Тархал 21
21
Арадалъул хан къезави
1Ханааналъул бакъбаккул рахъалда бугеб Арада шагьаралъул ханасда Атарималъул нухдасан гӀизраилал унел ругин рагӀараб мехалъ, гьев гьезда тӀаде кӀанцӀана ва гьезул цо-цоял асирлъуде рачана. 2Гьебмехалъ гӀизраилаз, кумек гьарун, БЕТӀЕРГЬАНАСДЕ дугӀа гьабуна, гьадинаб гьаги бан:
«Дуца нижее доб халкъалда тӀад бергьенлъи кьуни, нижеца дозул шагьарал Дуе херем гьарила#21:2 Херем гьаби – тӀубан тӀагӀинабиялдалъун пуланаб жо Аллагьасе кьей.», – ян.
3БЕТӀЕРГЬАНАС гӀизраилазул гьа къабул гьабуна – ханааниял гьезул кверщаликье кьуна. Гьезги хӀур гьабуна гьезулги гьезул шагьаразулги. Гьединлъидал гьеб бакӀалда Хорма#21:3 Хорма – гьаб цӀаралъул магӀна буго «щущазаби». абураб цӀар лъуна.
Пахьул борохь
4Гьор абураб магӀардаса гьел сапаралъ рахъана БагӀараб ралъдахъе унеб нухккун, Эдомалъул ракьалда хӀетӀе чӀоларедухъ. Амма нухда халкъалъул яхӀ хвана; 5гӀадамал нахъеги БЕТӀЕРГЬАНАСДАГИ Мусадаги данде рази гьечӀого къулкъудизе лъугьана:
«Щай нужеца Мисриялдаса ниж нахъе рачарал? Я квен гуреб, я лъим гуреб гьаб салул авлахъалда хвезелъунищ? Гьаб чӀамучӀаб квенги бадисан баккун буго нижеда!»
6Гьебмехалъ БЕТӀЕРГЬАНАС гьезда тӀаде загьруял борхьал риччана ва, гьез хӀанчӀун, гӀизраилазул гӀемерав чи хвана. 7Цинги халкъ Мусахъе бачӀана ва гьез абуна:
«Нижеца мунги БЕТӀЕРГЬАНГИ какун, ниж мунагьалъукье ккана. Гьаре БЕТӀЕРГЬАНАСДА нижедаса борхьал тӀаса росеян».
Мусаца халкъалъе гӀоло БЕТӀЕРГЬАНАСДА гьарана, 8ва БЕТӀЕРГЬАНАС Мусада абуна:
«Борхьил сипат гьабе, ва гӀералдаги бан гьеб эхеде борхизабе. Борхьица хӀанчӀаравщинав чи гьелъухъ валагьила ва чӀаго хутӀила», – ян.
9Мусаца пахьул борохь гьабуна ва гӀералдаги бан гьеб эхеде борхинабуна. Борхьица лъиданиги хӀанчӀани, гьев чи пахьул борхьихъ валагьулаан ва чӀаго хутӀулаан.
МогӀавалде нух
10Гьенисанги цере ун, гӀизраилаз Овот абураб бакӀалда чӀел гьабуна. 11Овоталдасаги рахъун, гьел щвана Ийе-Аварималде ва гьенир лъалхъана – МогӀавалъул бакъбаккул рахъалъул гӀорхъода аскӀоб бугеб салул авлахъалда. 12Гьенисаги ун, гьел щвана Заредалде ва гьенир лъалхъана. 13Гьениса нухде рахъарал гьел щвана Арнон гӀурул доб цояб рагӀалда бугеб, амориязул гӀорхъоде гӀунтӀулеб салул авлахъалде. (Арнон ккола МогӀавалдаги амориязул ракьалдаги гьоркьоб бугеб гӀорхъи.) 14Гьеле гьединлъидалин «БЕТӀЕРГЬАНАСУЛ рагъазул тӀехьалда» бицунеб бугеб:
«Суфаялда Вахевги, Арноналъул лъарамухъалги,
15Ар абураб бакӀалде щвезегӀан ругел кӀкӀалазул гъулдулги –
гьеб кинабго МогӀавалъул гӀорхъода буго».
16Гьенисанги гьел рилълъана Беэралъухъе, ай гъуялъухъе#21:16 Беэр – «гъуй».. Гьенибин БЕТӀЕРГЬАНАС Мусада абун букӀараб:
«Халкъ бакӀаре, Дица кьела гьезие лъим», – ан.
17Доб мехалда гӀизраилаз гьаб кечӀ ахӀана:
«Гъуй лъеца цӀе абе!
