Тархал 25

ГӀизраилаз БагӀал-Пеорие гӀибадат гьаби

1Шиттималда рещтӀун рукӀаго, гӀизраилаз байбихьана могӀавиязул руччабигун зина гьабизе.

2МогӀавалъул руччабаз жидерго аллагьзабазе гьарурал къурбаназда гӀахьаллъизе ахӀулел рукӀана гьел. Гьедин гӀизраилаз байбихьана гьезул аллагьзабазе сужда гьабизе ва гьезул къурбаназул тӀутӀалда гӀахьаллъизе. 3ГӀизраилал БагӀал-Пеориде#25:3 БагӀал-Пеор – могӀавиязул аллагь. руссун рукӀин бихьидал, БЕТӀЕРГЬАНАСУЛ кутакалда ццин бахъана. 4БЕТӀЕРГЬАНАС Мусада абуна:

«Халкъалъул киналго бутӀрул ракӀаре ва, тӀолабго халкъалда бихьун, Дида цере чӀвай гьел, гӀизраилазда бахъараб Дир гьалдолеб ццин свине букӀине».

5Цинги Мусаца халкъалъул диванчагӀазда абуна:

«Нужер щивас чӀвай нужерго гӀагарлъиялда гьоркьоса БагӀал-Пеориде вуссаравщинав чи», – ян.

6Гьебмехалда ДандчӀваялъул Чадиралда цереги ракӀарун гӀодулел рукӀарал гӀизраилаздаги Мусадаги цеесан пуланав чияс жиндирго рокъое жание ячун ана мидянияй. 7Гьеб бихьарав кашиш Гьарунил Элеазарил вас Пинхасица жамагӀаталъул данделъи тана ва, хечги босун, 8гьев чиясда хадув гьесул чодрониве вилълъана. Гьес цо къазабураб хочоца гьел кӀиялго чӀвана – гӀизраилавги чӀужугӀаданги. Гьебмехалъ къотӀана гӀизраилазда гьоркьоб багъарун букӀараб квешаб бахунеб унти, 9амма гьеб унтиялъ къоло ункъазарго чи чӀвана. 10БЕТӀЕРГЬАНАС Мусада абуна:

11«Кашиш Гьарунил Элеазарил вас Пинхасица свинабуна гӀизраилазде бахъун букӀараб Дир ццидал гьалагаб цӀа. Гьес хӀехьечӀо Дицаги хӀехьоларел гьезул къабихӀал ишал, гьединлъидал Дица тӀуран тӀагӀинаричӀого тана гӀизраилал. 12Дуца лъазабе, Дица Пинхасилгун гьабулеб бугин ракълилаб къотӀиян. 13Гьесулгун ва гьесул наслабигун гьабулеб буго даимаб кашишлъиялъул къотӀи, щайгурелъул жиндирго Аллагьасе гӀоло Пинхасица хӀехьечӀо гьезул инжитлъи, ва чурана гӀизраилазул мунагь».

14Мидяналъул гӀадангун цадахъ чӀварав гӀизраиласда цӀар букӀана Зимри – Салул вас; гьев вукӀана Шимеонил къавмалъул цо тухумалъул бетӀер. 15ЧӀварай гӀаданалда цӀар букӀана Козби, гьей йикӀана Мидяналъул цо кьибилалъул бетӀер Цурил яс.

16БЕТӀЕРГЬАНАС Мусада абуна:

17«Мидяналъул чагӀигун нужеца тушманлъи гьабе ва гьел чӀвай, 18щайгурелъул гьез нужее гьабуна тушманасе гьабулеб жо. Гьез нужее Пеоралъул къор гъуна, ва Пеор сабаблъун квешаб унти багъарараб мехалда чӀварай мидяниязул цевехъанасул яс Козбил къорикье ккезаруна нуж».

Currently Selected:

Тархал 25: АварАК

Highlight

Copy