Румазухъе кагъат 16

16 бетӀер

Павелица салам битӀулеб буго

1Дица, божилъи гьабун, нужехъе йитӀулей йиго Кенхреялда бугеб иман лъуразул агьлуялъе хъулухъ гьабулей гӀадан, нилъерго диналъул яц Феба. 2ТӀадегӀанасе гӀоло нужеца гьелда дандчӀвай гьабе Аллагьасул халкъалда рекъолеб къагӀидаялъ. Гьелъие къваригӀараб-таралъул рахъалъ кумекги гьабе. ГӀемерал гӀадамазеги диеги кумек гьабурай гӀадан йиго гьей.

3Салам буго дида цадахъ МасихӀ ГӀисае хъулухъ гьабулел ругел Прискилладеги Аквиладеги. 4Дун сабаблъун хвел тӀаде босизегицин разилъун хӀалтӀана гьел. Цо дица гуребги, цогидал халкъазда гьоркьоса ругел иман лъуразул тӀолабго агьлуялъги баркала кьола гьезие. 5Гьезул рокъоб данделъулеб иман лъуразул агьлуялдаги бице дир салам. Асиялда тӀоцебе МасихӀиде иман лъурав, дие хирияв Эпенетидеги буго дир салам. 6ГӀемерго цӀакъ нужее пайдаялъе хӀалтӀарай Марямидеги салам.

7Дида цадахъ туснахъалъур рукӀарал дирго халкъалъул гӀадамазде – Андроникидеги Юниядеги буго дир салам. Чапарзабазда гьоркьор машгьурал ва дидасаги цере МасихӀиде иман лъурал чагӀи руго гьел. 8ТӀадегӀанас дун жиндехун вухьинавурав Амплиатидеги салам. 9Дида цадахъ МасихӀие хъулухъ гьабулев вугев Урбаниде ва дие хирияв Стахисиде салам. 10МасихӀида божиялъулъ хӀалбихьарав Апеллесидеги салам. Аристобулил рукъалъул агьлуялдеги салам. 11Дир халкъалъул чи Гьеродионидеги салам. Наркисил рукъалъул агьлуялда гьоркьоса иман лъураздеги салам. 12ТӀадегӀанасе гӀоло хӀалтӀарал Трифенадеги Трифосадеги салам. ТӀадегӀанасе гӀоло цӀикӀкӀун хӀалтӀарай, дие хирияй Персидадеги салам. 13ТӀадегӀанас тӀаса вищарав Руфусиде ва диеги эбеллъун лъугьарай гьесул эбелалде салам. 14Асинкритиде, Флегониде, Гьермесиде, Патробасиде, Гьермасиде ва цогидалги гьезда цадахъ ругел вацаздеги буго дир салам. 15Филологиде ва Юлияде, Нерейиде ва гьесул яцалде, Олимпасиде ва цогидалги гьезда цадахъ ругел Аллагьасул халкъалъул гӀадамаздеги буго дир салам. 16Муъминал вацаз гӀадин, цоцазда баун, салам гьабе. МасихӀиде иман лъуразул киналго жамагӀатазул рахъалдасанги буго нужеде салам.

17Нужеда гьоркьоб рагӀи дандеккунгутӀи бижизабулел, нужее насиблъараб божи-иманалда дандечӀолел ва нужеда малъарабщиналъе квекӀенги гьабулел гӀадамаздаса цӀунеян гьарулеб буго, вацал, дица нужеда. Нуж гьездаса рикӀкӀад чӀа. 18Нилъер ТӀадегӀанав МасихӀие гуребха гьез хъулухъ гьабулеб, жидерго квешал къасдазейин. Бадибе рецц гьабун ва бахьинго кӀалъан гуккула гьез жагьилзаби. 19Киназдаго лъала Рохалил хабаралъе нуж ритӀухъал рукӀин. Дунги гьелдаса вохун вуго. ЛъикӀлъи гьабиялъулъ гӀакъилзабилъунги, квешлъи гьабиялъулъ жагьилзабилъунги рукӀине бокьун буго дие нуж. 20Нужеде сах-саламалъи рещтӀинабулев Аллагьас кватӀичӀого нужер хӀатӀикь тӀамила илбис. Нилъер ТӀадегӀанав ГӀиса МасихӀил цӀоб лъеги нужеда.

21Нужеде салам буго дир кумекчи Тимофейил, дир халкъалъул гӀадамаллъун ругел Лукийил, Ясонил ва Сосипатрил. 22Гьаб кагъат жиндир квералъ хъварав Тертийилги буго нужеде ТӀадегӀанасул цӀар рехсараб салам.

23Жиндир рокъоре иман лъуразул агьлу данделъулев, гьобол хирияв дир хважаин Гайилги буго нужеде салам. Шагьаралъул хазина цӀунулев чи Эрастилги буго салам. Нижер вац Квартилги буго салам.

Кагътил ахиралда гьари-дугӀа

25Нужер божи-иман щулалъизабулев Аллагьасе рецц. Гьеб божи-иманалъул хӀакъалъулъин Рохалил хабаралъ бицунеб бугеб. Чанго гӀасруялъ балъгояблъун букӀарабги загьир гьабун, ГӀиса МасихӀил хӀакъалъулъ бицунеб буго дицаги. 26Аварагзабазул ТӀухьдуздасан загьирлъана гьанже гьеб балъголъи. Абадияв-даимав Аллагьасе бокьана киналго халкъазда гьеб лъазе ва мутӀигӀлъун гьез иман лъезе. 27ГӀиса МасихӀги рехсон, рецц гьабилин нилъеца гӀелму-гӀакълу камилав цо вугев Аллагьасе! Амин.

Currently Selected:

Румазухъе кагъат 16: АварАК

Highlight

Copy