Юнус 4
4
Юнусил ццин бахъин
1Юнусида гьеб иш кутакалда квеш бихьана: гьесул цӀакъго ццин бахъана ва ракӀ бухӀана. 2Гьес БетӀергьанасде гьадинаб гьари-дугӀа гьабуна: «БетӀергьан! Дица гьедин абулеб букӀанагури Дуда, дун инсул ракьалда вугеб мехалъго. Гьединлъидалин дица доб цебесеб нухалда хӀукму гьабураб Таршишалде лъутизе. Дида лъалеб букӀиндал Мун сахаватав, гурхӀулев, сабруяв, рахӀмуяв ва балагь нахъ чӀвазе бокьулев вукӀин. 3Гьанже бахъе, БетӀергьан, дир рухӀ: дие хвейго лъикӀ, чӀаго вукӀиналдаса».
4«Дур гьедин ццин бахъине бегьилищ?» – ин гьикъана БетӀергьанас. 5Юнус шагьар тун къватӀиве вилълъана ва гьелъул бакъбаккул рахъалда чӀана. Гьениб гьес жиндиего хъош гьабуна, ва гьелъул рагӀдукьги вахчун, щибдай шагьаралъул ккелеб абун, хал ккун чӀана. 6БетӀергьан Аллагьас цо хъарахъ бижизабуна гьениб, гьелъ Юнусиде тӀаде рагӀад рехизе букӀине ва гьесул рекӀее парахатлъи лъугьана. Юнус кутакалда разилъун вукӀана гьеб хъархъидаса.
7Нахъисеб къоялъ радал хъахӀлъи рехулеб гӀужалъ Аллагьас хӀапара битӀун бачӀана. Гьеб хӀапараялъ хъарахъ квана ва гьеб бакъвана. 8Бакъ тӀаде бахарабгойин абуни, Аллагьас бухӀараб бакъбаккул гьури битӀун бачӀана гьенибе. Бакъуца Юнусил бетӀер бухӀизабулеб букӀана. Тату хун хвезе анищилан ккана Юнусида. «Хвезего лъикӀ дие, чӀаго вукӀиналдаса», – ян абуна гьес.
9«Бегьилищ хъарахъ сабаблъун мун гьедин ццидахине?» – ян цӀехана Аллагьас Юнусида. «Бегьила, – ян абуна Юнусица. – Ццидаца гъанкъун холев вуго дун!»
10БетӀергьанас абуна: «Я дуца бижизабичӀеб, я захӀмат цӀан гӀезабичӀеб хъархъида хадуб гьедин ракӀ бухӀун буго дур: цо сордоялда жаниб бижана ва цо сордоялда жаниб бакъвана гьеб. 11Кин Дир ракӀ бухӀилареб кӀудияб шагьар Ниневиялъухъ? Нусиялда къоазаргоялдасаги цӀикӀкӀун чи жанив вугеб, жидеда квешаб-лъикӀаб батӀа бахъизе лъаларел ва гьединго гӀемераб боцӀиги бугеб».
Currently Selected:
Юнус 4: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
