Тархал 10
10
ГӀарцул сурал
1БЕТӀЕРГЬАНАС Мусада абуна:
2«РачитӀа гӀарацги бухун кӀиго гӀарцул сур гьабе. Гьел хӀалтӀизаре халкъалъул данделъи ахӀизе ва халкъалда нухда рахъине кколеблъи лъазабизе. 3КӀиябго сур пулеб гьаракь бахъараб мехалъ, тӀолабго жамагӀат дуда цебе ДандчӀваялъул Чадиралъул кӀалтӀе бакӀаризе ккола. 4Цо сур пулеб гьаракь рагӀидал, духъе халкъалъул кӀудиял, ай ГӀизраилил къавмазул бутӀрул ракӀаризе ккола. 5Гьоркьор къотӀ-къотӀарал къокъал гьаркьал гьарун сур пураб мехалда, сапаралде рахъине ккола бакъбаккул рахъалда чӀел гьабурал къавмал. 6Гьединабго хӀалалда кӀиабилеб нухалъ сур пурабго, сапаралде рахъине ккола къилбаялъул рахъалда чӀарал къавмал. Гьеб ахӀи букӀине буго сапаралде рахъине ккеялъул бицунеб гӀаламатлъун. 7Данделъи ахӀизе ккани, сур пуй цо халатбахъараб ахӀиялдалъун.
8Сурал пуйзе руго кашишзабаз – Гьарунил васаз. Гьеб буго нужееги рукӀинесел наслабазеги даимаб амру. 9Нуж нужерго ракьалда рукӀаго тушман тӀаде кӀанцӀани ва рагъ ккани, кӀвараб хӀалалъ сурал пуй. Гьебмехалда нужер БЕТӀЕРГЬАН Аллагьасда нужер ахӀи рагӀила ва тушманасдаса нуж хвасар гьарила. 10Гьединго рохалил къоязги, байрамкъоязги, щибаб моцӀалъул тӀоцебесеб къоялъги цӀадулги ракълилги къурбанал гьарулеб мехалъ гӀарцул сурал пуй – гьеб букӀина БЕТӀЕРГЬАНАСДА нуж ракӀалде щвезариялъул гӀаламатлъун. Дун вуго БЕТӀЕРГЬАН – нужер Аллагь».
ГӀизраилал сапаралде рахъин
11КъотӀиялъул Чадиралда тӀад тӀупараб накӀкӀул парча тӀаде борхана кӀиабилеб моцӀалъул къоабилеб къоялъ ва, 12Синай абураб салул авлахъги тун, гӀизраилал сапаралъ рахъана. Паран абураб салул авлахъалде щведал накӀкӀул парча лъалхъана. 13Гьеб букӀана гьезул, Мусадасан бачӀараб БЕТӀЕРГЬАНАСУЛ амруялда рекъон нухда рахъараб, тӀоцебесеб сапар.
14ТӀоцебе сапаралде бахъана Ягьудал аскар, къокъаялда хадуб къокъа гьабун. Гьезул бетӀерлъуда вукӀана ГӀаминадавил вас НахӀшон. 15Цуарил вас Нетаниэл вукӀана Иссахарил къавмалъул бетӀерлъуда, 16ва Хелонил вас Элиав – Зевулунил къавмалъул бетӀерлъуда. 17Хадуб Мукъадасаб Чадир биххана ва сокӀкӀана ва, баччун Чадиргун, Гершонилги Мерарилги тухумал сапаралде рахъана.
18Гьезда хадуб билълъана Рувимил аскар, къокъаби гьарун. Гьезул бетӀерлъуда вукӀана Шедеурил вас Элицур. 19Шимеонил къавмалъул бетӀерлъуда вукӀана Цуришадайил вас Шелумиэл, 20ва Гадил къавмалъул бетӀерлъуда – Дегуэлил вас Элиясаф. 21Гьезда хадуб сапаралде бахъана Кехатил тухум, баччун мукъадасаб къайигун. ГӀизраилал цӀияб бакӀалде щвелалде гьениб Мукъадасаб Чадир чӀван букӀине кколаан.
22Гьезда хадуб сапаралде бахъана Ефраимил аскар, къокъаби гьарун. Гьезул бетӀерлъуда вукӀана Аммигьудил вас ЭлишамагӀ. 23Манассил къавмалъул бетӀерлъуда вукӀана Педацурил вас Гамлиэл 24ва Буняминил къавмалъул бетӀерлъуда – Гидеонил вас Авидан.
25Бищун ахиралда сапаралде бахъана Данил аскар, къокъаби гьарун. Гьезул бетӀерлъуда вукӀана Амишадайил вас Ахиезер. 26Ашерил къавмалъе бетӀерлъи гьабулеб букӀана Охранил вас Пагиэлица 27ва Нафталил къавмалъе – Енанил вас Ахирица. 28Гьединаб букӀана сапаралде рахъулел гӀизраилазул къавмазул тартибгун низам.
Мусаги Ховавги
29Мусаца абуна жиндирго вакьад-васасда, ай мидянияв Регуэлил вас Ховавида: «Ниж унел руго БЕТӀЕРГЬАНАС нижее кьелин абураб ракьалде. Вилълъа нижеда цадахъ, дуеги нижеего гӀадин икъбал букӀина, щайгурелъул БЕТӀЕРГЬАНАС ГӀизраилил халкъалъе лъикӀлъи гьабизе рагӀи кьун бугелъул», – ин.
30Амма гьес жаваб кьуна: «Дун вилълъинаро нужгун. Дирго ракьалде ва дирго гӀагарлъиялъухъе тӀадвуссин лъикӀ дие», – ян.
31Амма Мусаца нахъеги абуна: «Гьарула дуда, рехун тоге ниж! Дуда лъикӀ лъала салул авлахъалда къайи чӀвазе санагӀатал бакӀал; нижеда нух малъулев чилъун вукӀа.
32Мун нижеда цадахъ вилълъани, нижеца дуеги бащад гьабила БЕТӀЕРГЬАНАС нижее кьурабщинаб рикъзи», – ян.
33Цинги БЕТӀЕРГЬАНАСУЛ МагӀардаса гьел сапаралде рахъана ва гьез лъабго къо нухда бана. Лъабабго къоялъ гьезда цебе-цебе унеб букӀана БЕТӀЕРГЬАНАСУЛ КъотӀиялъул гъамасги, гьезда хӀухьбахъиялъе бакӀги бихьизабулаго. 34Къад сапаралъ унеб мехалда БЕТӀЕРГЬАНАСУЛ накӀкӀул парчаги букӀунаан гьезда тӀасан боржунеб. 35Сапаралде рахъине гъамас борхулелъул Мусаца абулаан:
«Вахъа цеве, я БЕТӀЕРГЬАН!
Рихх-риххун аги Дур тушбаби!
Дуда цереса лъутун аги Мун рихарал!»
36Гъамас лъалхъараб мехалда гьес абулаан:
«Лъалхъе, БЕТӀЕРГЬАН,
рикӀкӀун хӀалкӀоларел ГӀизраилалгун!»
Currently Selected:
Тархал 10: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
