ГӀакъилал рагӀаби 18
18
БЕТӀЕР 18
1БатӀа кӀанцӀун чӀарав чи – жиндиего пайда балагьулев чи;
цогидазул пикру гьес гӀадахъ босуларо.
2БичӀчӀизе-лъазе гуро гӀабдаласе бокьулеб,
гьесие бокьула рекӀелъ бугеб пикру загьир гьабизе.
3Иман гьечӀолъиялда хадуб хӀакъирлъи-къабихӀлъиги букӀуна,
инжитал ишазда хадуб рогьо-ничги букӀуна.
4Инсанасул кӀалдир гӀакъилал рагӀаби гъваридаб ралъадлъун рикӀкӀуна,
гӀакъиллъиги – чвахун унеб лъимлъун рикӀкӀуна.
5Диван къотӀулаго, гӀайиб бугев бергьинавун,
гӀайиб гьечӀев къезави лъикӀаб жо гуро.
6ГӀабдаласул мацӀалца кьалде рачуна,
кӀал сабаблъун гьесул гьодилъ тӀилал щола.
7ГӀабдаласул кӀалдиб мацӀ – гьев паналъизавулеб жо,
гьесул кӀутӀбуздасан бачӀарабги – гьев жаниве вортулеб гвенд.
8МацӀихъанасул рагӀаби –
гӀенеккулесе бищунго гьуинаб квен,
лазаталда уна гьел гьесул ургьире.
9ТӀаса-масаго мина балев чи ккола гьеб щущазабулесул вац.
10БетӀергьанасул цӀар – щулияб хъала;
муъминчи гьениве векерула,
гьесие щибниги хӀинкъи букӀунаро.
11Бечедасул гӀемераб боцӀи-рикъзи – гьесул щулияб хъала,
гьесда ракӀалде ккола жив цӀунулеб сангар бугин гьебилан.
12Паналъилалде цебе инсанасул ракӀ кӀодолъула,
машгьурлъилалде цебе гьесул хӀалимлъи-хӀеренлъи цӀикӀкӀуна.
13Бицун бахъиналдего дандиясе жаваб кьолев чи гӀабдаллъун рикӀкӀуна,
гӀантлъи сабаблъун хӀакъирлъиги тӀаде бачӀуна гьесде.
14Инсанасул рухӀ-жаналъ гьесул унти къезабула,
амма ракӀбечӀай лъида хӀехьезе кӀолеб?
15ЦӀодорав чиясул рекӀее гӀелму-лъай щола,
гӀакъиласул гӀиналъ гӀакълу тӀалаб гьабула.
16Сайигъатал кьолес жиндиего дуниял гӀатӀид гьабула,
къо-асс бугезул даражаялде вахуна гьев.
17Диван къотӀулеб мехалъ цеве кӀалъарав витӀарав вугилан ккола,
вачӀун гьесул дандияс суалал кьезегӀан.
18Можоро тӀамиялъ дагӀба-кьал лъугӀизабула,
рекъеларилан чӀаразда гьоркьоб маслихӀатги гьабула.
19Гуккун вукӀин лъарав вац бахъизе кӀолареб шагьаралда релълъуна,
дагӀба-къецги релълъуна хъалаялъул рахараб кавуялда.
20Инсанасул кӀалалъгийин чохьое
квен балагьулеб,
гьесул кӀутӀбуздасан рачӀарал рагӀабазгийин гьесие
хинкӀ-чед щвезабулеб.
21МацӀалца чиги чӀвала, чӀаголъизеги гьавула,
гӀемерго кӀалъалесда лъазе ккола гьеб.
22Лъади щварасе – лъикӀлъи щола,
БетӀергьанасул баркатги щола.
23Мискинчияс хӀеренго-хӀалимго гьарула,
амма бечедас жаваб хъачӀго кьола.
24Гьудулин абунщинав чи гьудул вукӀунаро,
амма цо-цо гьудул вукӀуна вацасдасаги лъикӀав.
Currently Selected:
ГӀакъилал рагӀаби 18: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
