ГӀакъилал рагӀаби 8
8
БЕТӀЕР 8
ГӀакъиллъиялъе рецц!
1ГӀакъиллъи гуродай ахӀдолеб бугеб,
гӀакълуялъ гуродай ахӀи балеб бугеб?
2Нухал рорхатал бакӀазда
ва нухал рикьулел бакӀазда чӀун буго гьеб гӀакъиллъи.
3Шагьаралъул кавудухъ чӀунги,
щибаб рукъалъул нуцӀикӀалтӀа чӀунги
ахӀи балеб буго гьеб:
4«Нужедейин, гӀадамал, дун ахӀдолеб бугеб,
кинабго халкъалдейин дица гьаракь гьабулеб бугеб!
5Ле жагьилал гӀадамал,
нужеего гӀелму-лъай тӀалаб гьабе!
Ле гӀабдалзаби,
гӀакълу гӀадахъ босе!
6Дихъ гӀенекке нуж, пайдаяб жойин дица бицинехъин бугеб,
битӀараб бицинейин дица кӀал бичӀизехъин бугеб.
7ХӀакъаб гуреб рагӀи бачӀунаро дир мацӀалде,
гьересиги буго дир кӀутӀбузе сурукъаб-къабихӀаб жо.
8Дир кӀалдисан бачӀараб щибаб рагӀи битӀараб букӀуна,
хӀилла-рекӀкӀги мекълъи-тӀекълъиги букӀунаро гьезулъ.
9БичӀчӀулев чиясе хӀакъал рагӀаби руго гьел,
лъай бугесе ритӀухъалги руго.
10ГӀарац-месед балагьичӀого,
дир малъа-хъвай босе,
багӀараб месед тӀалаб гьабичӀого,
гӀелму-лъай тӀалаб гьабе.
11Маргъал-якъуталдасаги лъикӀаб буго дун,
ва дуе бокьулебщинаб жоги дида данде кквезе бажаруларо.
12Дилъ – гӀакъиллъиялъулъ буго сундаго нахъгӀунтӀи
ва дида батула пикру камиллъулеб гӀелму-лъайги.
13БетӀергьанасукьа хӀинкъи –
гьеб ккола квешабщиналде рокьукълъи.
Дие рихараб буго чӀухӀи-пахрулъи,
ва квешлъиялде нух,
ва гьереси бицунеб кӀал.
14ГӀакълу кьезеги лъала дида,
кумек гьабизеги кӀола дида.
Дилъ гӀакълу-насихӀат буго,
дилъ къуват-гуч буго.
15Дидалъунин парччахӀзабаз парччахӀлъи хӀалтӀизабулеб,
хӀакимзабаз битӀараб диванги къотӀулеб.
16Дидалъунин ханзабаз ханлъи гьабулеб,
киналго къиралзабаз ритӀухъго хӀукмуги гьабулеб.
17Дун бокьулел диеги рокьула,
балагьизе лъугьаразда батулебха дун!
18Дидасан буго бечелъи ва къадру-къимат,
тӀасаго унареб боцӀи-рикъзи ва лъикӀаб бетӀербахъи.
19Дидасан щолеб жо
лъикӀаб буго багӀараб меседалдаса,
дидасан лъугьунеб жоги
лъикӀаб буго хъахӀаб гӀарацалдаса.
20Дун уна ритӀухълъиялъул нухдасан,
ритӀухъаб хӀукмуялъул нухдасан.
21Дун бокьулезе кьезе бечелъиги буго дир,
гьезул гъансалги хазинадул цӀезарула дица.
22Бищунго цебе бижана дун БетӀергьанас,
цӀакъго некӀсияб заманалдаго букӀана дун.
23Сундасаго цебе – авалалдаго бижана дун,
дуниял бижилалдего бижана.
24Дун бижараб мехалъ гъваридал ралъадал рукӀинчӀо,
лъим гьарзаял иццалги рукӀинчӀо.
25МугӀрул рорхизарилалдего,
гохӀал лъугьинарилалдего бижана дун.
26БетӀергьанас жеги ракьги, гьенир хурзалги,
ракьул тӀоцересел гӀеркъалги рижилалдего букӀана дун.
27Гьес зобал къачӀалеб мехалъ, дун гьениб букӀана.
НекӀсияб ралъдатӀа гьаб дуниял бижизе бакӀ тӀаса бищун,
гор лъугьинабун Гьес хӀучч цӀалеб мехалдаго букӀана дун.
28Гьес зобалазда накӀкӀал чӀезарулеб мехалдаго,
некӀсияб ралъадалдасан
лъарал-гӀорал чвахизарулеб мехалдаго букӀана дун.
29Жиндир амру хвезабун,
ралъдал лъим къватӀибе чвахунгутӀизе,
Гьес гӀурхъи чӀезабураб
ва ракьалъе кьучӀ лъолеб мехалдаго букӀана дун.
30Гьебмехалда дун букӀана
Гьесие хӀалтӀулеб устарлъун,
щибаб къоялъ Гьесие рохеллъун.
Кидаго Гьесдаса бохун букӀунаан дунги.
31Бохун букӀунаан гьаб дуниялалдаса,
дуниялалда Гьес бижараб гӀаламалдаса
разиго букӀунаан.
32Ворея, гӀадамал, гӀенекке гьанжеги дихъ:
гьардарал гурищха дир нухал цӀунарал чагӀи.
33ГӀенекке дир малъа-хъваязухъ,
гӀакъилаллъун рукӀа, гьел рехун тоге.
34Гьардарав гурищ щибаб къоялъ дир кавудухъ ворчӀуда чӀун
ва дир нуцӀил рагьумахӀуялда цеве хъаравуллъуда чӀун,
дихъ гӀенеккулев чи.
35Дун жиндие щварав чиясе чӀаголъиги щола,
БетӀергьанги разилъула гьесдаса.
36Дида хьолбохъан арас жиндиего зарал гьабула;
дун бокьуларелщиназе хвел бокьула».
Currently Selected:
ГӀакъилал рагӀаби 8: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
