Feilibi 2

Mexiha Mutun Goyane Meilade Uzhe

1Ingiese Mexihai miende tande sughaku kielien, orezhi sidaghaku, Shenlinghala laiwon gieku, pse renyi, ubali xiiku bise 2tai sumuladan nie gholuzhi nieniedene orezhi nie zhughe gholu. Ingiese bi hende bayasune. 3Yan shiqinniliuzhe zinie goyadene oluzhi bu gie, minshenni tanxin bu gie, goyane meilade uzhezhi kunlai goyasene fugiede uzhe. 4Zinie goyane shiqinni bu gui, kunlai shiqinniye gui.

5Ta zhughene Mexiha Ersai zhughe mutun gholugha.

6Hhende Hudai yanzi winema,

goyane Hudaghala pindane giezhi xiacha ese giedene

7Kharei goyane yanyanjilai bendazhi

hojini yanzi gholuzhi kun mutun oluwo.

Kunni yanzi mutun irese

8Goyane meilade uzhezhi

fugutula shunjiwo,

da shizijia jiere fuguwo.

9Ingiese Huda hhei zui unduni gholughazhi

hhende yanyanji nierese fugie nierei ogiwo.

10Ingie asiman jieredu, zemin jieredu, zemin douradu yanyanjila

man Ersani nierede xiutuliezhi

11Jien kunlai amanla Ersa Mexihashi Ezhan wo giezhi chenren giedene

Huda Adade kuaikui ireghawo.

Duyade Gon Fai

12Ingiese mii orentula, bi tanre hhantu bikude ta chan chenliesan mutun ede bi tai hhende uwokude genjia qingiezhi ayi pugharazhi tai jiuikui shiqinni xiacha giezhi chenjigha. 13Tai sudoro wilie giezhi goya gou isine gieghane giezhi tande duranji gieku nenli ogisanshi Huda wo. 14Ta yan shiqin gieliuzhe boxin bu kielie, bu jianjindu. 15Tande yama kheilaku wizhi ganjintu kun gholu. Ta Hudade yama maobin witu kewosi danlazhi duyade doghun, wirulasan kunlai dunda gon fai. 16Aminni daolii xienjizhi khizhegha. Ingiese bi Mexihani udude goyane belien ese holuzhi belien wilie ese giezho giezhi kuaine. 17Bi tai xianxin giekude oluzhi goyane sidagha gieku teizi jiere mure danlaghazhi chusunne pojieliuzhe bayasuzhi da tanre hhantu bayasune. 18Taye qingiezhi bayasu, da mare hhantu bayasu.

Qimotai Ibafuqighala

19Bi Ezhan Ersai kouizhi Qimotaini tai hhende ghujighande peizhi echighaye giezho. Tai qinkonlai mejiezhi bi zhughene nanranshighane giezho. 20Mare hhantu tande shixinji gonxin giesan kun hhense chugo nieda uwo. 21Psedu kunla man zinie goyane shiqinyi guine, Ersa Mexihani shiqinyi ulie guine. 22Ingieliuzhe Qimotaini kunyi ta mejiene. Hhe goya adane mutun mii uzhezhi mare hhantu gouxioxide oluzhi wilie giezho. 23Ingiese bi goyane shiqinni jiegoi mejiese deigo hhei peizhi echighane giezho. 24Ingie oloncha ulie beidene biye echikui Ezhanyi miende xianxin giezho.

25Ingiezhoma, bi sumulase Ibafuqini tai hhende khareizhi echighaku biyo wine giezho. Hheshi mii gaijiu, lienshou, mare hhantu zhan eghindusan kun wo. Ta hhei peizhi bi xiyo bikude banman gieghale irezho. 26Hhe ta dajialai hende sanazhi, da hhe giemeresei ta mejiese hhe hende nango giezho. 27Shuhua hhe giemerezhi fugukude kuruwoma, ingieliuzhe Huda hhende ubali xiizhi madeye ubali xiizho. Pse bi genjia yuchou giene. 28Ingiese bi genjia jindazhi hhei peizhi echighaye. Ta hhei chanlase bayasune, mii yuchou giekuye choghonshine. 29Ta Ezhanyi miende hende bayasuzhi hhei jienlie. Imutu kunlai zunzhun gie. 30Ta made banman gie dasande hhe banman giezhi Mexihai wiliede oluzhi chabudu aminni widawo.

Currently Selected:

Feilibi 2: sce

Highlight

Copy

Compare