Тархал 9
9
Песахалъул байрам
1Мисриялдаса къватӀибе ГӀизраилил халкъ бахъун кӀиабилеб соналъул тӀоцебесеб моцӀалда#9:1 Ихдалил авалалда. БЕТӀЕРГЬАН Мусада кӀалъана, ва Синай салул авлахъалда рукӀаго, Гьес Мусада абуна:
2«Биччанте гӀизраилаз Песах байрам тӀобитӀизе, гьелъие бихьизабураб заманги хӀисабалде босун. 3Песах тӀобитӀе гьаб моцӀалъул анцӀила ункъабилеб къоялъ, бакъанил гӀужалда, къо рукӀкӀиналде цебе, киналго Песахалъул тӀадкъаялги низамалги цӀунун».
4Гьединлъидал Мусаца гӀизраилазде амру гьабуна Песахалъул байрам кӀодо гьабеян. 5Ва тӀоцебесеб моцӀалъул анцӀила ункъабилеб къоялъ бакъанил гӀужалда, къо рукӀкӀиналде цебе, Синай абураб салул авлахъалда гьез Песахалъул байрам тӀобитӀана. ГӀизраилаз кинабго гьабуна, БЕТӀЕРГЬАНАС Мусаде гьабураб амруялда рекъон.
6Амма гьезул цо-цоязухъа бажаричӀо Песахалъул байрамалда гӀахьаллъизе, щайгурелъул жаназаялда хъвазе ккун, гьел хъублъун рукӀана. Гьебго къоялъ гьел Мусахъеги Гьарунихъеги рачӀана, 7ва гьез Мусада абуна:
«Ниж хъублъун руго, жаназаялда хъвазе ккун рукӀун. Амма щай ниж махӀрум гьарулел чӀезабураб заманалда гӀизраилазда цадахъ БЕТӀЕРГЬАНАСЕ къурбан гьабиялдаса?»
8Мусаца гьезие жаваб кьуна:
«Гьанир чӀа, БЕТӀЕРГЬАНАС нужер рахъалъ кинаб амру бачӀунебали дица лъазабизегӀан».
9БЕТӀЕРГЬАНАС Мусада абуна:
10«ГӀизраилазда абе: „Жаназаялда хъван хъублъарав яги рикӀкӀадаб сапаралде ккун, гьелъие бихьизабураб заманалда Песахалъул байрам кӀодо гьабизе рес щвечӀев чиясги тӀобитӀизе ккола БЕТӀЕРГЬАНАС чӀезабураб Песахалъул байрам. 11Гьединав чияс Песах кӀодо гьабизе биччанте кӀиабилеб моцӀалъул анцӀила ункъабилеб къоялъул бакъанида. Къурбаналъул кьагӀрил гьан кваназе ккола гьес бугьурго чедгун ва кьогӀал хурдулгун цадахъ, 12рогьиналде щибго жо нахъе течӀого ва цониги ракьа бекичӀого. Песахалъул байрам тӀобитӀулелъул, гьелъие чӀезарурал Бичасул хӀукмаби рагӀа-ракьанде щун тӀуразаризе ккола гьес. 13Амма черхги хъублъичӀев сапаралдеги ккечӀев чияс Песахалъул байрамалъул кӀвар гьабичӀого тани, гьев халкъалда гьоркьоса нахъе къотӀизе вуго, гьес чӀезабураб заманалда БЕТӀЕРГЬАНАСЕ къурбан гьабичӀолъи сабаблъун. Гьесие жаза гьабизе ккола.
14Нужеда гьоркьоб гӀумру гьабулев чияр ракьалдаса чиясе бокьани БЕТӀЕРГЬАНАС тӀад лъураб Песахалъул байрам кӀодо гьабизе, гьесдаги тӀалъула гьеб байрамалъе рихьизарурал Бичасул киналго хӀукмабиги низамги цӀунизе. Гьаб улкаялда гьавурасеги чияр ракьалдаса вачӀун гӀумру гьабулесеги цогояб низам букӀине ккола“».
БЕТӀЕРГЬАНАСУЛ къудраталъул парча
15Мукъадасаб, ай ДандчӀваялъул Чадир, эхетизабураб къоялъго накӀкӀул парчаялъ бахчизабуна. Сордо рогьинегӀан гьеб цӀадул парчадулъ бугеб гӀадин бихьулаан. 16Гьелдаса нахъе гьедин букӀана кидаго: Къад Чадиралда тӀад накӀкӀул парча чӀолаан ва къаси гьеб цӀадуда релълъунаан. 17Чадиралдаса накӀкӀул парча тӀаде босараб мехалъ, гӀизраилал сапаралъ рахъунаан; накӀкӀул парча лъалхъараб бакӀалда гӀизраилаз къайиги чӀвалаан. 18БЕТӀЕРГЬАНАСУЛ амруялда рекъон гӀизраилал сапаралде рахъунаан ва Гьесулго амруялда рекъон чӀелги гьабулаан. Чадиралда тӀад накӀкӀул парча бигъарабгӀан заманалда гьел чӀараб бакӀалдаго рукӀунаан. 19Чадиралда тӀад накӀкӀул парча гӀемераб заманалъ чӀаниги, ГӀизраилил халкъ БЕТӀЕРГЬАНАСЕ мутӀигӀлъулаан ва сапаралде бахъунароан. 20Чадиралда тӀад накӀкӀул парчаялъ цо чанго къо гурони бачӀониги, гьединго гьабулаан: гӀицӀго БЕТӀЕРГЬАНАСУЛ амруялда рекъон къайи чӀвалаан ва Гьесул амруялда рекъон сапаралдеги рахъунаан. 21Цо-цо мехалда накӀкӀул парча чадиралда тӀад чӀолаан сордо рогьинегӀан, ва радал парча тӀаде борхун бихьани, гьезги сапаралде байбихьулаан. Къад букӀа, къаси букӀа – накӀкӀул парча тӀаде борхун бихьарабго, гьел сапаралъ рахъунаан. 22КӀиго къоялъ, яги моцӀалъ, яги жеги цӀикӀкӀун – кигӀан заманаялъ Мукъадасаб Чадиралда тӀад накӀкӀул парча чӀаниги, гӀизраилал чӀараб бакӀалдаса рахъунароан, ай накӀкӀул парча багъаризегӀан гьел нухде рахъунароан; накӀкӀул парча тӀаса босидал, халкъалъги сапаралде байбихьулаан. 23БЕТӀЕРГЬАНАСУЛ амруялда рекъон гьез къайиги чӀвалаан ва Гьесулго амруялдалъун сапаралдеги рахъунаан. БЕТӀЕРГЬАНАС Мусадасан кьураб амру гьедин тӀубазабулаан гӀизраилаз.
Currently Selected:
Тархал 9: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
