧ, кӧднӧ быдыс тӧдӧ. Бӧрйис абутӧм туйӧ пуктӧммесӧ, медбы лэдзны лэбтӧммесӧ. 29Еныс сідз керис, медбы Сы одзын некин эз вермы ошкыны асьсӧ. 30Тіянӧс Еныс ӧтлаӧтіс Кристос Исусыскӧт. Сія миянлӧ Енсянь мывкыд. Сія миянӧс мездіс, керис Ен сьӧрті веськыта оліссезӧн да вежа отирӧн. 31Сідзкӧ, ась петӧ Вежа Гижӧтас висьталӧм сьӧрті: «Ошшасян кӧ, ошшась Дӧсвидзисьӧн».

Павеллӧн Коринфӧ одзза локтӧм йылісь

Currently Selected:

1 Коринфын оліссезлӧ 1: БЮ19

Highlight

Copy