Байбихьи 24
24
ИсхӀакъги Ривкаги
1Ибрагьим цӀакъго херлъун вукӀана. Ва сундулъго БЕТӀЕРГЬАНАСУЛ баракатги насиблъун букӀана гьесие.
2Цинги Ибрагьимица жиндирго рукъалъул ишги магӀишатги тӀадкъарав кӀудияв лагъасда абуна:
«Гьаб дир мачӀалда кверги лъун#24:2 МачӀалда квер лъолаан гьа ритӀухъаб букӀин бихьизабизе., 3зобалазулги ракьалъулги БЕТӀЕРГЬАН Аллагьасул цӀарги рехсон, гьеде мун, дуца дир васасе гьаб ракьалъул ханааниязда гьоркьоса яс ячинарилан. 4Мун а дир улкаялде, дир гӀагарал чагӀазухъе, ва гьениса яче ИсхӀакъие лъади».
5Лагъас гьикъана:
«Дида цадахъ гьание, гьаб ракьалде ячӀине дояса ясалъе бокьичӀони, щиб гьабилеб? Гьебмехалъ дица дур вас доб мун нахъе гочараб улкаялде щвезавизе кколевищ?» – абун.
6«Ворегиха щвезавуге! – ян жаваб кьуна гьесие Ибрагьимица. – Дир вас дове вачунге дуца! 7Дирго инсул рукъги рехун тун, дун чияр ракьалде вачарав Зобалазул БЕТӀЕРГЬАН Аллагь кӀалъана дунгун ва гьев гьедана гьаб ракь дир наслуялъе кьелилан. Гьес Жиндирго малаик витӀила дуда цеве-цеве, дир васасе лъадиги ячун вачӀине дуе кумекалъе. 8Дуда цадахъ ячӀине ясалъе бокьичӀони, дур гьедиялдаса мун эркенлъила, амма дир вас дуца дове вачунге!»
9Жиндирго хважаинасул мачӀалда кверги лъун, лагъ гьедана гьедин гьабилилан. 10Цинги жиндирго хважаинасул варанабазда гьоркьоса анцӀго вараниги бачун, хири-хириял сайигъаталги росун, гьев сапаралде вахъана Арам-Нагьараималде, Нахор вугеб шагьаралде.
11БакътӀерхьул гӀуж букӀана шагьаралда гӀагарлъухъ гъуялда аскӀор гьес жиндирго варанаби чӀезарураб мехалда. Гьеб букӀана шагьаралдаса руччаби лъеде рачӀунеб гӀуж. 12Цинги Ибрагьимил лагъас дугӀа гьабуна:
«Я БЕТӀЕРГЬАН, дир хважаин Ибрагьимил Аллагь! Гьарула Дуда, жакъа дие икъбал насиб гьабе ва дир хважаинасул рекӀел мурад тӀубазабе! 13Гьале дун гьанив, гъуялда аскӀов, шагьаралдаса ясал лъадаре рачӀунеб бакӀалда вахъун чӀела. 14Дица гьание ячӀарай ясалда абуни дур гӀертӀиниса лъим кьейилан ва гьелъ гьекъейин, дур варанабиги гьекъезарилин жинцаян жаваб кьуни, гьелдалъун бичӀчӀила дида Дуца дурго лагъ ИсхӀакъие бахӀарай тӀаса йищараблъи. Гьебмехалда дида бихьила Дуца рахӀму-цӀоб лъун букӀин дир хважаинасда!»
15Гьел рагӀаби кӀалдиса къватӀире рачӀиналде, гӀеретӀги гъажилда бан, лъадал цӀезе ячӀана Милкалги Ибрагьимил вац Нахорилги вас Бетуэлил яс Ривка. 16Гьей йикӀана цӀакъ берцинай, жеги росасе инчӀей яс. Гъуялъухъе ун, гӀеретӀ цӀуна гьелъ. Гьей нахъюссун унаго, 17хадувги векерун, Ибрагьимил лагъас абуна:
«Бегьулеб батани, дие гьекъезе лъим кье дур гӀертӀиниса!» – ян.
