Байбихьи 25

Ибрагьим хвей

1Ибрагьимица цоги чӀужу ячана – гьелда цӀар Кетура букӀана. 2Гьелъ гьесие гьаруна васал: Зимран, Йокшан, Медан, Мидян, Ишбакъ ва ШуахӀ. 3Йокшание гьаруна Шева ва Дедан. Деданил наслуялъул ккола ашуриял, летушиял ва леумиял. 4Мидянил васал ккола: ГӀефа, ГӀефер, Енох, Авида ва Элдага. Гьел киналго руго Кетурал наслаби.

5Жиндирго тӀолабго бечелъи Ибрагьимица ИсхӀакъие кьуна. 6Ибрагьимица, живго чӀаго вугеб мехалдаго, бечедал сайгъаталги кьун, бакъбаккудехун ругел ракьазде ритӀана гъаравашаз гьарурал васал, ИсхӀакъидаса рикӀкӀад гьарун.

7Ибрагьимица кинабниги нусиялда лъабкъоялда анцӀила щуго сон бана.

8ЦӀакъго херлъараб мехалда, гӀумруялъул соназдасаги гӀорцӀун, жиндирго умумузда хадув ана Ибрагьим.

9Гьесул васаз – ИсхӀакъицаги ИсмагӀилицаги – гьев вукъана Мамреялда гӀагарлъухъ Махпелаялъул хуриб бугеб нохъода, ай Цохарил вас хитияв Эфронил ракьалда. 10Ибрагьимица хитиязухъа босун букӀана гьеб хур. Гьенир рукъун руго Ибрагьимги Сараги. 11Ибрагьим хун хадуб, гьесул вас ИсхӀакъиде баракат рещтӀинабуна БЕТӀЕРГЬАНАС. ИсхӀакъица яшав гьабулеб букӀана Беэр-Лахай-Роиялда гӀагарлъухъ.

ИсмагӀилил васал

12Гьале Сарал гъараваш Мисриялдаса Гьажарица Ибрагьимие гьавурав вас ИсмагӀилилги гьесул наслуялъулги къиса.

13ЦӀикӀкӀарасдасан байбихьун ИсмагӀилил васазул цӀарал: Невайот (ИсмагӀилие тӀоцеве гьавурав), Кедар, Адбеэл, Мивсам, 14Мишма, Дума, Масса, 15ХӀадад, Тема, Етур, Нафиш ва Кедма. 16Гьел руго ИсмагӀилил васал – анцӀила кӀиго къавмалъул анцӀила кӀиго бетӀер. ИсмагӀилил васазул цӀарал лъун руго гьел чӀун рукӀарал бакӀазда ва росабазда.

17Кинабниги нусиялда лъебералда анкьго сонги бан, ИсмагӀил хвана ва жиндирго умумузда хадув ана. 18Гьесдасан лъугьарал наслаби чӀана ХӀавилаялдаса бахъараб Шуралде щвезегӀан ругел ракьазда. Гьеб Шур буго Мисриялдаса бакъбаккул рахъалдехун, Ассириялде унеб нухда. Жидерго киналго вацазулгун тушманлъиялда рукӀана гьел.

Якъубги ГӀисавги

19Гьале Ибрагьимил вас ИсхӀакъилги гьесул наслабазулги къиса.

Ибрагьимие гьавуна вас ИсхӀакъ. 20КӀикъого сон бараб мехалда, ИсхӀакъица лъадилъун ячана Паддан-Арамалдаса арамеяв Бетуэлил яс Ривка. Гьей йикӀана арамеяв Лаванил яц. 21ИсхӀакъил лъадуе лъимер гьабулеб букӀинчӀо. Жиндир лъадуда гурхӀаян гьардана ИсхӀакъ БЕТӀЕРГЬАНАСДА. Ва БЕТӀЕРГЬАНАС гьесул гьари къабул гьабуна: Ривкал ургьибе лъимер лъугьана. 22Гьелъул ургьир лъимал цоцада тенкезе лъугьана.

«ВахӀ, – ин абуна Ривкаца, – гьадин букӀине батани, щай дие гьаб къваригӀараб?»

Цинги гьелда бан БЕТӀЕРГЬАНАСУЛ амру лъазе дугӀа гьабуна гьелъ. 23БЕТӀЕРГЬАНАС гьелда абуна:

«КӀиго халкъ буго дур ургьиб,

кӀиго къавм бачӀина дур чохьониса къватӀибе.

Цояб къавм цоялдаса къуватаб букӀина,

кӀудиявав вукӀина гьитӀинасул лагълъун».

24Лъимер гьабизе заман щведал, гьелъул ургьиб кӀиго лъимер букӀин загьирлъана. 25ТӀоцеве гьавуна багӀарккараб кьералъул, кӀургӀараб расуца тӀубанго черх бацарав вас. Гьесда цӀар лъуна ГӀисав#25:25 ГӀисав абураб цӀар бухьараб буго «расуца бацараб» абураб магӀнаялда.. 26ГӀисавил хӀатӀил эгъеги къан ккун, гьесдаго хадув цогидавги вачӀана. Гьесда цӀар лъуна Якъуб#25:26 Якъуб – жугьутӀ мацӀалда гьаб цӀар релълъуна «эгъе ккурав» ва «гукки» абураб магӀна бугел рагӀабазда.. Гьел гьарураб мехалда, лъабкъого сон бан букӀана ИсхӀакъица.

27Васал кӀудиял гӀуна. ГӀисав лъугьана гьунар бугев чанахъан, мегъ-ракьалъул чи. Якъуб вукӀана рокъов вукӀине бокьулев, парахатав чи. 28Гьезул эмен ИсхӀакъие чанил гьан бокьулаан, гьединлъидал гьесие ГӀисавги вокьулаан. Амма Ривкае Якъуб вокьулаан.

29Цо нухалда Якъуб чурпа гьабулев вугеб мехалда, чанаса вуссун вачӀана свакан тату хварав ГӀисав.

30«Дун вакъуца холев вугин, гьеле гьеб дур багӀараб чурпа кье дие кваназе», – ян абуна гьес Якъубида. (Гьединлъидалин гьесда Эдом#25:30 Эдом – багӀараб. абун тӀокӀцӀар лъураб.)

31«ТӀоцеве гьавурасул ихтияр дие бичани, кьела», – ян абуна Якъубица.

32«ТӀоцеве гьавурав вукӀиналъул пайда щиб дие, дун вакъуца хвезехъин вугеб мехалъ», – ин абуна ГӀисавица.

33«Гьедин батани гьедеха!» – ян абуна Якъубица.

ГӀисав гьедана тӀоцеве гьавурасул даража Якъубие бичанилан. 34Гьебмехалъ Якъубицаги гьесие чедги хилъалодул чурпаги кьуна. Гьев кванана, гьекъана, цинги тӀаде вахъун, нахъе ана. Гьедин щибго къимат гьабичӀого тана ГӀисавица тӀоцеве гьавиялъул даража.

Currently Selected:

Байбихьи 25: АварАК

Highlight

Copy