Байбихьи 26

ИсхӀакъги Авимелехги

1Улкаялда гьанжеги ракъул заман бачӀана (цебе доб Ибрагьимил заманалдаго гӀадин). Гьединлъидал пилистимазул хан Авимелехихъе Гераралде ана ИсхӀакъ. 2Гьенив БЕТӀЕРГЬАН загьирлъана ИсхӀакъие ва Гьес абуна:

«Мун Мисриялде унге, Дица дуда бихьизабураб ракьалда чӀа. 3Гьенив мун лъикӀ вукӀина, Дица дуе кумек гьабила ва дуде баракатги рещтӀинабила. Гьал киналго ракьал дуеги дур наслабазеги кьелилан дур эмен Ибрагьимие гьедараб гьаги Дица тӀубазабила. 4Дица дур наслабазул гӀадамал зодихъ цӀвабигӀанги гӀемерлъизарила, ва гьезие кьела гьал киналго ракьал. Дунялалъул тӀолалго халкъазе баракат щвезе буго дур наслуялдасан, 5– дур эмен Ибрагьим дихъ гӀенеккаралъухъ ва дир амрабиги, тӀадкъаялги, къануналги, хӀукмабиги гьес тӀуразаруралъухъ».

6Цинги ИсхӀакъ Гераралда чӀана. 7Гьеб бакӀалъул гӀадамаз Ривка щийилан гьикъидал, гьай дир яц йигилан абуна гьес. Берцинай Ривка сабаблъун живго чӀвалилан, гьей жиндир лъади йигилан абизе хӀинкъана гьев.

8Гьедин ана лъикӀаланго заман. Цо нухалда пилистимазул хан Авимелехида гордухъан бихьана ИсхӀакъица Ривка еэдулей. 9Цинги гьес ИсхӀакъ жиндихъего ахӀана ва гьесда кӀалъана:

«Дур лъади йикӀун йигогури гьай! Щайха цинги дуца гьей дур яц йигилан абураб?»

ИсхӀакъица жаваб кьуна:

«Гьей сабаблъун дунго чӀвалилан хӀинкъана дун», – ин.

10«Дуца нижее гьабулеб бугеб щиб? – ан абуна Авимелехица. – Нижер цонигияв дур лъадуда аскӀов вегаравани, щиб гьабилеб букӀараб? КӀудияб мунагьалде ккелароанищ ниж?!»

11Ва Авимелехица жиндирго халкъалда лъазабуна:

«Гьав чиясда яги гьасул лъадуда хъварав чи чӀвазе вуго», – ян.

12Гьенир хурзал рекьизе байбихьана ИсхӀакъица. БЕТӀЕРГЬАНАС кӀудияб баракат лъуна гьесда: нусго нухалъ цӀикӀкӀараб бачӀин щвана гьесие гьеб соналъ. 13ИсхӀакъ бечелъулевго бечелъулев вукӀана. Ахирги кутакалда бечедав чи лъугьана гьесул: 14гьанже гьесул рукӀана гӀиял рехъабиги, гӀачиязул рехьедалги, гӀемерал лагъзалги. Гьединлъидал Пилистимазул гьесде жахӀда ккезе байбихьана. 15Ва Ибрагьимил заманалдаго гьесул лагъзадерица рухъун рукӀарал киналго гъуял рацизаруна гьез. 16Авимелехицаги ИсхӀакъида абуна:

«Нахъе а нижер ракьалдаса. Нижеда дандеккун, гӀемерго къуватавлъун лъугьана мун гьанже».

