Левит 13
13
ТӀомол унтабазул рахъалъ къанунал
1БЕТӀЕРГЬАНАС Мусадаги Гьарунидаги абуна:
2«Инсанасул тӀомалда киб букӀаниги гьорой баккани, яги тӀаде жо бани, яги тӀанкӀал раккани ва гьеб барасалъул унти букӀиналда хӀинкъи бугони, гьев чи кашиш Гьарунихъе ялъуни гьесул васазухъе вачине ккола. 3Кашишас унтараб бакӀалъул хал-шал гьабила; гьеб бакӀалда бижараб рас хъахӀлъун батани ва унтараб бакӀалда гвенд лъугьун батани, гьебмехалда гьеб барас унти#13:3 Барас унти – чамалиго батӀи-батӀиял квешал тӀомол унтабазул гӀаммаб цӀар. Гьаб бетӀералда рехсолел руго батӀи-батӀиял квешал рахулел тӀомол унтабазул ва гьезул рахъалъ Аллагьас чӀезарурал хӀукмабазул хӀакъалъулъ. букӀин лъала, ва кашишас гьев чи хъубав вугилан лъазабизе ккола. 4Инсанасул черхалда хъахӀаб тӀанкӀ баккани, амма гьениб гвенд лъугьун батичӀони, гьелда тӀад расги хъахӀлъун гьечӀони, кашишас гьединав чи анкьго къоялъ гӀадамаздаса ватӀа гьавун чӀезавизе ккола. 5Анкьабилеб къоялъ кашишас нахъеги унтарасул хал-шал гьабила ва унтараб бакӀалъул кьер хисун гьечӀони, тӀанкӀ рахъ-рахъалде тӀибитӀунги батичӀони, кашишас гьев чи жеги анкьго къоялъ гӀадамаздаса ватӀа чӀезавила. 6Нахъеги анкьабилеб къоялъ гьесул хал-шал гьабила ва, гьеб тӀанкӀалъул кьер хисун букӀин ва гьеб тӀомалда тӀибитӀулеб гьечӀолъи бихьани, кашишас гьев чи вацӀцӀадав вугилан лъазабизе ккола – гьеб буго гӀадатияб сус. Биччанте гьев чияс ретӀел чуризе ва гьебмехалъ гьев вацӀцӀалъула. 7Гьелдаса хадубги черхалда цӀиял тӀанкӀал раккани, гьев чи нахъеги кашишасда вихьизе ине ккола. 8Кашишасда бихьани сус черхалда тӀибитӀулеб букӀин, гьев чи хъубав вугилан лъазабизе ккола – гьеб барасалъул унти буго.
9Барасалъул унти ккарав чи кашишасухъе вачине ккола. 10Кашишас гьесул хал-шал гьабила ва тӀомалда гьорораб хъахӀаб бакӀ батани, гьениб расги хъахӀлъун, рагьарал ругъналги лъугьун ругони, 11гьеб буго басрияб барасалъул унти. Кашишас гьев чи хъубав вугилан лъазабизе ккола; хӀал бихьизелъун дагьал къояз ватӀа чӀезавизе кколаро – гьев ракӀчӀун хъубавлъун вукӀуна.
12Барас черхалдаго тӀибитӀани ва кашишасда бихьулебщинаб бакӀалдаса гьесул тӀом барасалъ бахчун бугони, 13ва кашишасда бихьани гьев тӀанкӀ хутӀичӀого барасалъ хъахӀлъун вукӀин – гьебмехалъ кашишас гьев чи вацӀцӀадав вугилан лъазабизе ккола. ТӀуванго хъахӀлъарав чи вацӀцӀадав ккола. 14Амма рагьарал ругънал лъугьараб сагӀаталда гьев чи хъубавлъун ккола. 15Рагьарал ругънал лъугьун рукӀин бихьарабго, кашишас гьев чи хъубав вукӀин лъазабизе ккола, щайгурелъул рагьараб ругъун хъублъи ккола – гьеб буго барас унти. 16Амма рагьараб ругъун нахъеги хъахӀлъани, виччанте гьев чи цӀидасан кашишасухъе вачӀине. 17Кашишас гьесул хал-шал гьабила, ругънал руцӀцӀун ва хъахӀлъун рукӀин бихьани, кашишас гьев вацӀцӀадав вугилан лъазабила.
