Тархъанлъи 38

Къурбан-бакӀ

(Тархъ. 27:1-8)

1Бецалиэлица акациялъул цӀулал гьабуна къурбанал рухӀулеб къурбан-бакӀги; гьеб букӀана ункъбокӀонаб, щуго натӀалъ халатаб, щуго натӀалъ гӀебаб ва лъабго натӀалъ борхатаб. 2Гьелъул ункъабго бокӀоналда цо-цо лълъар гьабуна – къурбан-бакӀги лълъурдулги цорекӀарал гьаруна, ва гьеб киналдаго тӀад мазгар бекьана. 3Цинги къурбан-бакӀалъе хӀажатаб кинабго цӀарагӀги гьабуна: рохъо балел хъуби, квархаби, би тӀолел суркӀаби, гьан базе гӀучӀал ва бухӀараб тӀурччи лъолел тӀабкӀал. Гьеб кинабго гьабуна мазгарул. 4Жеги гьабуна хьури – мазгарул гьин – къурбан-бакӀалъул рагӀалаздаса гъоркьехун, гьелъул борхалъиялъул бащалъиялде щвараб. 5Мазгарги биун тӀун хӀадурана гӀурдузе ункъго гор ва гьел горал мазгарул хьуриялъул ункъабго бокӀоналда щула гьаруна. 6Хадуб акациялъул гӀурдул гьаруна ва гьезда тӀад мазгар бекьана. 7ГӀурдул къурбан-бакӀалъул кӀиябго рахъалда ругел горазда жанире ккезаруна, гьеб баччизе санагӀатаб хӀалалда. Къурбан бухӀулеб бакӀ гьабуна хъарщазул, жаниса гьодораб.

Мазгарул хӀерч

(Тархъ. 30:18)

8ДандчӀваялъул Чадиралъул кӀалтӀа хъулухъ гьабулел руччабаз кьурал матӀабазул Бецалиэлица гьабуна мазгарул гъоркьчӀелги бугеб мазгарул кӀудияб хӀерч.

Мукъадасаб Чадиралъул азбар

(Тархъ. 27:9-19)

9Хадуб Бецалиэлица азбар гӀуцӀана. Азбаралъул къилбаялъул рахъалда гьабуна нусго натӀалъ халатаб тӀеренаб хӀебтил пардав, 10къого мазгарул гъоркьчӀелалда тӀад эхетараб къого хӀобода бараб. ХӀубазда тӀад гъунцӀбиги горалги гьаруна гӀарцул. 11Гьединго шималияб рахъалдаги гьабуна нусго натӀалъ халатаб тӀеренаб хӀебтил пардав, къого мазгарул гъоркьчӀелалда тӀад эхетараб къого хӀобода бараб. ХӀубазда тӀад гъунцӀбиги горалги гьаруна гӀарцул.

12БакътӀерхьул рахъалда гьабуна кӀикъоялда анцӀго натӀалъ халатаб пардав ва гьеб бана анцӀго гъоркьчӀелалда тӀад эхетараб анцӀго хӀобода; гъунцӀбиги горалги гӀарцул гьаруна. 13Бакъбаккул рахъги кӀикъоялда анцӀго натӀалъ халатаб букӀана. 14Азбаралда жанире лъугьунеб кӀалтӀуялъул цояб рахъалда гьабуна анцӀила щуго натӀалъ халатаб пардав, гъоркьчӀелалги ругеб лъабго хӀобода бараб. 15Ва кӀалтӀуялъул цогидаб рахъалдаги гьабуна анцӀила щуго натӀалъ халатаб пардав, гьединго гъоркьчӀелалги ругеб лъабго хӀобода бараб. 16Азбар сверун ккурал киналго пардавал гьаруна тӀеренаб хӀебтил. 17ХӀубазул гъоркьчӀелал рукӀана мазгарул, хӀубазул гъунцӀби ва горал – гӀарцул, ва гьезул тӀогьал – гӀарац тӀад бекьарал. Азбаралъул киналго хӀубал цоцада рухьун рукӀана риццатал гӀарцул квараз.

