Тархал 12
12
Марямилги Гьарунилги Мусалъ жахӀда ккей
1Марямги Гьарунги лъугьана Мусада бадибчӀвай гьабизе, гьес Кушалдаса гӀадан ячунин абун. 2Гьез абулеб букӀана:
«ГӀицӀго Мусада гурони кӀалъачӀевищ БЕТӀЕРГЬАН? Нижедаги гурищ Гьев кӀалъарав?» – ин.
Ва гьеб БЕТӀЕРГЬАНАСДА рагӀана.
3Живго Мусайин абуни, кутакалда хӀалимав, дунялалдаго бищун хӀалимав чи вукӀана.
4Циндаго БЕТӀЕРГЬАНАС Мусадаги, Гьарунидаги, Марямидаги абуна:
«Нуж лъабалго ДандчӀваялъул Чадиралда цере рилълъа», – ян. Гьел лъабалго гьенире рилълъана.
5Цинги БЕТӀЕРГЬАН рещтӀана накӀкӀул хӀубилъун Чадиралъул кӀалтӀе ва Гьес Гьарунги Марямги ахӀана; гьел кӀиялго церегӀан рилълъана. 6Ва БЕТӀЕРГЬАНАС абуна:
«ГӀинтӀаме Дихъ!
Нужеда гьоркьов вугев БЕТӀЕРГЬАНАСУЛ аварагасе
Дун загьирлъула церетӀамиязулъ,
кӀалъала гьевгун макьабазулъ.
7Амма Дир лагъ Мусагун гьедин гуребха букӀунеб, –
Дир Рокъов гьев сундулъгоги Дие ритӀухъав вуго.
8Гьевгун Дун кӀалъала бадиса бадиве, рагьун,
кици-биценаздалъун гурев;
гьесда бихьула БЕТӀЕРГЬАНАСУЛ сипат.
Кинха нуж хӀинкъичӀел
Дир лагъ Мусада данде рахъун кӀалъазе?»
9БЕТӀЕРГЬАНАСУЛ гьезда кутакаб ццин бахъана ва Гьев нахъе ана.
10Чадиралдаса батӀалъун накӀкӀул парча эхеде босараб сагӀаталъ Марямил черх барас унтиялъ цӀуна: гьелъул тӀом гӀазу гӀадин хъахӀлъана. Гьарун гьелдехун вуссиндал, гьесда бихьана гьелде барасалъул унти бахун бугеблъи. 11Ва гьес Мусада абуна:
«БетӀерчӀахъад, гьарула гьабуге нижее тамихӀ, гӀакълу гьечӀел нижеца гьабураб мунагьалъухъ!
12Гьарула дуда, эбелалъул ургьиса бачӀарабго хвараб ва бащдаб черх турараб лъимада релълъине тоге Марям!»
13Цинги Мусаца БЕТӀЕРГЬАНАСДЕ дугӀа гьабуна:
«Я дир Аллагь, сахлъизае Марям!» – ин.
14Амма БЕТӀЕРГЬАНАС Мусада абуна:
«Гьелъул бадибе инсуца хӀацӀу турабани, анкьго къоялъ рогьо баччизе ккезе гурищ гьелъ букӀараб? Гьей халкъалда гьоркьоса нахъе йитӀе анкьго къоялъ; хадуй тӀадюссине йиччанте».
15Марям анкьго къоялъ халкъалда гьоркьоса нахъе йитӀана, ва гьей тӀадюссинегӀан халкъги бугелъубго чӀун букӀана.
Currently Selected:
Тархал 12: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
