Левит 14
14
Барасалдаса рацӀцӀад гьарулел къурбанал
1БЕТӀЕРГЬАНАС Мусада абуна:
2«Гьале барасалъ унтунги вукӀун сахлъарав чияс, живго вацӀцӀалъизе гӀоло гьабизе кколеб жо. Гьединав чи кашишасухъе вачине ккола. 3Халкъалъ гӀумру гьабулеб бакӀалдаса, ай росулъа яги шагьаралдаса къватӀиве ине ккола кашиш гьев вихьизе. Кашишасда гьев чи барасалдаса сахлъун вукӀин бихьани, 4кашишас лъазабизе ккола гьев чиясе кӀиго хӀалалаб хӀинчӀги, цо кедралъул хъвалхьенги, багӀараб квасул кунги, иссопалъул квацӀиги босун бачӀаян. 5Кашишас цояб хӀинчӀ хъвезабизе ккола иццухъа лъадал цӀураб щагӀил хъабаялда тӀадеги ккун. 6Хадуб кашишас босила чӀагояб хӀинчӀги, кедралъул цо хъвалхьенги, багӀараб квасул кунги, иссопалъул квацӀиги. Ва иццухъа лъимгун жубараб хӀинчӀалъул бидулъ ччула гьеб кинабго. 7Хадуб кашишас гьеб би пунхъизе ккола барасалъ унтун вукӀарав чиясде анкьго нухалъ, ва гьев вацӀцӀалъун вугилан лъазабизе ккола; чӀагояб хӀинчӀ, гӀатӀидаб авлахъалдеги босун, гьениб биччан тезе ккола.
8Хадуб гьев чияс жиндирго ретӀелги чурила, тӀолабго расги кӀкӀвала, черхги чурила – цинги гьев вацӀцӀадавлъун вукӀина. Гьелдаса хадуб гьев халкъалда гьоркьове ине бегьула, амма жеги анкьго къоялъ жиндирго чадиралда жаниве лъугьине бегьуларо. 9Анкьабилеб къоялъ гьес нахъеги тӀолабго рас кӀкӀвала, ай бетӀерги, михъ-мегежги, кьунсрулги ва чурила ретӀелги черхги. Гьебмехалъ гьев вацӀцӀалъила.
10Микьабилеб къоялъ гьес къурбаналъе хъвезе кӀиго бихьинаб кьегӀерги цо цӀуяб лъагӀараб кьегӀерги бачӀине ккола, щибго жагъаллъи гьечӀел тӀаса рищун. Гьезда цадахъ ролъул хирияб садакъаялъе бачӀине ккола ефаялъул анцӀго бутӀа гьабун лъабго бутӀа ханждал, зайтуналъул нахги тӀаде тӀун; гьединго цо лог#14:10 ГӀага-шагарго 0,3 литра. зайтуналъул нахги бачӀине ккола. 11Биччанте гьесул рахъалъ рацӀцӀалъиялъул къурбан тӀобитӀулев кашишас гьев чи, гьесул къурбан-садакъагун цадахъ, БЕТӀЕРГЬАНАСУЛ ДандчӀваялъул Чадиралда цеве вахъун чӀезавизе.
12Биччанте кашишас цо бихьинаб кьегӀер гӀайиб бецӀулеб къурбанлъун гьабизе, гьелда цадахъ цо лог цӀураб зайтуналъул нахги лъун. Гьес гьеб эхедеги борхун БЕТӀЕРГЬАНАСДА цебе, хьвагӀезабулеб къурбан хӀисабалда хьвагӀезабила. 13КьегӀер хъвезе ккола мунагь чуриялъулги тӀубан бухӀулебги къурбан хъолеб бакӀалда, ай мукъадасаб бакӀалда. Мунагь чурулеб къурбаналъулго гӀадин, гӀайиб бецӀулеб къурбаналъул гьанги кашишасе букӀуна – гьеб кутакалда хирияб жо ккола. 14Биччанте кашишас гӀайиб бецӀулеб къурбаналъул би босизе ва гьеб бахине вацӀцӀад гьавулев чиясул кваранаб гӀиндаги, кваранаб квералъул кӀудияб килщидаги, кваранаб хӀатӀил кӀудияб килщидаги. 15Хадуб кашишас зайтуналъул нах босила ва квегӀаб хъатинибе тӀела. 16Гьелда жаниб кваранаб квералъул суртӀинкилищги ччун, гьеб нах анкьцӀул пунхъила БЕТӀЕРГЬАНАСДА цебе, ай Чадиралдехун балагьизабун. 17Хъатиниб хутӀараб нах бахине ккола вацӀцӀад гьавулев чиясул кваранаб гӀиндаги, кваранаб квералъул кӀудияб килщидаги, кваранаб хӀатӀил кӀудияб килщидаги, гӀайиб бацӀцӀунеб би бахараб бакӀалда тӀасан. 18ХутӀараб нах кашишас гьев чиясул бетӀералде тӀезе ккола. Гьедин тӀобитӀила кашишас гьев чиясе рацӀцӀалъизарулеб низам.