18Лъилниги черхалда букӀараб рецӀцӀ ккараб ругъун сахлъани, 19ва гьеб бакӀ хъахӀаб кьерги лъугьун гьорони ва багӀарлъиги рехараб хъахӀаб тӀанкӀ баккани, унтарав чи кашишасухъе вачӀине ккола. 20Кашишас гьесул хал-шал гьабила ва, унтараб бакӀалда гвенд лъугьун батани, расги хъахӀлъун батани, гьев хъубав вугилан лъазабизе ккола. Гьеб буго цебе букӀараб ругъуналъул бакӀалда лъугьараб барас унти. 21Амма гьесул ругъун букӀараб бакӀалда рас хъахӀлъун батичӀони, гвендги лъугьун гьечӀони, гьелъул кьерги хисун бугони, биччанте кашишас гьев анкьго къоялъ гӀадамаздаса ватӀа чӀезавизе. 22Амма хъахӀаб тӀанкӀ кӀодолъулеб бугони, кашишас гьев чи хъубав вугилан лъазабизе ккола: гьеб буго квешаб бахунеб унти. 23ХъахӀаб тӀанкӀ хисулебги кӀодолъулебги гьечӀони, цебе букӀараб ругъуналъул гӀуж букӀуна гьеб, гьединлъидал кашишас гьев чи вацӀцӀадав вугилан лъазабизе ккола.
24Гьединго гьабе лъилниги тӀом бухӀун бугони. БухӀараб бакӀ сахлъидал, гьениб хъахӀаб ялъуни багӀаркьерги рехараб хъахӀаб тӀанкӀ лъугьани, 25ва хал-шал гьабидал кашишасда гьениб расги хъахӀлъун гвендги лъугьун батани – гьеб бакӀалда барасалъул унти лъугьун букӀуна. Кашишас гьев чи хъубав вугилан лъазабизе ккола; гьеб барасалъул унти буго. 26Амма гьеб тӀанкӀалъул хал-шал гьабулев кашишасда тӀанкӀалда тӀад, я рас хъахӀлъун гьечӀеблъи, я гьениб гвенд лъугьун гьечӀеблъи бихьани ва хъахӀаб кьерги ун батани, гьебмехалъ кашишас гьев чи анкьго къоялъ гӀадамаздаса ватӀа чӀезавизе ккола. 27Анкьабилеб къоялъ гьев чи нахъеги кашишасда вихьизе ккола. ТӀанкӀ рахъ-рахъалде тӀибитӀун батани, кашишас гьев чи хъубав вугилан лъазабизе ккола: гьеб барасалъул унти буго. 28Амма хъахӀаб тӀанкӀ хисичӀого бугони, гьеб тӀомалда тӀибитӀулебги гьечӀони, кьерги хисун бугони, гьеб ккола бухӀун букӀиналъ гьорораб бакӀ. Кашишас гьев чи вацӀцӀадав вугилан лъазабизе ккола – бухӀараб бакӀалда хутӀараб гӀуж тун батӀияб жо гурелъул гьеб.
29Нагагь бихьинчиясул яги чӀужугӀаданалъул ботӀрода ялъуни нилъалда тӀехӀ бани, 30ва кашишасда бихьани гьеб бакӀалда гвенд лъугьун ва гьениб рас лъедерлъунги тӀогьиллъунги букӀин, гьес гьев чи хъубав вугилан лъазабизе ккола: ракӀчӀун квешаб бахунеб унти буго гьеб. 31Кашишасда бихьани тӀехӀ бараб бакӀалда гвенд лъугьун гьечӀеблъи, гьениб сахаб расги гьечӀеблъи, гьес гьев чи анкьго къоялъ гӀадамаздаса ватӀа чӀезавизе ккола. 32Анкьабилеб къоялъ кашишас унтараб бакӀалъул хал-шал гьабила. ТӀехӀ рахъ-рахъалде тӀибитӀун батичӀони, тӀогьилаб расги гьечӀони, гьениб гвендги лъугьун батичӀони, 33биччанте гьев чияс рас кӀкӀвазе, гӀицӀго унтарал бакӀалги жалго тун. Цинги кашишас жеги анкьго къоялъ ватӀа чӀезавила гьев. 34Анкьабилеб къоялъ кашишас тӀехӀ бараб бакӀалъул нахъеги хал-шал гьабила ва гьеб кӀодолъунги гъварилъунги гьечӀеблъи бихьани, кашишас гьев чи вацӀцӀадав вугилан лъазабила. Гьев чияс ретӀел чурила ва гьев вацӀцӀадав вукӀина. 35Амма гьев вацӀцӀадав вукӀин лъазабун хадуб, тӀомалда тӀехӀ тӀибитӀизе лъугьани, 36кашишасда гьеб бихьараб гӀола, тӀогьилал расал ругищали валагьизе кколаро – гьев чи хъубавлъун вукӀуна. 37ТӀехӀ букӀахъе хутӀун батани, амма гьениб сахаб рас бижизе лъугьани, гьебмехалъ унти тӀаса ун букӀин лъала ва гьев чи вацӀцӀадавлъун вукӀуна. Кашишас гьев чи вацӀцӀалъун вугилан лъазабизе ккола.
38Бихьинчиясул ялъуни чӀужугӀаданалъул тӀомалда хъахӀал тӀанкӀал раккани, 39кашишас гьезул хал-шал гьабизе ккола. Гьесда бихьани тӀанкӀазул кьер канчӀхъахӀаб гьечӀеблъи, гьеб гӀадатияб сус буго. Гьев чи вацӀцӀадав вукӀуна.
