Румазухъе кагъат 15

15 бетӀер

МасихӀидаса мисал босе

1Диналъулъ щулалъун ругел нилъеца, нилъеего пайдаялъе хӀалтӀичӀого, загӀипазе кумек гьабизе ккола, гьезие бакӀлъараб гьир баччизе. 2Нилъер щивав чиясда тӀадаб буго аскӀов вугесул божи-иман щулалъулеб пайдаяб иш гьабизе. 3МасихӀиеги бокьулароан жиндиего пайда. ГӀадада гуро ТӀухьдузда хъван бугеб: «Мун хӀакъир гьавуразул хӀакъирал рагӀабаз хӀакъир гьавулев вуго дун». 4ТӀухьдузда бугебщинаб хъван буго, гьездасан нилъее къвакӀиги сабруги хӀалае ккун, рекӀелъ хьул цӀунизе. 5КъвакӀиги сабруги нилъее кьолев Аллагьас тӀубанго рагӀи данде ккезабеги нужер, МасихӀ ГӀисада нахърилълъун, 6нужеца киназго, цо кӀалдисан кӀалъарал гӀадин, нилъер ТӀадегӀанав ГӀиса МасихӀил Эмен – Аллагьасе рецц гьабизе.

7МасихӀица нужее лъикӀлъи гьабураб гӀадин, нужецаги цоцазе лъикӀлъи гьабе, Аллагьасе гьабулеб рецц гьелдалъун цӀикӀкӀине. 8ЖугьутӀазе хъулухъалъе чӀана МасихӀ, Аллагьас жиндирго рагӀи кколеблъиги ва гьезул умумузе гьабураб къотӀи гьес хвезабулареблъиги гьезда бихьизабизе гӀоло. 9Гьединго жидеда цӀоб лъуралъухъ цогидал халкъазги Аллагьасе рецц гьабизе гӀологи. Гьелъул хӀакъалъулъ ТӀухьдузда хъван буго: «Цогидал халкъазухъе ун, дица дуе рецц гьабила, дур цӀар рехсон, туркабиги ахӀила», – ян. 10Цоги хъван буго: «Цогидал халкъал, нужги роха Аллагьасул халкъалда цадахъ!» – ан. 11Цоги: «Ле, киналго халкъал, БетӀергьанасе рецц гьабе! Биччанте киналго къавмаз гьесие рецц гьабизе!» 12Ишая аварагасги абулеб буго: «Иешайил кьибилалдасан кӀанцӀараб цо чӀор, гьесул наслуялъул чи вачӀина халкъазего ханлъи гьабизе, гьесде букӀина гьезул хьул», – ан

13Нужее гьединаб хьул насиблъизабурав Аллагьасда нуж божулел ругелъул, гьес нужеде рохелги рекъелги рещтӀинабеги. Илагьияб РухӀалъул къуваталдалъун нужер хьулги цӀикӀкӀаги.

Кагъат хъваялъе гӀилла

14Дир тӀубанго ракӀчӀун буго, вацал, нужелъ лъикӀлъи цӀикӀкӀун бугеблъиялда, кинабгоги нужедаго лъалеб букӀиналда, цоцазе насихӀат гьабизе гьунарги нужелъ букӀиналда. 15Амма гьедин букӀаниги, щибго бахчичӀого, гьаб кагъат хъвалеб буго, цо-цо жал нужеда ракӀалде щвезаризе бокьидал. Аллагьас дида тӀадкъан бугелъулха 16цогидал халкъазда гьоркьов ГӀиса МасихӀие хъулухъ гьабулев чилъун вукӀайилан. Аллагьасе хъулухъ гьабун ва Рохалил хабар тӀибитӀизабун Илагьияб РухӀалъ бацӀцӀад гьабураб ва гьев разияб къурбан гӀадин, цогидал халкъал Аллагьасухъе рачине тӀадкъан буго дида.

