ГӀакъилал рагӀаби 27
27
БЕТӀЕР 27
1Метерисеб къоялъул бицун веццаруге,
метер къо кинаб бачӀинебали лъаларин.
2Мунго дуцаго веццуге – цогидас веццизе виччай,
дурго кӀалалъ гуреб, чияр кӀалалъ веццеян абе.
3ГамачӀ бакӀаб жо буго, салиги баччизе захӀмалъула,
амма гӀабдаласдасан балагь – бищунго бакӀаб гьир.
4Ццин – гьалагаб жо, гьалаглъиги – щвараб гӀор гӀадаб жо,
амма щакдариялда данде чӀезе кӀолев чи щив вукӀунев?
5Рагьун гӀайиб чӀвай лъикӀ,
къватӀибе загьирлъулареб рокьиялдаса.
6Гьудуласдасан ругъун щваниги, божилъи холаро,
тушманас убачал гьаруниги, гьесда божизе бегьуларо.
7ГӀорцӀарав чиясе найил гьоцӀоги рихуна,
вакъарасе кьогӀабщинабги гьуинлъула.
8Бусен рехун тун унеб хӀанчӀида релълъуна
жиндирго рукъ рехун тун унев чи.
9МахӀберцинал хурдуцаги
махӀгьуинаб нахуцаги
ракӀ авадан гьабула,
гьудуласул гьуинлъи –
гьес кьураб гӀакълуялъулъ загьирлъула.
10Дурго гьудулги ва инсул гьудулги рехун тоге,
дуде къварилъи бачӀараб къоялъ вацасул къавулъе унге:
рикӀкӀада вугев вацасдаса гӀагарда вугев мадугьал лъикӀ.
11Я дир вас, гӀакъилавлъун вукӀа мун
ва дир ракӀ бохизабе.
Дун гӀодовегӀанлъизавулезе жаваб кьезе
кӀолебин дида гьебмехалъ.
12ЦӀодорав чиясе хӀинкъи бугони, гьев вахчун чӀола,
амма жагьилав чи лъалхъичӀого цеве уна
ва балагьалда дандчӀвала.
13Чияе гъоркье чӀарав чиясухъа ретӀелги бахъе,
гьес рахъ ккуразе гӀоло гьесухъа гъоркьлъелалъе жоги босе.
14Радал хехго вахъун, мадугьаласул рахӀат хвезабун, баркат лъегиян ахӀдей рикӀкӀуна досие нагӀана кьейлъун.
15КӀалквешай лъади релълъуна
цӀадал къоялъ нахъаса къотӀичӀого гӀекколеб тӀохалда.
16Гьей лъади чӀезайизе лъугьарав чи релълъуна
гьури чӀезабизе
яги лъамияб нах кодобе босизе лъугьарав чиясда.
17Махх маххуца бегӀер гьабула,
инсанги инсанас бегӀер гьавула.
18Инжиралъул гъотӀое хъулухъ гьабулес
гьелда тӀаса пихъ кванала,
жиндирго бетӀергьанасе хъулухъалъе чӀарав лагъасулги
хӀурмат гьабула.
19Лъим – инсанасул гьумер жанисан бихьулеб матӀу,
ракӀги – инсанасул гӀамал-хасияталъул матӀу.
20ЖужахӀги Жагьандаманги гӀорцӀи-цӀей гьечӀел жал руго,
инсанасул берги гӀорцӀуларо.
21ГӀарцул хӀалбихьула цӀадул гьелегьиналъ,
меседил хӀалбихьула цӀадул кутакалъ,
инсанасул хӀалбихьула гьесие гьабулеб цӀар-реццалъ.
22Ражихоялъуве рехун ханица чухӀаниги,
гьоцӀиве вачун тӀад лал тӀамуниги,
гӀабдаласдаса гӀантлъи батӀалъуларо.
23Дурго чахъабазе хъулухъ лъикӀ гьабе,
дурго рехъабазул тӀалабги гьабе.
24Бечелъи абадиялъе хутӀулеб жо гурин,
парччахӀлъиялъул тажги
киналго наслабазе ирсалъе щолеб жо гурин.
25МихӀи баккила, гӀурччинхер бижила,
мугӀрузул хер бецун нахъе лъела дуца.
26Чахъабаз ратӀлие квас кьела,
дугӀби ричун, хурзал росила.
27ЦӀцӀаназул рахьги гӀела дуе квание,
рукъалъул агьлуялъе кваниеги ва гъаравашал хьихьизеги.
Currently Selected:
ГӀакъилал рагӀаби 27: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