40Пуланав чиясул къунщбуздаса рас хӀулани, гьеб гӀицӀго рас хӀули ккола – гьев чи вацӀцӀадав вукӀуна. 41Нодоялда тӀаса бетӀер хӀулани – гьеб рас хӀули ккола, амма живго вацӀцӀадав вукӀуна. 42Амма гьесул ботӀрол хӀулараб бакӀалда багӀарлъи рехараб хъахӀаб кьералъул тӀанкӀ лъугьани, гьеб бакӀалда барасалъул унти букӀин лъала. 43Кашишас гьев чиясул хал-шал гьабизе ккола ва гьесул хӀулараб ботӀрода лъугьараб гьорой багӀарккараб ялъуни хъахӀаб – черхалъул цоги бакӀазда букӀунеб барасалда релълъараб бугони, 44гьев чи унтун ва хъублъун вукӀин лъала. Кашишас гьев чи хъублъун вугилан лъазабизе ккола, гьесул ботӀрода барас лъугьун бугелъул.
45Гьединав чияс бихъ-бихъараб ретӀел ретӀине ккола; биччанте гьесул бетӀерги гьурщун букӀине. Гьес гьумералъул гъоркьияб рахъ бахчизабизе ккола ва ахӀизе ккола: „Хъубав! Хъубав!“ – ин. 46СахлъизегӀан гьев хъубав вукӀуна. Гьес гӀадамаздаса батӀаго гӀумру гьабизе ккола; биччанте гьесул чӀел халкъалъ гӀумру гьабулеб бакӀалдаса къватӀибехун букӀине.
Ккал чӀван бугони гьабизе кколеб
47-48Квасул ялъуни хӀебтил ратӀлида, бессараб яги хьухьараб квасул ялъуни хӀебтил ххамида, къохьода, яги къохьол гьабураб щиб букӀаниги жоялда ккалалъул цо гьитӀинаб тӀанкӀцин лъугьани, 49ва гьеб тӀанкӀ гӀурччинккараб ялъуни багӀарккараб кьералъул бугони, гьеб ккола барасалъул ккал. Гьеб кашишасда бихьизабизе ккола. 50Кашишас гьеб жоялъул хал-шал гьабила ва гьеб анкьго къоялъ батӀа лъела, чи хъвалареб хӀалалда. 51Анкьабилеб къоялъ кашишас нахъеги гьелъул хал-шал гьабила. Ккалалъул тӀанкӀ тӀибитӀун батани ратӀлида, бессараб яги хьухьараб ххамида, яги къохьол букъараб щиб букӀаниги жоялда тӀад, гьеб буго квешаб барасалъул ккал ва гьеб жо хъубаблъун ккола. 52Гьебмехалъ гьединаб ккал тӀад батарабщинаб жо бухӀизе ккола: ретӀел, бессараб яги хьухьараб квасул ххам, хӀебеталъул ххам, яги къохьол букъараб щиб букӀаниги жо. Гьеб букӀуна квешаб барасалъул ккал; гьеб тӀубан бухӀизе ккола.
53Амма кашишасда бихьани ратӀлида, ялъуни квасул ва хӀебтил ххамида, ялъуни къохьол жалазда тӀад лъугьараб ккалалъул тӀанкӀ кӀодолъулеб гьечӀолъи, 54биччанте кашишас ккал тӀад ккараб жо чуризабизе ва жеги анкьго къоялъ гьелда чи хъвазе бегьуларин абун лъазабизе. 55Хадуб кашишас нахъеги хал-шал гьабила ккал тӀад лъугьараб ва чурараб жоялъул. Гьелда тӀад букӀараб ккал, кьерги хисичӀого, букӀахъе батани, ккал тӀибитӀулеб гьечӀониги, гьеб тӀад лъугьараб жо хъубаблъун букӀуна; гьеб жо бухӀе, кинаб рахъалда ккалалъул тӀанкӀ батаниги. 56Амма гьелъул хал-шал гьабулев кашишасда бихьани, ккалалъул тӀанкӀалъул кьер ун букӀин, гӀицӀго ккал лъугьараб бакӀ нахъе къотӀизе ккола ратӀлидаса, къохьодаса яги ххамидаса. 57РатӀлида, къохьода яги ххамида нахъеги ккалалъул тӀанкӀ лъугьани, гьеб тӀибитӀулеб букӀин лъала. Гьебмехалъ ккал тӀад ккарабщинаб жо тӀубанго бухӀизе ккола. 58Амма чурун хадуб ххамил ва къохьол жоялдаса ккал тӀаса ани, гьеб кӀиабилеб нухалъги чурила ва хадуб бацӀцӀадаблъун лъугьина».
59Гьединал руго ккал бараб ратӀлил, квасул яги хӀебтил ххамил, гьединго къохьол гьарурал киналниги жалазул хӀакъалъулъ къанунал: гьедин лъазабила гьезул рацӀцӀалъи яги хъублъи.
Currently Selected:
Левит 13: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
