Левит 15
15
Бихьиназул хъублъиялда хурхарал къанунал
1БЕТӀЕРГЬАНАС Мусадаги Гьарунидаги абуна:
2«ГӀизраилил халкъалда лъазабе: Нагагь бихьинчиясул черхалдаса къватӀибе лъамалъи бачӀунеб бугони, гьелъ гьев хъублъизавула. 3БатӀалъи гьечӀо, гьеб жеги бачӀунеб букӀа, гьоркьоб къотӀун букӀа – гьев хъубав ккола.
4Гьединав бихьинчи тӀад кьижараб бусен-къай хъублъула ва гьев гӀодов чӀарабщинаб бакӀги хъублъула. 5Гьесул бусен-къаялда хъваравщинав чияс жиндирго черхги тӀад букӀараб ретӀелги чуризе ккола ва бакъ тӀерхьинегӀан хъубавлъун вукӀуна. 6Лъамалъи бачӀунев чи вукӀараб бакӀалда гӀодов чӀарасги черхги тӀад букӀараб ретӀелги чуризе ккола – гьевги бакъ тӀерхьинегӀан хъубавлъун вукӀуна.
7Лъамалъи бачӀунев чиясда хъварасги чуризе ккола тӀад букӀараб ретӀелги жиндирго черхги; гьевги къасилъизегӀан хъубавлъун вукӀуна.
8Гьес лъидениги туни, гьесги чуризе ккола тӀад букӀараб ретӀел, черхалда лъимги бахъизе ккола ва бакъ тӀерхьинегӀан гьевги хъублъун вукӀуна.
9Лъамалъи бачӀунев чи тӀад рекӀараб кинаб батаниги кьилиги хъублъула. 10Гьесда гъоркь букӀараб щибниги жоялда хъварав чиги гьеб кодобе босарав чиги къасилъизегӀан хъубавлъун вукӀуна; гьесда тӀад букӀараб ретӀелги чуризе ккола, черхалда лъимги бахъизе ккола ва гьев къасилъизегӀан хъубавлъун вукӀуна.
11Лъамалъи бачӀунев чи квералги чуричӀого цоги чиясда хъвани, гьесги чуризе ккола жиндирго ретӀел, черхалда лъимги бахъизе ккола; гьевги маркӀачӀумех щвезегӀан хъубавлъун вукӀуна.
12Гьев чи щагӀил цӀарагӀалда хъвани, гьеб бекизе ккола; гьеб цӀулал цӀарагӀ букӀун батани, лъеца чуризе ккола.
13Гьев чиясул лъамалъи бачӀин къотӀараб мехалъ, анкьго къоялъги чӀун, биччанте гьес жиндирго ретӀел чуризе ва черхалда иццул яги чвахулеб лъарал лъим бахъизе, цинги гьев вацӀцӀалъила. 14Биччанте микьабилеб къоялъ гьев чи, кӀиго рохьил миккиги ялъуни кӀиго миккидул тӀинчӀги босун, ДандчӀваялъул Чадиралда цеве вачӀине ва гьес гьеб кашишасухъе кьезе. 15Кашишас цояб хӀинчӀ мунагь чурулеб къурбаналъе, цогияб тӀубан бухӀулеб къурбаналъе хъвела ва, гьедин БЕТӀЕРГЬАНАСДА цебе гьесул рахъалъ къурбаналги тӀоритӀун, гьев хъублъиялдаса вацӀцӀад гьавила.
16Бихьинчиясул мани бачӀани, гьес черхалда лъим бахъизе ккола ва къасилъизегӀан гьев хъубавлъун вукӀуна. 17Мани тӀаде араб кинаб батаниги жо, яги ретӀел – гьеб чуризе ккола, ва къасилъизегӀан гьеб хъубаблъун рикӀкӀуна.
