ГӀакъилал рагӀаби 4
4
БЕТӀЕР 4
ГӀакъиллъиялъул пайда
1Инсул малъа-хъваялъухъ гӀенекке, васал,
лъикӀго гӀинтӀаме, нужеего гӀакълу щвезе.
2ЛъикӀаб гӀакълуйин дица нужее кьолеб бугеб.
Дир амруги рехун тоге нужеца.
3Дунги вукӀана дирго инсул васлъун
ва дирго эбелалъул хӀеренав-недегьав
ва цохӀо вугев рижилъун.
4Дие гӀакълу кьун, гьес дида абулаан:
Дир рагӀаби рекӀелъе риччай;
дир амруялда рекъон хьвадани, чӀаго хутӀила мун.
5ГӀакъиллъи тӀалаб гьабе, гӀакълу-насихӀат тӀалаб гьабе.
Дир кӀалдисан рачӀарал рагӀаби кӀочон тоге,
дица малъаралдаса кьуруге.
6ГӀакъиллъи рехун тоге, гьелъ цӀунила мун;
гьеб бокьа дуе, гьелъ тӀалаб-агъаз гьабила дур.
7ГӀакъиллъиялъул аслу сундулъ бугеб?
ГӀакъиллъи тӀалаб гьабун, дурго бечелъиги кьун,
бичун босе дуца гӀакълу-насихӀат.
8ГӀакъиллъи дуца кӀодо гьабе, гьелъ мунги кӀодо гьавила,
дуца гьелда къвал бай, гьелъ дур къадру-къимат борхизабила.
9Дур бетӀералда тӀад берцинал тӀугьдузул гор лъела гьелъ,
гьайбатаб тажги щвезабила дуе.
10Я дир вас, дихъ гӀенекке мун, дир рагӀабиги гӀадахъ росе –
гьелдалъун дур гӀумру халалъила.
11Дица дуда бихьизабулеб буго гӀакъилаб нух,
битӀараб шагьраялдасанги вачунев вуго дица мун.
12Вилълъун унаго, гали бахъизе захӀмалъиларо дуе,
векерун унагоги, хӀетӀе гӀодоб чӀваларо.
13Малъа-хъвай щулаго ккве, ккун чӀезабе,
рекӀелъ цӀуне – дур чӀаголъийин гьеб кколеб.
14Пасикъал гӀадамазул нухде лъугьунге мун,
квешазул шагьраялдасанги хьвадуге.
15Гьеб нух рикӀкӀад гьабе, гьеб нухдасан унге,
гьебги жибго тун, хьибилалдасан а.
16Квешлъи гьабичӀого гьезул бер данде унаро,
цо щивниги кӀалагъоркье речӀчӀизавичӀони,
гьезул макьу тӀурула!
17Гьез хӀарамлъи-пасалъи гьабула, чед кваналеб гӀадин,
Гьез зулму-хӀалги гьабула, чагъир гьекъолеб гӀадин.
18Муъминзабазул нух релълъуна баккудасаго бакъул кунчӀиялда,
цинги къалъуде щвезегӀан гвангъулебго гвангъулеб букӀуна гьеб.
19Квешал гӀадамазул нух бецӀаб букӀуна,
киб хӀетӀе хъущтӀилебали лъаларо гьезда.
20Я дир вас, дир рагӀабиги гӀадахъ росе,
дир каламалда гъоркье гӀинги ккве.
21Дуца берзукьа риччаге гьел, рекӀел тӀинда цӀуне.
22Гьел рагӀаби жидеда ратаразе чӀаголъи щола,
гьезул чорхое дарулъунги лъугьуна.
23Дурго хазинаялдаса цӀикӀкӀун цӀуне дурго ракӀ,
гьенисанлъидал чвахулел чӀаголъиялъул иццал.
24Дурго кӀалзул макру-гьереси аскӀоса бачахъе,
мацӀалзул хӀилла-рекӀкӀги рикӀкӀад гьабе.
25Дур берал ритӀун ралагьизе те,
дур балагьиги дудаго цебе буссинабе.
26БитӀараб нух тӀаса бищани,
киве аниги хӀинкъи букӀинаро дуе.
27Я квараниса, яги квегӀиса сверуге мун;
дурго хӀетӀги квешлъиялдаса рикӀкӀад гьабе.
Currently Selected:
ГӀакъилал рагӀаби 4: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
