ГӀакъилал рагӀаби 15
15
БЕТӀЕР 15
1ХӀеренаб жавабалъ ццин гӀодоцинабула,
хъачӀаб рагӀуца ццин гьалаглъизабула.
2ГӀакъилазул мацӀалдасан гӀелму-лъай бецӀцӀула,
гӀабдалзабазул кӀалдисан гӀантаб рагӀи бурула.
3БетӀергьанасул бер щолареб бакӀ гьечӀо:
квешалги рихьула, лъикӀалги рихьула.
4КӀалзул хӀеренлъи – чӀаголъиялъул гъветӀ,
кӀалзул гьересиялъ ракӀ чӀунтизабула.
5ГӀабдалас инсул малъа-хъвай гӀад-хочӀ гьабула,
кантӀизави къабул гьабурасе гӀакълу щола.
6Муъминчиясул рукъ хазинадул цӀун букӀуна,
пасикъасул боцӀи-рикъзиялъ балагь тӀаде цӀала.
7ЦӀодоразул кӀалалъ гӀелму-лъай тӀибитӀизабула,
гӀабдалзабазул ракӀал гьелдаса рикӀкӀад рукӀуна.
8Пасикъазул къурбан БетӀергьанасе рихараб буго,
муъминзабазул гьари-дугӀаялдаса Гьев разилъула.
9Пасикъасул нух БетӀергьанасе рихараб буго,
витӀун хьвадулев чи Гьесие вокьула.
10Нухдаса тарарасе тамихӀ кӀудияб букӀуна,
малъараб гьабуларевги хвалде уна.
11ЖужахӀги Жагьандаманги БетӀергьанасул берда цебе буго,
гӀадамазул рекӀелъ бугеб Гьесда дагьабги лъикӀ бихьиларищха!
12ЯхӀ-намус гьечӀесе бокьуларо живго кантӀизавизе,
гӀакъилазда аскӀовеги унаро гьев.
13РекӀелъ рохел бугони, гьумерги бохун букӀуна,
рекӀелъе рещтӀараб ургъелалъ ракӀ чӀунтизабула.
14ЦӀодорасул рекӀеца гӀелму-лъай тӀалаб гьабула,
гӀабдалзабазул кӀалалъ кунеб жо гӀантлъи букӀуна.
15Мискин-пакъирасе киналго къоял квешал рукӀуна,
ракӀ бохун вугесе кидаго бертин букӀуна.
16БетӀергьанасукьа хӀинкъун щвараб дагьаб лъикӀ,
гӀемераб бечелъиги щун,
гьелъул хӀинкъиялда гъоркь рукӀиналдаса.
17Рохалида кванараб чӀахӀил квен лъикӀ,
мачӀадалъе хьихьараб оцол гьан ццин къулчӀун кванаялдаса.
18Ццин хехас кьалул цӀа рекӀинабула,
сабру бугес дагӀба-рагӀи свинабула.
19КӀвахӀаласул нух зазил цӀун букӀуна,
муъминчиясул нух цӀан битӀараб букӀуна.
20ЦӀодорав васас эмен вохизавула,
гӀантас эбел сан гьаюларо.
21ГӀабдал жиндирго гӀантлъиялдаса вохун вукӀуна,
цӀодорав чи битӀараб нухдасан уна.
22ГӀакълу-насихӀат гьечӀони, мурадалде щоларо,
гӀакълу кьолел гӀемерлъани, мурад тӀубала.
23Жиндирго кӀалзул берцинаб жавабалъ инсан вохизавула,
абизе кколелъуб абураб рагӀул лъикӀлъиха!
24ЦӀодорав чиясул нухалъ борхалъуде рачуна,
ахада бугеб жужахӀалдаса гьев хвасарлъизе.
25ЧӀухӀарав чиясул рукъ БетӀергьанас кӀалагъоркье чӀвазабула,
къоролалъул хурул гӀурхъи-ссан Гьес букӀаралъубго чӀезабула.
26Квешасул ният-къасд БетӀергьанасе рихараб буго,
лъикӀасул каламалдаса Гьев разилъула.
27ХӀарамаб боцӀи-рикъзиялда хъантӀарас рукъ чӀунтизабула,
ришват рихаравги чӀаго хутӀула.
28Муъминчияс рагӀи ургъун бицуна,
пасикъасул кӀалалъ квешлъи лагӀула.
29Пасикъав чиясдаса рикӀкӀад вуго БетӀергьан,
муъминчиясул гьари-дугӀа Гьесда рагӀула.
30РакӀ аваданго бугесул балагьиялъ чи вохизавула,
лъикӀаб ругьелалъ ракьа щулалъизабула.
31ГӀакъилзабазда гьоркьов ватула гӀумру-яшав лъикӀлъулеб
насихӀаталъухъ гӀенеккулев чи.
32Малъараб гӀадахъ босуларес жиндирго гӀумру инжит-хӀакъир гьабула,
насихӀаталъухъ гӀенеккарасе гӀакълу щола.
33Аллагьасукьа хӀинкъи – гӀакъиллъи-цӀодорлъи ккола,
хӀурмат-къадруялъул цебехъан – хӀалимлъи-хӀеренлъи буго.
Currently Selected:
ГӀакъилал рагӀаби 15: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
