ГӀакъилал рагӀаби 17
17
БЕТӀЕР 17
1ХӀалхьиялда кваназе бакъвараб чадил мочӀу лъикӀ,
дагӀба-рагӀиялда кваназе бечедаб столалда нахъа гӀодорчӀеялдаса.
2ЛъугьинчӀев васасдаса цӀодорав лагъ тӀадегӀанавила,
вацазда гьоркьоб бикьараб ирсалъул бутӀаги щолебила гьесие.
3ГӀарцул хӀалбихьула цӀадул гьелегьиналъ,
меседил хӀалбихьула цӀадул кутакалъ.
Инсанасул рекӀел хӀал БетӀергьанас бихьула.
4Квешав чи квешаб кӀалалъухъ гӀенеккула,
гьересичиясги гьерсилаб мацӀ гӀадахъ босула.
5Мискинасда тӀад велъанхъулев чи ккола
жив вижизавурасда гӀайиб чӀвалев чи,
чияде балагь бачӀиналдаса вохулев чиги
тамихӀалдаса ворчӀуларо.
6Херазе ботӀрода лъезе таж – гьезул лъималазул лъимал,
лъималазе чӀухӀи – жидерго эмен.
7ГӀабдаласул кӀалдир тӀадегӀанал рагӀаби рекъоларо,
къо-асс бугесдаги гьерсилаб мацӀ дагьабги цӀакъ рекъоларо.
8Ришват кьолев чиясда ракӀалде ккола
гьелда гьабизе кӀолареб жо гьечӀилан,
киве гьеб босун аниги, мурад тӀубалебилан.
9Чияр гӀайиб-хатӀаялда тӀаса лъугьунев чияс божа-рокьи цӀикӀкӀинабула,
амма гьеб тӀатинабулес гьудулзаби цоцаздаса ратӀа гьарула.
10БадибчӀваялъ гӀакъиласе гьабулеб асар цӀикӀкӀараб букӀуна,
нусго тӀил кьабиялъ гӀабдаласе гьабулеб асаралдаса.
11Квешав чи питна балагьулев вукӀуна,
амма малакулмавт рещтӀуневха гьесухъе.
12ТӀанчӀи кодоса рахъараб цигун дандчӀвай лъикӀ,
гӀантлъиялъ квелъ барав гӀабдал дандчӀваялдаса.
13ЛъикӀлъиялъухъ квешлъи гьабурасул рокъоса
квешлъи лъугӀизе рес гьечӀо.
14ДагӀба-рагӀи ккезаби релълъуна
лъадада цебеса сангар биххизабиялда;
лъим гьулчун бачӀиналде лъугӀизабе кьал.
15БетӀергьанасе рихарал руго –
гӀайиб ккарав ритӀухъ гьавулевги
гӀайиб гьечӀесе тамихӀ гьабулевги.
16ГӀабдаласул хъатикь гӀарац щибизе?
ГӀакъиллъи бичун босизейищ?
Гьелъиегицин гӀакълу гӀоларо гьесул.
17Гьудуласул рокьи лъикӀалъулъги квешалъулъги загьирлъула,
къварилъи тӀаде бачӀиндалги ратизейин вацал рукӀунел.
18ГӀакълу гьечӀев чияс кьабун квер бачун къотӀи гьабула,
чияр налъи бецӀилилан рагӀи кьола.
19ДагӀба-рагӀи бокьулев чи ккола
мунагь гьабизе бокьулев чи.
ЧӀухӀдаего каву борхат гьабулев чи ккола
жиндиего паналъи балагьулев чи.
20РекӀелъ хӀилла-рекӀкӀ бугесде лъикӀаб къо бачӀунаро;
гьерсилаб мацӀ кӀалдиб бугесде балагь бачӀинчӀого хутӀуларо.
21ГӀантав вас къавулъ вугони къварилъи тӀаса унаро,
гӀакълу гьечӀев васасги эмен вохизавуларо.
22РакӀ аваданлъи – инсан сахлъулеб дару,
ракӀ бечӀаялъ ракьа бакъвазабула.
23Пасикъасе ришват лъороса бахъун кьола,
гьес мекъаб диван къотӀизе гӀоло.
24ЦӀодорав чи битӀахъе гӀакъиллъи бугелъуве валагьун вукӀуна,
гӀабдаласул берал рахъ-рахъалде ралагьун рукӀуна.
25ГӀантав вас – инсул рекӀее унти
ва жив гьавурай эбелалъул рекӀее пашманлъи.
26ГӀайиб гьечӀесе тамихӀ гьаби
квешаб жо буго,
гьединго квешаб буго
ракӀбацӀцӀалъи сабаблъун саламатал гӀадамал цӀалаца рухи.
27ГӀелму-лъай бугес рагӀи ургъун бицуна,
цӀодорав чиясги жиндаго квелъ бала.
28ВуцӀцӀун чӀолев гӀабдалги гӀакъилавлъун рикӀкӀуна,
кӀал данде бачун чӀани, цӀодоравлъунги рикӀкӀуна.
Currently Selected:
ГӀакъилал рагӀаби 17: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
