Юнус 3
3
Юнус Ниневиялде вачӀин
1Нахъеги БетӀергьанасул калам бачӀана Юнусихъе: 2«Нухде вахъа! КӀудияб шагьар Ниневиялде а. Гьелъул жамагӀаталда лъазабе Дица дуе амру гьабураб жо». 3Юнус нухде вахъана – БетӀергьанасул амруялда рекъон Ниневиялде ана гьев.
Ниневия букӀана кӀудияб шагьар – лъабго къо къваригӀунаан рилълъун унаго гьелъул рагӀа-ракьанде щвезе. 4Юнусица байбихьана цо къодул манзил нахъа тун гьеб шагьар къотӀун хьвадизе ва ахӀун лъазабулеб букӀана: «КӀикъого къоялдасан Ниневия тӀубан тӀатӀала ккезе буго!» – ян. 5Ва божана Ниневиялъул жамагӀат гьанже Аллагьасда. Кинацаго кӀал кквеян лъазабуна ва гьитӀинав-кӀудияв батӀалъи гьечӀого, киназго тӀад ретӀана хӀебет.
6Гьеб хабар Ниневиялъул парччахӀасухъе щведал, гьев парччахӀлъиялъул тахидаса гъоркье рещтӀана, тӀаса рехун жиндирго ретӀелгун, тӀад ретӀана хӀебет ва рохъдолъ гӀодов чӀана#3:6 Доб заманаялда рекӀекълъигун тавбу загьир гьабизе хӀебетги ретӀун рохъдолъ чӀолаан гӀадамал ва кӀалги ккун Аллагьасде гьардолаан.. 7Хадуб гьес буюрухъ кьуна, парччахӀасул ва гьесул вазирзабазул цӀаралдасан, киса-кибего Ниневиялда гьадинаб амру лъазабеян:
«Я гӀадамаз, я боцӀуца, чӀахӀиял-гӀисинал батӀалъи гьечӀого, кванида хъваге, боцӀуде унге, лъин гьекъоге. 8Биччанте гӀадамазги хӀайваназги тӀад хӀебетги ретӀун, кӀваралъ жигар бахъун, Аллагьасде гьардезе. Жив-жив чияс рехун те хъублъи-квешлъи ва зулму-хӀал гьаби. 9Щиб лъалеб, Аллагьасул ццин нахъбуссине бегьула, цинги Досул амруги хисила ва нилъги чӀаго хутӀила».
10Гьезул ишаздасан Аллагьасда бихьана гьез квешлъиялде мугъ рехун букӀин. Аллагь гьездагурхӀана, Жинца гьабизехъин букӀараб тамихӀалъе хӀукму Гьес хисана – гьезие хӀадурун букӀараб балагь-гӀакъуба нахъе къотӀана, доб балагь гьезда тӀаде биччачӀо.
Currently Selected:
Юнус 3: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