18Азбаралъул кӀалтӀа бигъараб пардав гьабуна тӀеренаб хӀебтил ва канчӀхъахӀилабги, бецӀбагӀарабги, канчӀбагӀарабги квасул куназ бессун, тӀад расеналги угьун. Гьеб букӀана къого натӀалъ гӀебаб ва щуго натӀалъ борхатаб, азбаралъул пардавалго гӀадин. 19Гьелъие гьабуна мазгарул гъоркьчӀелалда эхетизабураб ункъго хӀуби. ХӀубазул гъунцӀбиги горалги гьаруна гӀарцул ва гьезул тӀогьаздаги гӀарац бекьана. 20Мукъадасаб Чадиралъул ва гьелда сверухъ бугеб азбаралъул киналго гъазихъал рукӀана мазгарул.

ЦӀарагӀалъул сияхӀ

21Гьале Мукъадасаб Чадир, ай КъотӀиялъул Чадир балаго хӀалтӀизабураб сурсаталъул сияхӀ. Мусал буюрухъалда рекъон, кашиш Гьарунил вас Итамарил нухмалъиялда гъоркь, левитаз хӀадурана гьеб сияхӀ. 22(Ягьудал къавмалдаса ХӀурил Урийил вас Бецалиэлица кинабго гьабуна Мусаги гьоркьов ккун загьир гьабураб БЕТӀЕРГЬАНАСУЛ амруялда рекъон; 23гьесда цадахъ вукӀана Данил къавмалдаса Ахисамахил вас Ахолиав – хӀалбихьи бугев устар ва махщелчи. Гьединго канчӀхъахӀилабги, бецӀбагӀарабги, канчӀбагӀарабги квасул куназул ва тӀеренаб хӀебеталъул ххам бессиялъул ва расенал угьиялъул махщел лъалаан гьесда.) 24Мукъадасаб бакӀ гӀуцӀиялъе хӀалтӀизабуна къоло ичӀго талантгун анкьнусиялда лъеберго шекел меседалъул#38:24 ГӀага-шагарго цо тонна. – халкъалъ босун бачӀараб месед.

25Халкъ рикӀкӀиялда гӀахьаллъараз бачӀана нусго талантгун азаралда анкьнусиялда лъабкъоялда анцӀила щуго шекел (Чадиралда хӀалтӀизабулеб шекел хӀисабалде босун) гӀарацалъул#38:25 ГӀага-шагарго 3,4 тонна.. 26Халкъ рикӀкӀиялда гӀахьаллъаразул къогоялдаса цӀикӀкӀун сон барал киналго бихьиназухъа (гьединазул кинавниги ватана 603 550 бихьинчи) бакӀарана щивасухъа цо-цо бека#38:26 Бащдаб шекел – гӀага-шагарго 5,5 грамм гӀарацалъул., ай бащдаб шекел гӀарацалъул. 27Чадиралъул ва пардавазул хӀубазе гъоркьчӀелал гьаризе хӀалтӀизабуна нусго талант#38:27 ГӀага-шагарго 3,4 тонна. гӀарацалъул: нусго гъоркьчӀелалъул щибалъе цо-цо талант гӀарацалъул. 28ХутӀараб азаралда анкьнусиялда лъабкъоялда щуго шекел гӀарацалъул хӀалтӀизабуна: хӀубазе гъунцӀби ва горал гьаризе, хӀубазул тӀогьазда бекьизе ва хӀубазе рухьенал гьаризе.

29Кинабниги лъабкъоялда анцӀго талантгун кӀиазаралда ункънусго шекел мазгаралъул#38:29 ГӀага-шагарго 2,5 тонна. кьуна халкъалъ Мукъадасаб бакӀалъе хӀалтӀизабизе. 30Гьелъул гьаруна: ДандчӀваялъул Чадиралъул кӀалтӀуялъул хӀубазе гъоркьчӀелал, къурбан-бакӀ ва гьелъие хьуриги цӀарагӀги, 31азбаралъул пардавазеги кӀалтӀуялъул хӀубазеги гъоркьчӀелал, гьединго Чадиралъеги азбаралъул пардавазеги киналго гъазихъал.

Currently Selected:

Тархъанлъи 38: АварАК

Highlight

Copy