АхӀе гьелъий кечӀ!
18Халкъалъул кӀудияз жиб бухъараб – гьезул
къадру-кӀодолъиялъул гӀаламатлъун кколел гӀунсбуздалъун бухъараб».
Салул авлахъалдаса гьел ана Маттаналде, 19Маттаналдаса – Нахалиэлалде, Нахалиэлалдаса – Бамоталде 20ва Бамоталдаса – МогӀавалъул гӀатӀиракьалде, салул авлахъалда тӀаде балагьараб, Фасга абураб мегӀералъул тӀогьире унеб бакӀалде.
Сихон пачаясда тӀад бергьенлъи боси
(Къан. 2:24-37)
21ГӀизраилаз вакилзаби ритӀана амориязул пача Сихонихъе, гьадинаб хабаргун:
22«Изну кье нижее дур улкаялъул ракьалдасан бугеб нухккун ине. Я хурзабахъе, я цӀолбол ахикье ниж къаларо, гьекъеларо дур гъуязухъа лъимги. Ниж Ханзабазул нухдасан ина, дур улкаялъул ракьал нахъа тезегӀан».
23Амма Сихоница гӀизраилазе изну кьечӀо жиндирго улка къотӀун ине. Гьес тӀолабго жиндирго аскар бакӀарана ва аскаргун гӀизраилазда данде салул авлахъалде вахъана. Ва Яхацалда гӀагарлъухъ гьес гӀизраилазда данде рагъ гьабуна. 24Амма гӀизраилаз гьесул бо щущахъ биххизабуна ва Арноналдаса Яббокалде, аммониязул гӀорхъоде щвезегӀан гьесул ракьалги рахъана (аммониязул гӀорхъаби лъикӀ щула гьарун рукӀана). 25Амориязул киналго шагьарал кверде росана гӀизраилаз, Хешбонги гьелда сверухъ ругел росабиги рикӀкӀун, ва жалгоги гьенир гӀумру гьабун чӀана. 26Хешбон букӀана амориязул пача Сихонил шагьар. Цевеккун МогӀавалъул вукӀарав пачаясулгун рагъги гьабун, Арноналде щвезегӀан гьесул тӀолалго ракьал Сихоница рахъун рукӀана.
27Гьединлъидал къисаби рицунел гӀадамаз абула:
«РачӀа Хешбоналде! ЦӀидасан бай гьеб!
Щула гьабе Сихонил шагьар!
28Хешбоналдаса цӀа гьелегьана,
Сихонил шагьаралдаса – цӀадул мацӀал рачӀана.
Гьелъ кӀкӀун ана МогӀавалъул Ар шагьар
ва Арнонил борхалъабазул бетӀергьаби.
29Балагь рещтӀана дуде, МогӀав!
ЛъугӀана мун, Кемошил халкъ!
Рижараб ракьги рехун тун, лъутана дур васал,
амориязул пача Сихонил асирлъуде ккана дур ясал.
30Нижеца чӀорал речӀчӀана,
ва тӀагӀана Хешбоналдаса бахъараб Дивоналде щвезегӀан кинабго!
Нижеца талавур гьабуна
Нофахалдаса бахъараб Медевалде щвезегӀан кинабго, щибго гьоркьоб течӀого».
31Гьедин гӀизраилал чӀана амориязул ракьалда. 32Хадуб Мусаца Язер шагьаралъул хал-шал гьабизе чагӀи ритӀана, ва гьебги гьелда сверухъ рукӀарал росабиги рахъана, гьенир рукӀарал амориялги нахъе рачахъана.
Ог пачаясда тӀад бергьенлъи боси
(Къан. 3:1-11)
33Гьенисан шималияб рахъалдехунги сверун, гӀизраилал ана Башаналде унеб нухдасан. Амма Башаналъул пача Ог вахъана гьезда данде тӀолабго жиндирго аскаргун ва Эдреи шагьаралда гӀагарлъухъ гьезда данде рагъ гьабуна. 34БЕТӀЕРГЬАНАС Мусада абуна:
«ХӀинкъуге гьесукьа. Дица дур кверщаликье кьолев вуго гьевги, гьесул тӀолабго аскарги, гьесул ракьалги. Хешбоналда ханлъуда вукӀарав амориязул пача Сихоние гьабураб гьабе дуца гьесиеги».
35Гьебмехалъ гӀизраилаз чӀвана гьевги, гьесул васалги, гъурана тӀолабго гьесул аскарги – цониги чи нахъе течӀо. Гьесул тӀолалго ракьалги гӀизраилазул кверщаликье ккана.
Currently Selected:
Тархал 21: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