18«Гьекъе, хӀурматияв», – ин жаваб кьуна гьелъ.
Ва гьебсагӀатго гъажилдаса гӀеретӀги бахъун, Ибрагьимил лагъасе гьекъезе лъим кьуна. 19Цинги гьелъ абуна:
«ГьабсагӀат дица дур варанабазеги баччила лъим, гӀорцӀизегӀан гьекъезе».
20БоцӀи гьекъезе лъураб росонибе хехго гӀеретӀги чӀехьон, нахъеги гъуялъухъе екерана гьей – гьедин лъим баччана киналго варанаби гӀорцӀизегӀан. 21ВуцӀцӀун чӀун, гьелъухъ валагьун вукӀана лагъ, Аллагьас гьесул сапаралда баракат лъун букӀиналда ракӀчӀезегӀан. 22Варанаби гьекъон рахъараб мехалда гьес гьелъие кьуна, бащдаб шекелалъул#24:22 Шекел – 11 грамм. бакӀлъи бугеб, магӀарзукъалазда балеб меседил кӀиликӀги, анцӀго шекелалъул бакӀлъи бугеб, кӀиго меседил курхьенги. 23Гьес гьелда гьикъана:
«Мун лъил яс кколей? Дур инсул къайи-свериялда нижее сордо базе бакӀ гьечӀодай?» – абун.
24Гьелъ жаваб кьуна:
«Милкалги Нахорилги вас Бетуэлил яс йиго дун».
25Гьелъ тӀадеги жубана:
«Нижер гӀемераб наккуги буго варанаби тӀад регизе, гьезие кьезе кӀалцӀи-херги буго; нужее сордо базе бакӀги букӀина».
26Цинги накабаздеги ккун, гӀодоб нодоги чӀван, БЕТӀЕРГЬАНАСЕ рецц гьабуна гьев чияс. 27Ва гьес абуна:
«ЦӀоб гӀатӀидав ва рагӀи холарев вуго дир хважаин Ибрагьимил БЕТӀЕРГЬАН Аллагь! Гьес дир хважаин рехун течӀо! БЕТӀЕРГЬАНАС дун вачана битӀахъе дир хважаинасул вацасул рокъове!»
28Екерун рокъоеги ун, Ривкаца эбелалда бицана кинабго ккара-таралъул хӀакъалъулъ. 29Лаван абун цӀар бугев вац вукӀана Ривкал. Гьев гъуялъухъе векерана нухлуласда аскӀове. 30Яцалъул кӀиликӀги курхьабиги рихьидал ва гьес Ривкада абурабги рагӀидал, Лаван гьев чиясухъе гӀедегӀана. Ибрагьимил лагъ, жиндирго варанабигун, жеги гъуялда аскӀовго чӀун вукӀана. 31Гьесда Лаваница абуна:
«ЛъикӀ щварав, БЕТӀЕРГЬАНАСУЛ баракат рещтӀарав! Гьанив вахъун чӀун щибулев мун? Дица дуе рукъги дур варанабазе бакӀги къачӀан буго».
32Гьебмехалъ Ибрагьимил лагъ гьесул бакӀалде вилълъана. Варанабаздаса къайи бахъана, гьезие наккуги кӀалцӀи-херги бачӀана. Гьоболасеги гьесда цадахъ рукӀаразеги хӀатӀал чуризе лъимги бачӀана. 33Хадуб гьезда цебе квен лъуна, амма лагъас абуна:
«Гьаниве дун щай витӀаравали бицун бахъинегӀан кваналаро дун».
«Бицеха», – ян абуна гьесда Лаваница.
