Loma 10
10
1Gaijiula, bi zhughedene panjizhi Hudase onxian giesanshi Isilie kunlai jiuise giezho. 2Hhela Hudade rexin bikui bi ganzhen beizhoma, zhao unhuaghala ese giezho. 3Hudai gundanni ulie mejiene. Goya gundanine gholughane giezhi Hudai gundanni ulie shunjine. 4Mexihashi guijinni uzhu wo. Jien xianxin giesan kunlai gounide sanane.
Ezhanyi Xiahua Giechen Kunlai Man Jiuine
5Guijinghala gounide sanakui ene shiqinyi giesan kunla amiturane giezhi Musa huaizhoma, 6xianxin giekughala gounide sanaku daolii ingiezhi kieliezho, "Kien asiman jiere khireine giezhi chi zhughedene bu kielie." (Jiushi Mexihani jierese lai bouzheghane giezho.) 7Pse "Kien dozoheide boune giezhi chi zhughedene bu kielie." (Jiushi Mexihani fugusan kun dundase lai khizheghane giezho.) 8Hhe kieliesanshi ene wo, "Hudai kielien chase gholo uwo. Chii amande, zhughede wo." Jiushi bijien chonjisan xianxin gieku daoli wo. 9Chi amandene Ersashi Ezhan wo giezhi chenren giezhi zhughedene Huda hhei fugusan kun dundase aminne olughasei xianxin giese jiuine. 10Kun zhughedene xianxin giese gounide sanane, amandene chenren giese jiuine. 11Jinwun jiere kieliezho, "Jien hhei xianxin giesan kunla jiuren ulie giene." 12Yutai kun, Xila kun yama chabie uwo. Soyuji kunlade niekozi Ezhan wo, hhei xiahua giesan soyuji kunlade dafande ogine. 13"Jien Ezhanni nierei xiahua giesan kunlai jiuine."
14Qinse kun hhei xianxin ulie giese matugie xiahua giene? Hhei chenliezhi ese daodene matugie xianxin giene? Kieme ulie chonjise matugie chenliene? 15Kiemei ese peise matugie chonjine? Jinwun jiere jilasan mutun, "Gouxioxii chonjisan kunlai koronlon zhengiejia seighan wo!" 16Ingieliuzhe kunla man gouxioxini shunjisan pusho. Isaiya kieliezho, "Ezhan, bijien chonjisanyi kien xianxin giewo?" 17Ingiese xianxin giekushi chenliesanse irezho. Chenliesanshi Mexihani kieliense irezho. 18Bi nie asaye. Kunla ese chenliewu? Kenjin chenliezho.
"Hhelai shenqi qienxiade kuruwo.
Hhelai kielien duyani uzhude kuruwo."
19Bi pse asaye. Isilie kun yama ulie mejienu? Mejiene! Xien Musa Hudai kielienyi ingiezhi kieliezho,
"Bi minzude ulie sanaku minzuni tungo giezhi tai dubilieghane.
Bi yama ulie mejiechen minzui tungo giezhi tai hokughane."
20Pse Isaiya danzine fugiedaghazhi Hudai kielienyi ingiezhi kieliezho,
"Mii ese ereisan kunlade bi chujiegheghane.
Mii xiahua ese giesan kunlade bi xienjighane."
21 Isilie kunlade hhe kharei ingiezhi kieliezho,
"Bi niudunie kielien ulie chenliezhi
jianjinduku bexinlai jienliene giezhi khane rouizho."
Currently Selected:
Loma 10: sce
Highlight
Share
Copy
Want to have your highlights saved across all your devices? Sign up or sign in
© 2020-2024 River Street Publishing.