19Биччанте хадуб кашишас мунагь чурулеб къурбан тӀобитӀизе, гьев хъублъиялдаса вацӀцӀад гьавизелъун. Гьелдаса хадуб тӀубан бухӀулеб къурбан хъвезе ккола. 20ТӀубан бухӀулеб къурбанги ролъул хирияб садакъаги кашишас къурбан-бакӀалда тӀаде босила. Гьедин вацӀцӀад гьавила кашишас гьев чи ва гьев вацӀцӀалъила.
21Амма гьев ресукъав чи ватани, ва гьединал къурбанал хъвезе гьесул рес батичӀони, гьес гӀайиб бецӀулеб къурбаналъе хъвезе цо бихьинаб кьегӀер бачӀани гӀола. Гьебго букӀина хьвагӀезабулеб къурбанлъунги, кашишас гьев чи вацӀцӀад гьавизе вукӀиналъе. Гьелда цадахъ ролъул хирияб садакъаялъе бачӀина ефаялъул анцӀго бутӀа гьабун цо бутӀа#14:21 ГӀага-шагарго 2 литра. ханждал, зайтуналъул нахги тӀаде тӀун; гьединго гьес бачӀине ккола цо лог зайтуналъул нах ва 22кӀиго рохьил микки ялъуни кӀиго миккидул тӀинчӀ – гьесул ресалъухъ балагьун. Цо хӀинчӀ мунагь чурулеб къурбаналъе букӀина, кӀиабилеб хӀинчӀ – тӀубан бухӀулеб къурбаналъе.
23Биччанте рацӀцӀалъиялъул къоязул микьабилеб къоялъ, гьеб кинабгоги цадахъ босун, гьев чи кашишасухъе вачӀине ва ДандчӀваялъул Чадиралъул кӀалтӀа БЕТӀЕРГЬАНАСДА цеве чӀезе. 24Биччанте кашишас босизе гӀайиб бецӀулеб къурбаналъе хъвезе бачӀараб кьегӀерги зайтуналъул нахги ва, хьвагӀезабулеб къурбан хӀисабалда, гьеб БЕТӀЕРГЬАНАСДА цебе эхеде борхизе. 25Цинги къурбан хъвела ва кашишас гьелъул би бахина вацӀцӀад гьавулев чиясул кваранаб гӀиндаги, кваранаб квералъул кӀудияб килщидаги, кваранаб хӀатӀил кӀудияб килщидаги. 26Хадуб кашишас зайтуналъул нах босила ва жиндирго квегӀаб хъатинибе тӀела. 27Гьелда жаниб кваранаб квералъул суртӀинкилищги ччун, гьеб нах анкьцӀул пунхъила БЕТӀЕРГЬАНАСДА цебе. 28Хадуб зайтуналъул нах бахине ккола вацӀцӀад гьавулев чиясул кваранаб гӀиндаги, кваранаб квералъул кӀудияб килщидаги, кваранаб хӀатӀил кӀудияб килщидаги, гӀайиб бецӀулеб къурбаналъул би бахараб бакӀалда тӀасан. 29Хъатиниб хутӀараб нах кашишас гьев чиясул бетӀералде тӀезе ккола. Гьедин тӀобитӀила кашишас гьев чиясе рацӀцӀалъизарулеб низам. 30Биччанте хадуб гьес хӀанчӀи къурбан гьаризе (рохьил маккал ялъуни миккидул тӀанчӀи – гьесул ресалда рекъон): 31цояб – мунагь чурулеб къурбаналъе, цогидаб – тӀубан бухӀулеб къурбаналъе. Гьедин вацӀцӀад гьавила кашишас гьев чи БЕТӀЕРГЬАНАСДА цеве».
32Гьале барасалъул унтудаса сахлъарал чагӀи рацӀцӀалъизариялъе хъварал къанунал ва гьединго ресукъал чагӀазе чӀезарурал къанунал.