34Гьес абуна:
«Дун вуго Ибрагьимил лагъ. 35БЕТӀЕРГЬАНАС кӀудияб баракат лъун буго дир хважаинасда ва гьесие кьун буго гӀемераб бечелъи: гӀиги, гӀачиги, гӀарац-меседги, лагъзалги, гъаравашалги, варанабиги, хӀамулги. 36Дир хважаинасул лъади Сараца гьесие вас гьавуна херлъараб мехалъ, ва жиндирго бугебщинаб хазина-бечелъи дир хважаинас гьев васасе кьезе амру гьабуна. 37Дир хважаинас дун гьедизавуна, дица гьесул васасе доб ханааниязул ракьалдаса гӀадан ячинарилан 38ва гьесул ватӀаналде, гьесул гӀагарлъиялъухъе ун, гьениса гьесул васасе бахӀарайги ячун вачӀинилан.
39Дица дирго хважаинасда цӀехана, гьениса ясалъе дида цадахъ ячӀине бокьичӀони, щиб гьабилебилан. 40Гьес дие жаваб кьуна: „Дун божарав дир БЕТӀЕРГЬАНАС дуда цадахъ Жиндирго малаик витӀила ва Гьес дур сапаралда баракат лъезабила, дир тухумалдаса, дир инсул кьолбодаса ясги дир васасе ячун мун вачӀине. 41Мун дир гӀагарал чагӀазухъеги щун, гьез дуда цадахъ яс йитӀизе инкар гьабуни, мун дурго гьаялдаса эркенлъила“, – ян.
42Жакъа гъуялда аскӀове щведал, дица дугӀа гьабуна: „Я БЕТӀЕРГЬАН, дир хважаин Ибрагьимил Аллагь, гьарула Дуда, дир гьаб сапаралда баракат лъе! 43Гьале дун гьаб гъуялда аскӀов вахъун чӀела. Лъадал гӀеретӀ цӀезе гьание яс ячӀараб мехалда, дица гьелда абила дур гӀертӀиниса лъим гьекъезе кьейилан. 44Гьелъ дие жаваб кьуни: ‘Гьекъе, дур варанабазеги баччила дица лъим’, – абун, гьелъул магӀна букӀина БЕТӀЕРГЬАНАС гьей яс тӀаса йищун йикӀин дир хважаинасул васасе лъадилъун ячине“.
45Гьедин дугӀа гьабун бахъиналдего, гъажилда гӀеретӀги лъун ячӀана Ривка. Гъуялъухъеги ун, гьелъ гӀеретӀ лъадал цӀедал, гьекъезе лъим кьейилан гьарана дица гьелда. 46„Гьекъе, дур варанабазеги баччила дица лъим“, – ин абуна гьелъ, гьебсагӀат гъажилдаса босун гӀеретӀги дихъе кьун. Дица лъим гьекъон бахъиндал, варанабазеги баччана гьелъ лъим. 47Мун лъил ясилан гьикъидал, гьелъ жаваб кьуна: „Милкалги Нахорилги вас Бетуэлил яс йиго“, – ян. Гьебмехалда дица гьелъие магӀарзукъалазда базе кӀиликӀги кверазда ххезе курхьабиги кьуна. 48Цинги дица БЕТӀЕРГЬАНАСЕ сужда гьабуна ва БЕТӀЕРГЬАНАСЕ – дир хважаин Ибрагьимил Аллагьасе – рецц-бакъ гьабуна, хважаинасул васасе гьесул кьолбодаса яс ячине Гьес дун битӀахъе гьаниве тӀовитӀаралъухъ. 49Гьанже нужеца щиб абилеб? Нужее къабуллъилищ дир хважаинасул гьари тӀубазабизе? Дица щиб гьабилебали лъазе, жаваб кьеха гьанже нужеца».
