ГӀакъилал рагӀаби 26
26
БЕТӀЕР 26
1Риидал бараб гӀазуялда
ва хур лъилъулеб къоялъ бараб цӀадалда релълъуна
гӀабдаласул къадру-къимат гьаби.
2ХӀинчӀ пархун уна, къадако боржун уна, –
гӀайиб-хатӀа гьечӀев чиясе кьураб нагӀанаги, гьесда тӀад чӀоларо.
3Чое – цӀал, хӀамие – чангит,
гӀабдаласул гьодие – гьеб бухизе хьоп.
4ГӀабдаласе гьесул гӀантлъиялда рекъараб жаваб гьабуге,
мунгоги гьесда релълъине гурин.
5ГӀабдаласе гьесул гӀантлъиялда рекъараб жаваб гьабе,
гурони – гьесда ракӀалде ккола живги цӀодорав чи вугилан.
6ГӀабдаласухъ ругьел битӀарав чи релълъуна
жиндирго хӀатӀал къотӀарав ва балагь тӀаде босарав чиясда.
7Бох бекарав чи рекълъичӀого хутӀуларо,
гӀабдаласул кӀалдиб гӀакъилаб кициги рекъон кколаро.
8РечӀчӀулеб чӀор бутӀалда бухьунев чиясда релълъуна
гӀабдаласул хӀурмат гьабулев чи.
9Мехтарасул хъатикь бугеб зазил тӀилалда релълъуна
гӀабдаласул кӀалдиб гӀакъилаб кици.
10Цебе ккаралъубе чӀор речӀчӀулев чиясда релълъуна
цеве ккарав гӀабдал хӀалтӀизе вачунев чи.
11Жинцаго лагӀараб жо кваназе гьве тӀадбуссунеб гӀадин,
гӀабдалги жиндирго гӀантлъиялде тӀадвуссуна.
12Живго жиндаго гӀакъилав-цӀодоравилан кколев чи вихьанищ дуда?
Гьесиеялдаса лъикӀ букӀина гӀабдаласе.
13КӀвахӀалас абула къватӀиб гъалбацӀ бугилан,
къотӀноб гӀасияб жанавар бугилан.
14НуцӀа некьалда тӀад сверула,
кӀвахӀалав чи бусада тӀад сверула.
15КӀвахӀалас квер суркӀиде бегьула,
кӀалалда аскӀобе гьеб босизе захӀмалъула.
16КӀвахӀаласда ракӀалде ккола
гӀакълу кьезе лъалев анкьго чиясдасаги цӀодорав вугин живилан.
17Чияр дагӀба-рагӀиялде гьоркьове лъугьунев чи релълъуна
аскӀосан бекерун унеб гьойдул
кӀиябго гӀин кколев чиясда.
18ГӀадамазде цӀаги хвалил чӀоралги рехулев гӀабдаласда релълъуна
19мадугьал гуккулев
ва цинги гьеб махсара букӀанилан абулев чи.
20ЦӀул гьечӀони цӀа суна,
гьоркьоб мацӀ гьечӀони, дагӀба-рагӀи лъугӀула.
21ЦӀул – цӀа рекӀинабизе,
тӀурччи – цӀа гьелегьинабизе,
кӀалквешав чи – дагӀба-рагӀи ккезабизе.
22МацӀихъанасул рагӀаби – гӀенеккулесе бищунго гьуинаб квен,
лазаталда уна гьел гьесул ургьире.
23ГӀарац тӀаде биччараб щагӀил хъабаялда релълъуна кӀал бахьинав, махьа чӀегӀерав чи.
24ХӀалихьатас жиндирго квешлъи кӀалзуца бахчула,
квешлъи жаниб хӀебтӀараб ракӀги букӀуна гьесул.
25Гьесул каламалъ хӀайранлъизавуниги, гьесда божуге.
Анкьго къабихӀлъи-къадарлъийин гьесул рекӀелъ букӀунеб.
26Бадибе реццалъ ццин бахчун бугониги,
гьесул рекӀелъ бугеб квешлъи
жамагӀаталда цебе тӀатинчӀого хутӀуларо.
27Чияе гвенд бухъани, живго жаниве ккола,
гьорчо эхеде гирани, гирун бачӀун, жиндаго щола.
28Гьерсилаб мацӀалъе рокьуларо
жиндалъун зарал кколел гӀадамал.
Бадибе рецц гьабулеб кӀалалъ инсан гъоркье рехула.
Currently Selected:
ГӀакъилал рагӀаби 26: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
