Тархал 27
27
Целофхадил ясал
(Тар. 36:1-12)
1Манассил вас Махир, Махирил вас ГилгӀад, ГилгӀадил вас Хефер, Хеферил вас Целофхад – гьев Целофхадил йикӀана щуго яс: Махла, НогӀа, Хогла, Милка ва Тирза. Юсупил вас Манассил къавмалъул чагӀи кколаан гьел. 2Гьел рачӀана ДандчӀваялъул Чадиралъул кӀалтӀе. Мусадаги, кашиш Элеазаридаги, халкъалъул кӀудияздаги, тӀолго жамагӀаталдаги цереги чӀун, гьез абуна:
3«Авлахъалда нилъ рукӀаго нижер эмен хвана. Гьев вукӀинчӀо БЕТӀЕРГЬАНАСДА данде вахъарав КъорахӀил гьалмагъзабазда гьоркьов. Гьев хвана жиндирго мунагьазухъ [ай гӀадатияб хвелалдалъун], васалги нахъа течӀого. 4Щайха нижер инсул цӀар кӀочене тезе кколеб гьесул тухумалда гьоркьоб, гьесул васал гьечӀинги абун? Кье нижееги нижер инсул вацазе кьолебгӀанасеб ракьалъул бутӀа», – ян.
5Мусаца гьезул суал БЕТӀЕРГЬАНАСДА цебе лъуна, 6ва БЕТӀЕРГЬАНАС гьесда абуна:
7«Целофхадил ясаз битӀараб бицунеб буго. Чара гьечӀого кье гьезие гьезул инсул вацазда бащадаб ракьалъул бутӀа, ва гьеб кье гьезие ирсалъе щвараб гьезул инсул бутӀа хӀисабалда. 8ГӀизраилил халкъалда абе: „Нагагь вас гьечӀев чи хвани, гьесул ракьалъул бутӀа ясалъе кье. 9Гьесул ясги ятичӀони, гьеб ракьалъул бутӀа гьесул вацазе кье. 10Гьесул вацал ратичӀони, гьеб гьесул инсул вацазе кье. 11Гьесул инсулги вацал рукӀун ратичӀони, гьеб ракьалъул бутӀа кье гьесул тухумалъул бищун цевесев гӀагарав чиясе. Гьеб букӀине буго гӀизраилазе чӀезабураб даимаб къанунлъун; гьединаб амру гьабулеб буго Мусадасан БЕТӀЕРГЬАНАС“».
Егьошуа – Мусал варис
12Цинги БЕТӀЕРГЬАНАС Мусада абуна:
«Аварим магӀарде ваха ва балагье Дица ГӀизраилил халкъалъе кьолеб бугеб ракьалъухъ. 13Гьеб бихьун хадуб мунги, дур вац Гьарунго гӀадин, кӀудияб сапаралде дурго умумузухъе ине вуго, 14щайгурелъул Цин авлахъалда рукӀаго халкъ Дида данде бахъиндал, нужеца Дица абухъе гьабичӀо ва доб иццухъ халкъалда цебе Дир тӀадегӀанаб бацӀцӀалъи бихьизабичӀо».
(Гьеб ккана Мериваялъул иццухъ, Цин абураб салул авлахъалда Кадешалда.)
15Мусаца БЕТӀЕРГЬАНАСДА абуна:
16«Я БЕТӀЕРГЬАН, биччанте щибаб жоялда рухӀ лъолев Аллагьас гьаб жамагӀаталда тӀад чи тезе, 17гьезул бетӀерлъун вукӀинеги, халкъ цебе бачинеги, гьезие нухмалъи гьабизеги бажари бугев – вехь гьечӀеб гӀиял рехъен гӀадин БЕТӀЕРГЬАНАСУЛ халкъ хутӀунгутӀизе».
18БЕТӀЕРГЬАНАС Мусада абуна:
«АхӀе гьеб ишалъе рекъараб гӀамал-хасият бугев Нунил Егьошуа ва гьесда тӀад кверал лъе. 19Кашиш Элеазаридаги тӀолабго жамагӀаталдаги цеве чӀезаве гьев ва киназдаго лъазабе гьев дур варис вукӀин. 20Духъ бугеб ихтияралъул бутӀа кье гьесухъе, гӀизраилал гьесухъ гӀенеккизе рукӀине. 21Кашиш Элеазарица урималдалъун БЕТӀЕРГЬАНАСУЛ амру лъазабила ва Егьошуа гьелъухъ гӀенеккила; Егьошуаги тӀолалго гӀизраилалги Гьесул амруялдалъун сапаралде рахъине руго ва Гьесул амруялдалъун тӀадруссинеги руго».
22Мусаца кинабго БЕТӀЕРГЬАНАС жинда малъухъе гьабуна: Егьошуа ахӀана ва кашиш Элеазаридаги жамагӀаталдаги цеве чӀезавуна; 23цинги Мусаца гьесда тӀад кверал лъуна ва гьев жиндир варис вукӀин лъазабуна, БЕТӀЕРГЬАНАСУЛ амруялда рекъон.
Currently Selected:
Тархал 27: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