17Гьединлъидал, ГӀиса МасихӀиде цолъарав дун чӀухӀизе бегьула Аллагьасе гӀоло дицаго гьарурал ишаздаса. 18Гьедин абизе хӀинкъуларо, дун гьоркьов ккун, МасихӀица гьабуралъул хӀакъалъулълъидал дица бицунеб бугеб. Гьес гьеб гьабуна мажусиялги Аллагьасе мутӀигӀлъизе гӀоло, гьабуна рагӀудалъунги ишаздалъунги, 19гьабуна кутакал гӀаламатазулги мугӀжизатазулги къуваталдалъун, Илагьияб РухӀалъул къуваталдалъун. Иерусалималдаса бахъараб Иллирикалде щвезегӀан тӀибитӀизабуна дица МасихӀил хӀакъалъулъ Рохалил хабар. 20Дица кидаго хӀаракат бахъулаан, МасихӀил цӀар жеги рехсолебцин рагӀичӀеб бакӀалде ун, гьеб Рохалил хабар гьездаги лъазабизе. Цогидаз кьучӀ тӀамураб мина базе бокьун букӀинчӀо дие. 21ТӀухьдузда хъван бугелъулха: «Гьесул хӀакъалъулъ жеги бицинчӀезда вихьила, гьесул хӀакъалъулъ рагӀичӀезда вичӀчӀила», – ян.

Павелида ракӀалда буго Рималде ине

22Гьеле гьединлъидалин, къватӀиве вахъине чанцӀулго къачӀан вукӀаниги, гьанжелъизегӀан нужехъе вачӀинчӀого хутӀарав. 23Гьаб ракьалда гьанже дун хӀалтӀизе кколеб бакӀ хутӀун гьечӀелъул ва гӀемерал соназ нужехъ гӀащикълъунги вугелъул, 24дида ракӀалда буго, Испаниялде унаго нужехъе вачӀине. Гьениве унаго нухдасан нужехъе щвезе, ва дагьаб мехгӀаги нужеда аскӀоб бан, чӀалгӀен буссине бокьун буго. Цоги, дир хьул буго гьеб сапаралъ вахъине ккани дие хӀажалъулеб жоялдалъун нужеца кумек гьабилиланги. 25Гьанже дун Иерусалималде инехъин вуго, гьениб Аллагьасул халкъалъе хъулухъ гьабизе. 26Иналъе гӀиллаги бицинин: Македониялъулги Ахаялъулги иман лъураз хӀукму гьабун буго Иерусалималда ругел мискинал диналъул вацазе кумек гьабизе. 27Гьебни лъикӀаб хӀукму буго, амма хӀакъикъаталдаги дозие налъукь руго гьал. ЖугьутӀаз гьазие илагьиял ишазулъ квербакъидал, цогидал халкъаздасан ругел вацазги дуниялалъул ишазулъ дозие квербакъизе ккеларищ?

28Гьеб къваригӀелги тӀубан, дозие бакӀарараб садакъадул гӀарац дицаго гьенибе щвезабураб мехалъ, гьенисан Испаниялде ина ва нухдасан нужехъе щвезеги вачӀина. 29Дун нужехъе вачӀараб мехалда, дидалъун МасихӀица нужее баркат гьарзалъизабилеблъи лъала дида.

30Нилъер ТӀадегӀанав ГӀиса МасихӀие гӀоло ва РухӀалъ кьолеб рокьуе гӀоло гьарулеб буго дица нужеда, дунги рехсон, нужецаги Аллагьасе тӀадчӀун гьари-дугӀа гьабеян. 31Нужеца гьаре Ягьудиялда ругел иман лъечӀезул заралалдаса дун цӀунеян ва дица доба гьабизехъин бугеб иш Иерусалималда бугеб Аллагьасул халкъалъ лъикӀго къабул гьабегиян. 32Аллагьас хъван батани, дун нужехъе вачӀина. Гьелдаса цӀакъ вохила, рекӀее хӀалхьи лъугьина. 33Аллагьасул салам лъеги нужеда киназдаго.

Амин.

Currently Selected:

Румазухъе кагъат 15: АварАК

Highlight

Copy