Тархал 20
20
Кьурулъа лъим чвахизаби
(Тархъ. 17:1-7)
1ТӀоцебесеб моцӀалда#20:1 Ихдалил авал. ГӀизраилалъул халкъ щвана Цин абураб салул авлахъалде ва Кадешалда рещтӀана. Гьений хвана Марям ва гьенийго юкъана. 2Халкъалъе гӀураб лъим букӀинчӀо гьениб, гьеб сабаблъун Мусадаги Гьарунидаги данде чӀана гӀадамал. 3Гьез байбихьана Мусада кӀалал гьикъизе:
«Нижги щай хвечӀел БЕТӀЕРГЬАНАСДА цере нижер вацал хвараб къоялъ! 4Щай нужеца гьаб салул авлахъалде бачараб БЕТӀЕРГЬАНАСУЛ халкъ? Нижги нижер боцӀиги гьанир хвезе рукӀинейищ? 5Щай нужеца ниж Мисриялдаса нахъе рачарал ва гьаб баракат бахъараб, щибго бижулареб бакӀалде щвезарурал? Гьаниб я инжир, я цӀибил, я соно гьечӀо! Къеч хьезабизе лъимгицин гьечӀо!»
6Мусаги Гьарунги, бакӀарараб халкъги жибго тун, Чадиралъул кӀалтӀе рилълъана ва гьенир Аллагьасда цере накабазде ккана, ва гьебсагӀаталдаго гьезие БЕТӀЕРГЬАНАСУЛ къудрат загьирлъана. 7БЕТӀЕРГЬАНАС Мусада абуна:
8«Гьеб гӀансаги босе, дурго вац Гьарунида цадахъ жамагӀаталъул данделъи ахӀе. Хадуб гьел киназдаго цебе бугеб доб кьуруялде амру гьабе лъим кьеян. Гьедин дуца кьурулъан лъим бачӀинабила ва халкъги боцӀиги гьекъезабила», – ян.
9БЕТӀЕРГЬАНАСУЛ амруялда рекъон, Мусаца Гьесда цебе букӀараб гӀанса босана. 10Гьарунгун цадахъ кьуруялда цебе халкъги бакӀарун, Мусаца абуна:
«ГӀенеккея, питначагӀи! Гьаб кьурулъа бахъунищ нижеца нужее лъим кьезе кколеб?» – ин.
11Цинги Мусаца жиндирго гӀанса кьуруялда кӀицӀул кьабуна; чвахун бачӀана кьурулъа лъим ва кинабго халкъалъги боцӀуцаги гӀорцӀизегӀан гьекъана. 12Амма БЕТӀЕРГЬАНАС Мусадаги Гьарунидаги абуна:
«Нуж Дида божичӀелъул ва нужеца гӀизраилазда цебе Дир тӀадегӀанаб бацӀцӀалъиги бихьизабичӀелъул, нужеца бачине гьечӀо гьанже гьаб халкъ Дица гьезие кьелин абураб ракьалде».
13Ва гьеб иццалда цӀар лъуна Мериваялъул#20:13 Мерива – кьал. лъим абун: гьениб гӀизраилаз БЕТӀЕРГЬАНАСДА кӀалгьикъана, Гьесин абуни, гьезие Жиндирго тӀадегӀанаб рацӀцӀалъи загьир гьабуна.
Эдомалдасан гӀизраилазе нух гьукъи
14Кадешалдаса Эдомалъул пачаясухъе чапарзаби ритӀана Мусаца гьадинаб хабаргун:
«Ниж руго дур вацал, ГӀизраилил халкъ! Дуда лъала нижеца хӀехьезе ккарал киналго захӀмалъаби.
15Нижер умумул гочана Мисриялде ва гӀемерал соназ гьениб гӀумру гьабуна нижеца. Мисрияз зулму гьабулеб букӀана нижееги нижер умумузеги, 16амма ниж БЕТӀЕРГЬАНАСДЕ гьардедал, Гьесда нижер гьари рагӀана ва нижехъе витӀана Мисриялдаса ниж нахъе рачарав Малаик.
Гьанже ниж щун руго Кадешалде, дур ракьалъул рагӀалда бугеб шагьаралде. 17Гьарула, изну кье нижее дур улкаялъул ракьалдасан бугеб нухккун ине. Дур хурзабахъанги цӀолбол ахакьанги инаро ниж ва дур гъуязухъа лъимги гьекъеларо. Ниж ина Ханзабазул нухккун, я кваранаб, я квегӀаб рахъалдехун кьуричӀого, дур ракьал нахъа тезегӀан».
18Амма Эдомица жаваб кьуна:
«Нуж дир ракьалдасан инаро! Ине хӀалбихьани, ниж нужеда данде хвалчабигун рахъина», – ян.
19ГӀизраилаз абуна:
«Ниж аслияб шагьраккун ина ва нагагь нижеца яги нижер боцӀуца нужер гъуязухъа лъим гьекъани, нижеца гьелъухъ мухь кьела. Нижее бокьун буго гӀицӀго дур улкаялъул нухккун ине – тӀокӀалъ щибниги къваригӀун гьечӀо», – ян.
20Гьез жаваб кьуна:
«Нуж ине гьечӀо нижер ракьалдасан», – ин.
Цинги кӀудияб къуватаб аскаргун гьезда данде вахъана Эдом. 21Эдомица риччачӀо гьел жиндирго ракьалдасан ине ва ГӀизраилил халкъ гьениса батӀияб рахъалдехун сверана.
Гьарун хвей
22ГӀизраилил халкъ Кадешалдаса къватӀибе бахъана Гьор абураб магӀардехун балагьун. 23Эдомалъул гӀорхъода бугеб Гьор магӀарде щведал, БЕТӀЕРГЬАНАС Мусадаги Гьарунидаги абуна:
24«Гьаруние заман щвана абадияб рокъове ине ва жиндирго умумулгун цолъизе. Гьев лъугьине гьечӀо Дица гӀизраилазе кьелин хӀукму гьабураб ракьалде, щайгурелъул Мерива иццухъ Дица гьабураб амру нужеца кӀиязго бацӀцӀадго тӀубазабичӀо. 25Гьарунги гьесул вас Элеазарги Гьор магӀарде ахӀе. 26Гьениб Гьарунидаса кашишлъиялъул ретӀелги бахъун, гьеб гьесул вас Элеазарида ретӀе, щайгурелъул гьенив Гьарун хвезе вуго ва жиндирго умумулгун цолъизе вуго».
27Мусаца БЕТӀЕРГЬАНАСУЛ амруялда рекъон гьабуна: тӀолабго жамагӀаталда цере гьел Гьор магӀарде рахана, 28гьениб Мусаца Гьарунида тӀаса кашишлъиялъул ретӀел бахъана ва гьеб ретӀана гьесул вас Элеазарида. Ва гьенив, мегӀералъул тӀогьив хвана Гьарун. Мусаги Элеазарги магӀардаса гъоркье рачӀиндал, 29тӀолабго жамагӀаталда бичӀчӀана Гьарун хваравлъи ва киналго гӀизраилаз лъеберго къоялъ магӀу тӀуна гьесда хадуб.
Currently Selected:
Тархал 20: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