Рукъ-къедалда ккал чӀвани гьабизе кколеб
33БЕТӀЕРГЬАНАС Мусадаги Гьарунидаги абуна:
34«Нуж, Дица нужее кьураб Ханааналъул ракьалде лъугьиндал, ва Дица нужер лъил букӀаниги минаялде ккал биччайдал, 35минаялъул хважаин кашишасухъе ине ккола, ва гьес абизе ккола: „Дир минаялда жанир ккалалъул гӀадинал тӀанкӀал лъугьун руго“, – ян. 36Биччанте кашишас гьениве вачӀиналда цебе минаялда жаниб бугебщинаб къайи-цӀа къватӀибе босеян лъазабизе, гьеб кинабгоги хъубаблъун лъазабизе ккечӀого букӀине. Гьелдаса хадуб кашиш вачӀина ва минаялъул хал-шал гьабила. 37Гьев балагьила къадазда лъугьарал тӀанкӀазухъ: гьел гӀурччинккараб яги багӀарккараб кьералъул ратани ва гвендахарал ругони, 38кашиш гьениса къватӀиве вилълъине ккола, ва гьеб мина рахазе ккола анкьго къоялъ. 39Анкьабилеб къоялъ нахъеги минаялъул хал-шал гьабизе вачӀарав кашишасда къадазда гьел тӀанкӀал тӀадеги гӀемерлъун ратани, 40гьес къадазул ккал чӀваралщинал бакӀазда ругел ганчӀал рахъун, шагьар тун къватӀире, хъубаб бакӀалде рехеян лъазабизе ккола. 41Минаялъул жаниса къадаздаса тӀолабго хӀарщги хъачазе ккола ва гьебги шагьаралдаса къватӀибехун хъубаб бакӀалде нахъе базе ккола. 42Биччанте басриял ганчӀазул бакӀалда цӀиял лъезе ва къадазда цӀидасан хӀарщ жужазе.
43Гьеб кинабго гьабун хадуб, ай ганчӀалги хисун, басрияб хӀарщги нахъе хъачан ва цӀидасан хӀарщги чӀван хадуб, нахъеги минаялъул къадазда ккалалъул тӀанкӀал раккани, 44гьебмехалъ нахъеги кашиш вачӀина ва минаялъул хал-шал гьабила. Гьесда бихьани тӀанкӀал къадазда гӀемерлъун рукӀин, гьеб минаялда квешаб барасалъул ккал чӀван букӀин лъала ва мина хъублъун букӀин лъазабила. 45Гьединаб мина биххизабизе ккола, гьелъул ганчӀалги, чӀалабиги, хӀарщги шагьаралдаса къватӀибехун, хъубаб бакӀалде нахъе базе ккола.
46Кашишас гьукъун хадуб гьеб минаялда жаниве лъугьарав щивав чи хъубавлъун вукӀуна бакъ тӀерхьинегӀан. 47Гьеб минаялда жанив кьижарав чияс жиндирго тӀад букӀараб ретӀел чуризе ккола; гьениб жаниб квен кванарасги чуризе ккола тӀад букӀараб ретӀел.
48Амма ганчӀалги хисун, къадаздаса басрияб хӀарщги нахъе хъачан, цӀидасан хӀарщги жужан хадуб минаялъул хал-шал гьабизе вачӀарав кашишасда бихьани тӀокӀалъ тӀанкӀал раккулел гьечӀолъи, гьес гьеб мина бацӀцӀадаб бугилан лъазабила, ккал тӀубан нахъе ун бугелъул. 49Гьеб мина бацӀцӀад гьабиялъул низам тӀобитӀиялъе хважаинас босизе ккола кӀиго хӀинчӀги, цо кедралъул хъвалхьенги, багӀараб квасул кунги, иссопалъул квацӀиги. 50Цояб хӀинчӀ хъвела иццухъа лъадал цӀураб щагӀил хъабаялда тӀадеги ккун. 51Хадуб кашишас босила кедралъул хъвалхьенги, иссопалъул квацӀиги, багӀараб квасул кунги, чӀагояб хӀинчӀги ва гьеб кинабго, иццухъа лъимгун жубараб хӀинчӀалъул бидулъ ччун бахъила ва гьеб пунхъила минаялде анкьго нухалъ. 52Гьедин хӀанчӀил биги, иццул лъимги, чӀагояб хӀинчӀги, кедралъул хъвалхьенги, иссопалъул квацӀиги, багӀараб квасул кунги хӀалтӀизабун, кашишас мина бацӀцӀад гьабила. 53ЧӀагояб хӀинчӀ, шагьаралдаса къватӀибехун, гӀатӀидаб авлахъалда биччан тезе ккола. Гьедин кашишас бацӀцӀад гьабила гьеб мина, ва гьеб бацӀцӀалъила».
54Гьединал руго барасалъул унтабазул хӀакъалъулъ къанунал: ботӀрода бараб тӀехӀ, 55ратӀлида ялъуни минаялда чӀвараб ккал, черхалъул кинаб букӀаниги бакӀ гьорой, тӀомалде бараб сус яги хъахӀал тӀанкӀал – щиб гьеб батаниги. 56Гьел къануназдалъун лъала нужеда хъубабги бацӀцӀадабги батӀа гьабизе. Гьеле барасалъул рахъалъ къанунал.
Currently Selected:
Левит 14: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