ЧӀужугӀаданалъул хъублъиялда хурхарал къанунал
18ЧӀужугӀадан росасда аскӀой йегани ва гьесул мани бачӀани, гьесда цадахъ гьелъги черхалда лъим бахъизе ккола ва къасилъизегӀан кӀиялго хъубаллъун рукӀуна.
19ЧӀужугӀаданалъул черхалдаса би бачӀунеб бугони ва гьеб гӀадатияб хӀайиз батани, гьей анкьго къоялъ хъубайлъун йикӀуна. Гьелда хъваравщинав чиги къасилъизегӀан хъубавлъун рикӀкӀуна.
20Жиндирго хӀайизалъул къояз гьей тӀад йегарабщинаб ва гӀодой чӀарабщинаб бакӀги хъублъула. 21Гьелъул бусада хъварав чияс тӀад букӀараб ретӀелги жиндирго черхги чуризе ккола – гьевги маркӀачӀумех щвезегӀан хъубавлъун рикӀкӀуна. 22Гьей гӀодой чӀун йикӀараб бакӀалда хъварав чиясги жиндирго ретӀелги черхги чуризе ккола – гьевги къасилъизегӀан хъубавлъун рикӀкӀуна. 23Гьелъул бусада букӀараб, ялъуни гьей гӀодой чӀолеб бакӀалда букӀараб кинабниги жоялда хъварав чиги къасилъизегӀан хъубав вукӀуна.
24Гьелъул хӀайизалъул къояз рос гьелда аскӀов вегани, гьелъул хӀайизалъул хъублъи гьесде бачӀуна, ва анкьго къоялъ гьевги хъубавлъун рикӀкӀуна. Цинги гьев тӀад вегараб бусен-къайги хъублъула.
25ЧӀужугӀаданалъул черхалдаса гӀемерал къояз би бачӀунеб бугони, гьеб гӀадатияб хӀайизги батичӀони, ялъуни хӀайиз халат бахъунеб бугони, гьебмехалъги, хӀайизалъул къоязго гӀадин, би бачӀунелщинал къояз гьей хъубайлъун йикӀуна. 26ХӀайизалъул къоязго гӀадин, гьей гӀадан тӀад егарабщинаб бусен-къайги хъублъула, гьей гӀодой чӀарабщинаб бакӀги хъублъула. 27Гьел жалазда хъварав чиги хъублъула; гьес жиндирго ретӀелги черхги чуризе ккола – гьевги къасилъизегӀан хъубавлъун вукӀуна.
28Би къотӀараб мехалъ чӀужугӀадан жеги анкьго къоялъ чӀезе ккола, цинги гьей яцӀцӀалъула. 29Микьабилеб къоялъ, кӀиго рохьил миккиги ялъуни кӀиго миккидул тӀинчӀги босун, гьей гӀадан ДандчӀваялъул Чадиралда цее ячӀина, ва гьелъ гьеб кашишасухъе кьела. 30Кашишас цояб хӀинчӀ мунагь чурулеб къурбаналъе, цогидаб тӀубан бухӀулеб къурбаналъе хъвела, ва, гьедин БЕТӀЕРГЬАНАСДА цере гьелъул рахъалъ къурбаналги тӀоритӀун, гьей хъублъиялдаса яцӀцӀад гьайила.
31Нужеца гӀизраилазул халкъ хъублъиялдаса цӀуне, жиндирго хъублъиялдалъун гьезда гьоркьоб бугеб Дир Чадирги хъублъизабун, гьел хвезаризе ккечӀого рукӀине.
32Гьеле лъамалъи бачӀунев яги мани бачӀарав ва гьелдалъун хъублъарав бихьинчиясе хъварал къанунал. 33Гьединго, би бачӀиналъ хъублъарай чӀужугӀаданалъеги. ПалхӀасил, хъублъарав бихьинчиясеги хъублъарай чӀужугӀаданалъеги цого къанун букӀина, гьединго – хъублъарай лъадуда аскӀов вегарав росасеги».
Currently Selected:
Левит 15: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
