ГӀакъилал рагӀаби 25
25
БЕТӀЕР 25
Сулайман парччахӀасул гӀакъилал рагӀаби
1Гьале Сулайманил цогиги гӀакъилал рагӀаби,
Ягьудиялъул парччахӀ ХӀизкъиял гӀадамаз хъварал:
2Нилъеца Аллагьасе рецц гьабула,
Гьес балъгоябги бахчун бугелъул,
парччахӀзабазе рецц гьабула,
гьез балъгоябги тӀатинабулелъул.
3Зобалазул борхалъиги, ракьалъул гъварилъиги,
парччахӀзабазда ракӀалда бугебги лъазе кӀоларо.
4БацӀцӀадаб гӀарацалдаса хъублъи батӀа гьабуни,
устарас гьелъул сурахӀи лъугьинабула.
5Квешав гӀакълучи парччахӀасдаса рикӀкӀад гьавуни,
ритӀухълъи бергьуна ва гьесул тах щулалъула.
6ПарччахӀасда цебе дурго кӀодолъи бихьизабуге,
чӀахӀиял чагӀи чӀолеб бакӀалдаги чӀоге.
7Гьаниве тӀаде вачӀайилан гьес аби лъикӀ дуе,
дудаса къо-асс бугел гӀадамал гӀодор чӀезе риччайилан,
гьес инжит-хӀакъир гьавизегӀан.
8Питна гьабизе гӀедегӀуге,
дурго дандияс намуслъизавуни, щиб дуца гьабилеб?
9Мадугьаласулгун дагӀба ккедал,
балъголъи къватӀибе загьир гьабуге;
10духъ гӀенеккарас мунго инжит-хӀакъир гьавулевин,
лъикӀаб цӀарги духъе тӀокӀаб тӀад буссунаребин.
11ГӀужилаб рагӀи релълъуна гӀарцул тӀагӀелалда нагӀлиялъе лъураб
меседил гороялда.
12ГӀакъиласул насихӀаталъухъ гӀенеккулесе
гьесул гӀакълу релълъуна меседил баргъичалда
ва бацӀцӀадаб меседил рахасалда.
13Хур лъилъулеб къоялъ гӀаздалаб гьогьеналда релълъуна
жив цо ишалъ витӀаразе божарав чапар.
Жиндирго бетӀергьанасул ракӀ бохизабула гьес.
14НакӀкӀал рачӀана, гьури пуна, амма цӀад бачӀо –
гьелда релълъуна кьезе ракӀалда гьечӀел
сайигъатал кьелилан гаргадулев чи.
15Сабруяб каламалъ хӀакимгицин хӀеккинавулев,
бахьинаб кӀалалъ ракьаги бекулеб.
16Дуе гьоцӀо щвани, гӀурабгӀан кванай гьеб,
гурони – мун гьелъ гӀуризавила, лагӀизавила.
17Мадугьаласухъе гӀемерго хьвадиялдаса хӀетӀ цӀуне дуца,
гурони – мун гӀемерав вачӀун «гӀорцӀила» гьев ва мунги рихина.
18ГӀарчӀтӀилги, хвалченги ва бегӀераб чӀорги –
гьезда релълъуна мадугьаласда данде гьересиго нугӀлъи гьабулев чи.
19Унтараб гӀусги бекараб бохги –
гьезда релълъуна къварилъи ккараб къоялъ ватуларев чиясда божи.
20Квачараб къоялъ чиядаса ретӀел бахъулев чиясда
ва содаялда гьоркьобе тӀураб къанцӀаялда релълъуна
ракӀ къваридго вугесе кечӀ ахӀулев чи.
21Дур тушман вакъун вугони,
чед кьун кваназаве,
гьев къечон вугони,
лъим кьун гьекъезаве.
22Гьелдалъун гьесул бетӀералда тӀаде
цӀа рекӀарал тӀорччол гӀеркъалин дуца ралел ругел.
Ва БетӀергьанас дуе гьелъул кири хъвала.
23Шималалдасан пулеб гьороца цӀад босун бачӀуна,
мацӀихъанасул мацӀалъ гӀадамазул гьурмал кьерхинарула.
24ТӀохил рагӀалда гӀумру гьаби лъикӀ,
кӀалквешай лъадуда цадахъ цо рокъов чӀеялдаса.
25Къечалъ бухӀулеб бугеб щекъер-мукъулукъалъе
цӀорораб лъим гӀадаб жо буго
рикӀкӀадасан бачӀунеб лъикӀаб ругьел.
26Хъублъараб иццалда, чӀунтараб къулгӀаялда релълъуна
пасикъав чиясда цебе яхӀ рехарав муъминчи.
27ГӀемераб гьоцӀо кванайги лъикӀаб жо гуро,
гӀемераб рецц-бакъ тӀалаб гьабиги цӀакъаб жо гуро.
28Сверун къарал сангарал риххизарураб шагьаралда релълъуна
жиндирго напсалда кверщел гьабизе кӀоларев чи.
Currently Selected:
ГӀакъилал рагӀаби 25: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
