Тархъанлъи 36

1Биччанте, Бецалиэлицаги, Ахолиавицаги ва, Мукъадасаб бакӀ баялъул мурадалда, БЕТӀЕРГЬАНАС махщелги бажариги кьурал гьунар тӀокӀал киналниги устарзабазги гьеб кинабго БЕТӀЕРГЬАНАСУЛ амруялда рекъон гьабизе».

2Мусаца ахӀана Бецалиэлги, Ахолиавги ва БЕТӀЕРГЬАНАС бажари кьурал ва гьенир хӀалтӀизе гъира бугел киналго гьунар тӀокӀал устарзабиги. 3Мусаца гьезухъе кьуна Мукъадасаб Чадир баялъе гӀизраилаз кьурабщинаб жо. Халкъалъин абуни, къойидаса къойиде жеги бачӀунеб букӀана. 4Гьебмехалда Мукъадасаб бакӀалда гьарулел хӀалтӀабиги чӀезарун, устарзаби рилълъана 5Мусахъе ва гьез абуна:

«БЕТӀЕРГЬАНАС тӀадкъарал хӀалтӀабазе хӀажалъулебщинаб гӀунги тӀокӀалъ бачӀунеб буго халкъалъ», – ин.

6Гьебмехалъ Мусаца тӀолабго жамагӀаталда лъазабуна: «Я бихьинчияс, я чӀужугӀаданалъ тӀокӀалъ щибниги босун бачӀунге Мукъадасаб бакӀ баялъе», – ян. ГӀадамаз рачӀунел рукӀарал хасал садакъаби гьедин лъалхъизаруна, 7щайгурелъул хӀалтӀабазе хӀажатабщинаб гӀунги тӀокӀалъ бакӀарун букӀана.

Чадир бай

(Тархъ. 26:1-37)

8МахщелчагӀаз Мукъадасаб Чадиралъе анцӀго пардав гьабуна тӀеренаб хӀебтил, канчӀхъахӀилабги, бецӀбагӀарабги, канчӀбагӀарабги квасул куназги бессун. Гьел пардавазда тӀад махщалида угьана херувимазул сипатал. 9Киналго пардавал рукӀана цоцазда ращадал: къоло микьго натӀалъул халалъиги, ункъго натӀалъул гӀеблъиги бугел. 10Щуго пардав цоцада букъун цо гьабуна ва хутӀараб щуго пардавги гьединго гьабуна. 11Цояб пардавалъул ахиралда бугеб кьералъул рагӀалккун рукъана канчӀхъахӀилаб ххамил гъанцӀакӀичӀал ва кӀиабилеб пардавалъул ахиралда бугеб кьералдаги гьединго гьабуна. 12КӀикъоялда анцӀго гъанцӀакӀичӀ букъана кӀиябго пардавалъул ахиралда ругел кьеразул рагӀалаздаса эхеде цоцада дандритӀун. 13Гьединго кӀикъоялда анцӀго меседил гъанцӀаги гьабуна ва гьездалъун цоцада рекӀинабуна кӀиябго пардав, Чадир цорекӀараб букӀине.

14Чадиралда тӀад базе гьез гьабуна цӀцӀел квасул анцӀила цо пардав. 15АнцӀила цоябго пардавги букӀана цоцазда бащадаб: лъеберго натӀалъул халалъиги ункъго натӀалъул гӀеблъиги бугел. 16Гьезул щуго пардав цадахъ букъун цо гьабуна ва хутӀараб анлъго пардавги гьединго цадахъ букъана. 17Цояб пардавалъул ахирисеб кьералъул рагӀалккун эхеде гьабуна кӀикъоялда анцӀго гъанцӀакӀичӀ ва кӀиабилеб пардавалъул ахирисеб кьералъул рагӀалалдаги гьабуна кӀикъоялда анцӀго гъанцӀакӀичӀ. 18Хадуб кӀикъоялда анцӀго гъанцӀаги гьабуна, гьеб кӀиябго цоцада рекӀинабун, пардав цолъизабизе. 19Чадиралда тӀасан базе пардав гьабуна багӀар кьералъ релъарал гӀиял къухьдузул ва гьелдаги тӀасан базе – тӀеренал цӀаказул.

20Гьединго Чадиралъул къедалъе акациялъул цӀулал рамаби гьаруна; 21щибаб рама букӀана анцӀго натӀалъ халатаб, натӀгун бащдалъ гӀебаб; 22Ххеназул ахада кӀиябго рахъалда цоцада дандбитӀун кӀиго цӀутӀелгун гьаруна гьел рамаби. Гьедин гьаруна киналго рамаби. 23Чадиралъул къилбаялъул рахъалъе гьабуна къого рама 24ва гьезие гӀарцул кӀикъого гъоркьчӀелги – щибаб рамаялъе кӀи-кӀи, цо цӀутӀелалда гъоркь цо букӀунеб хӀалалда. 25Ва Чадиралъул шималияб рахъалъеги гьабуна къого рама 26ва кӀикъого гӀарцул гъоркьчӀел – щибаб рамаялда гъоркь кӀи-кӀи. 27Чадиралъул нахъисеб, бакътӀерхьул рахъалъе гьабуна анлъго рама 28ва жеги кӀиго рама – кӀиябго нахъисеб бокӀоналъеги. 29Гьел бокӀназда лъурал рамаби ахадасаги тӀарадасаги цолъизарун рукӀана; кӀиябго рамаялъул тӀарада горал рана гьел щулалъизаризе. 30Гьедин гьабуна микьго гор ва анцӀила анлъго гӀарцул гъоркьчӀел – щибаб рамаялда гъоркь кӀи-кӀи.

31Жеги гьез гьаруна акациялъул цӀулал рахал – рамабазда тӀасан лъезе: щуго – Чадиралъул цояб рахъалда ругел рамабазда тӀасан лъезе, 32щуго – цогидаб рахъалда ругел рамабазе, ва щуго – Чадиралъул нахъисеб, бакътӀерхьул рахъалъул рамабазе. 33Чадиралъул къадазда тӀасан, гьезул бакьулъан, цояб рахъалдаса цогидаб рахъалде щвараб рахиги лъуна. 34Рамабазда тӀад месед бекьана ва гьезие меседил горал гьаруна, рахал кквезе. Рахазда тӀадги месед бекьана.

35Хадуб хасаб пардав бессана тӀеренаб хӀебетги ва канчӀхъахӀилабги, бецӀбагӀарабги канчӀбагӀарабги квасул куналги хӀалтӀизарун, тӀад херувималги угьун. 36Пардав тӀад бигъизе акациялъул цӀулал ункъго хӀуби гьабуна ва гьезда тӀад месед бекьана; хӀубазе меседил гъунцӀбиги гӀарцул ункъго гъоркьчӀелги гьабуна. 37Чадиралъул кӀалтӀа бигъизе пардавги гьабуна канчӀхъахӀилабги, бецӀбагӀарабги, канчӀбагӀарабги квасул куналъул ва тӀеренаб хӀебтил, тӀад расеналги угьараб. 38Ва гьелъие щуго хӀуби гьабуна, тӀад гъунцӀбигун ва ахадасаги тӀогьисаги тӀад меседги бекьун, ва гьезие щуго мазгарул гъоркьчӀелги гьабуна.

Currently Selected:

Тархъанлъи 36: АварАК

Highlight

Copy