17Гьениса нахъе ун, ИсхӀакъица Герар абулеб расалъиялда чадрал чӀвана ва гьенив чӀана. 18Ибрагьимил заманалдаго рухъун рукӀарал ва, Ибрагьим хун хадуб, пилистимаз жанибе ракь бан рацарал гъуял цӀидасан рухъана гьес. Кидаялиго Ибрагьимица гьезда лъун рукӀарал цӀаралги цӀидасан лъуна гьес гьел гъуязда. 19Цо нухалда гьесул лагъзал рукӀана расалъиялда лъим балагьизе ракь бухъулел ва гьезда гьениб ицц батана. 20Амма, тӀаде рачӀун, Гераралъул гӀухьби ИсхӀакъил гӀухьбигун дагӀбадизе лъугьана гьеб жидер лъим бугилан. Гьеб гъуй сабаблъун дагӀба ккедал, Эсек#26:20 Эсек – «ДагӀба». абун лъуна гьелда цӀар. 21Цоги гъуй бухъана ИсхӀакъил лагъзадерица, амма гьеб сабаблъунги ккана питна ва гьелда цӀарги Ситна#26:21 Ситна – «Тушманлъи». лъуна. 22Гьебмехалда ИсхӀакъ гьеб бакӀалдаса дагьавги довегӀан гочана ва цоги гъуй бухъана. Гьаб нухалъ щибго дагӀба-къец ккечӀо.

«Гьаб ракьалда нилъ гӀемерлъизе, ахирги БЕТӀЕРГЬАНАС гӀатӀилъи кьуна нилъее», – янги абун, ИсхӀакъица гьеб гъуялда цӀар лъуна Реховот#26:22 Реховот – «ГӀатӀилъи»..

23Цинги ИсхӀакъ Беэр-Шеваялде тӀад вуссана. 24Гьениве щвараб сордоялъго, илгьам лъугьун, БЕТӀЕРГЬАНАС гьесда абуна:

«Дун вуго дур эмен Ибрагьимил Аллагь. Мун хӀинкъуге, Дица кидаго кумек гьабизе буго дуе. Дир лагъ Ибрагьимие гӀоло Дица дуда баракат лъела ва дур наслуги цӀикӀкӀинабила».

25Гьениб къурбаналъе бакӀги бан, Аллагьасе дугӀаги гьабун, ИсхӀакъица жиндирго чадрал чӀвана, гьесул лагъзалги гъуй бухъизе лъугьана. 26Гьеб заманалда Авимелех вачӀана Гераралдаса ИсхӀакъихъе, жиндирго вазир Ахузатгун ва бодул цевехъан Пиколгун цадахъ.

27ИсхӀакъица гьезда абуна:

«Нуж щиб къваригӀун рачӀарал? Нужее вокьичӀого, нахъе къотӀанагури дун нужеца!» – ян.

28Гьез абуна:

«Нижеда бихьулеб буго БЕТӀЕРГЬАНАС дуе кумек гьабулеб букӀин. Гьединлъидал нижее бокьун буго нилъеца цоцае рагӀи кьезе ва дудаги нижедаги гьоркьоб ракълилаб къотӀи-къай букӀине. РачӀа къотӀи гьабизе, 29дуца нижее квешлъи гьабиларилан. Нижецаги дуе, лъикӀлъи гурони, щибго квешлъи гьабичӀо, ва парахат нахъе ине ресги кьуна дуе. Гьанже БЕТӀЕРГЬАНАС дуде баракат рещтӀинабун буго!»

30Гьебмехалъ ИсхӀакъица гьезие кӀудияб квана-гьекъей гьабуна. 31Нахъисеб къоялъ радалго тӀадеги рахъун, гьез цоцазе гьаял гьедана. Цинги ИсхӀакъица гьалбал нухарегӀана, гьелги парахатго нахъруссун ана.

32Гьебго къоялъ, гъуй бухъулел лагъзаз ИсхӀакъида лъазабуна лъим батанилан.

33ИсхӀакъица гьеб гъуялда цӀар лъуна Шива#26:33 Шива – «Гьа гьеди», ялъуни «Анкьго». абун. (Гьелдасан бачӀараб буго гьанже шагьаралъул цӀар Беэр-Шева#26:33 Беэр-Шева – «Гьедиялъул гъуй», ялъуни «Анкьгоязул гъуй»..)

ГӀисавил лъудби

34КӀикъого сон бараб мехалда ГӀисавица лъудби рачана: хитияв Беэрил яс Егьудит ва хитияв Элонил яс Басемат. 35ИсхӀакъиеги Ривкаеги гӀемераб ракӀбакъвай букӀана гьел сабаблъун.

Currently Selected:

Байбихьи 26: АварАК

Highlight

Copy