50Лаваницаги Бетуэлицаги жаваб кьуна:
«Гьеб БЕТӀЕРГЬАНАСДАСАН лъугьараб иш буго: я квешаб яги лъикӀаб бицун гьелда тӀад кӀалъазе бакӀ гьечӀо нижее. 51Гьале Ривка – яче гьей дудаго цадахъ. БЕТӀЕРГЬАНАСЕ бокьухъе букӀине биччанте гьеб иш ва дур хважаинасул васас гьей лъадилъун ячине йиччанте».
52Гьеб рагӀидал, Ибрагьимил лагъас БЕТӀЕРГЬАНАСЕ нодо чӀван, сужда гьабуна. 53Цинги гьес къватӀире рахъана Ривкае ритӀарал меседилги гӀарцулги тӀагӀелал, ретӀел-кун, гьединго гьелъул вацасеги эбелалъеги ритӀарал хириял сайгъатал. 54Цинги гьевги гьесда цадахъ рукӀаралги квана-гьекъана ва кьижизе регана. Радал тӀаде рахъиндал, Ибрагьимил лагъас абуна:
«Дирго хважаинасухъе тӀад вуссине изну кье дие», – ян.
55Ривкал вацасги эбелалъги абуна:
«Йиччанте анцӀго къоялъги гьей нижеда аскӀой чӀезе. Цинги нуж гьейгун цадахъ нухда ритӀила».
56«Гьанив чӀун заман инабуге дир. БЕТӀЕРГЬАНАС дир сапаралда баракат лъун букӀаго, виччанте дун дирго хважаинасухъе нахъ вуссине!» – ян абуна Ибрагьимил лагъас
57«Дой ахӀизин, долъ щиб абулищали цӀехезе», – ян абуна гьез.
58Гьез Ривка ахӀана ва гьелда гьикъана:
«Гьав чиясда цадахъ ине рази йигищ мун?» – ин.
Гьелъ жаваб кьуна:
«Рази йиго», – ян.
59Гьебмехалда Ривкаги, гьелъул рахьдал эбелги, Ибрагьимил лагъги, гьесда цадахъ рукӀарал чагӀиги нухарегӀизе хӀадурлъана гьел. 60Гьезулгун къо-лъикӀ гьабулелъул, Ривкада баракат лъегиян гьадинаб дугӀа гьабуна гьез:
«Я нижер яц, гӀемерал наслаби лъугьаги дудасан ва
аза-азар, анцӀаза-азар чи гӀеги гьезул!
Дур лъималаз кверде росаги
тушбабазул шагьарал!»
61Ривкаги гьелъул гъаравашалги варанабазда рекӀана ва Ибрагьимил лагъасда цадахъ къватӀире рахъана. Гьедин, Ривкаги ячун, рокъове къокъана гьев.
62ИсхӀакъ Беэр-Лахай-Роиялдаса (доб заманалда гьев Негевалда яшав гьабун вукӀана) рокъове тӀадвуссараб гӀуж букӀана гьеб. 63БакътӀерхьул гӀужалъ гьев магъилъе ана ургъизе ва дугӀа гьабизе. БетӀер борхидал, рикӀкӀадасанго варанабазул къапила бачӀунеб бихьана гьесда. 64Ривкадаги вихьана ИсхӀакъ. Гьеб параялъго вараниялдаса гъоркьеги рещтӀун, 65гьелъ Ибрагьимил лагъасда гьикъана:
«Нилъеда данде вачӀунев вугев гьадав чи щив?» – ан.
«Дов дир хважаин вуго», – ян абуна лагъас.
Гьебмехалда Ривкаца чадраялъ гьумер бахчана.
66Лагъас ИсхӀакъида бицана сапаралда ккара-таралъул хӀакъалъулъ. 67Цинги ИсхӀакъица Ривка ячана жиндирго эбел Сарал букӀараб чадиралъуе, ва Ривка гьесул лъадилъун лъугьана. ИсхӀакъие йокьана Ривка ва хварай эбелалъухъ рухӀел гӀодоцана.
Currently Selected:
Байбихьи 24: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
